రోజూ రాత్రి పడుకునే ముందు కచ్చితంగా చేయాల్సిన పనులివే.. మంచి నిద్ర, పూర్తి ఆరోగ్యం కావాలంటే..
రోజంతా పడిన అలసట తీరి, మరుసటి రోజు ఉత్సాహంగా ప్రారంభమవ్వాలంటే రాత్రి పూట ప్రశాంతమైన నిద్ర చాలా అవసరం. అయితే ప్రస్తుతం మారుతున్న జీవనశైలి, నిరంతర పని ఒత్తిడి, డిజిటల్ పరికరాల వాడకం వల్ల చాలామందికి రాత్రివేళల్లో సరిగ్గా నిద్రపట్టడం లేదు. పడుకునే ముందు పాటించే కొన్ని సులువైన సూత్రాలు నాణ్యమైన నిద్రను అందించడమే కాకుండా ఆరోగ్యాన్ని కూడా పెంపొందిస్తాయి. అవేంటో ఇప్పుడు చూద్దాం..
రాత్రి పడుకునే ముందు పాటించే కొన్ని చిన్నచిన్న అలవాట్లు మంచి నిద్రను ఇవ్వడమే కాకుండా, శారీరక, మానసిక ఆరోగ్యానికి ఎంతగానో తోడ్పడతాయి. రాత్రి వేళల్లో స్క్రీన్ సమయాన్ని పరిమితం చేయడం, గోరువెచ్చని నీటితో స్నానం చేయడం లేదా కాళ్లు శుభ్రం చేసుకోవడం వల్ల ఒత్తిడి తగ్గి త్వరగా నిద్రపడుతుంది. అలాగే మరికొన్ని నియమాలు కూడా ఉన్నాయి. ఇటువంటివి రాత్రిపూట నాణ్యమైన నిద్రను అందిస్తాయి. పడుకునే ముందు ఈ అలవాట్లను క్రమం తప్పకుండా పాటించడం వల్ల ఉదయాన్నే రోజంతా ఉత్సాహంగా ఉండవచ్చు.
స్క్రీన్ సమయాన్ని పరిమితం చేయడం:
రాత్రి పడుకోవడానికి కనీసం అరగంట లేదా గంట ముందు స్మార్ట్ఫోన్లు, ల్యాప్టాప్లు మరియు టీవీలకు దూరంగా ఉండాలి. వీటి నుంచి వచ్చే నీలి కాంతి శరీరంలో నిద్రను ప్రేరేపించే మెలాటోనిన్ హార్మోన్ ఉత్పత్తిని తగ్గించి, నిద్రలేమికి దారితీస్తుంది.
గోరువెచ్చని నీటి స్నానం లేదా పాదాల శుభ్రత:
పడుకునే ముందు గోరువెచ్చని నీటితో స్నానం చేయడం వల్ల కండరాల ఒత్తిడి తగ్గి శరీరం రిలాక్స్ అవుతుంది. స్నానం చేయడం కుదరని పక్షంలో కాళ్లను, పాదాలను సబ్బుతో శుభ్రంగా కడుక్కోవడం వల్ల శరీర ఉష్ణోగ్రత సమతుల్యమై త్వరగా నిద్ర వస్తుంది.
ప్రశాంతమైన వాతావరణం, ధ్యానం:
పడుకునేముందు కొన్ని నిమిషాలు ప్రశాంతంగా కూర్చుని ధ్యానం చేయడం లేదా తేలికపాటి సంగీతం వినడం వల్ల మనస్సులోని ఆందోళనలు తగ్గుతాయి. అలాగే పడకగదిని శుభ్రంగా, తక్కువ వెలుతురుతో, ఆహ్లాదకరమైన ఉష్ణోగ్రతలో ఉంచుకోవడం నిద్రకు ఎంతో అనుకూలంగా ఉంటుంది.
తేలికపాటి ఆహారం, ద్రవాలు:
రాత్రి సమయంలో జీర్ణ వ్యవస్థ నెమ్మదిస్తుంది. కాబట్టి, పడుకోవడానికి 2-3 గంటల ముందే తేలికపాటి భోజనం పూర్తి చేయాలి. పడుకునే ముందు కేఫీన్ లేదా మద్యం తీసుకోవడం వల్ల నిద్రకు భంగం కలుగుతుంది. దానికి బదులుగా గోరువెచ్చని పాలు లేదా హెర్బల్ టీ తీసుకోవడం మేలు చేస్తుంది.
ముఖ సంరక్షణ, ఓరల్ కేర్:
రాత్రి పడుకునే ముందు దంతాలను తోముకోవడం, ముఖాన్ని కడుక్కుని చర్మానికి తగిన మాయిశ్చరైజర్ రాయడం వల్ల నోటి ఆరోగ్యం, చర్మ కాంతి మెరుగవుతాయి. ఇలాంటి చిన్నచిన్న మార్పులను మీ దినచర్యలో భాగం చేసుకోవడం వల్ల మానసిక ప్రశాంతత లభించడమే కాకుండా, ప్రతిరోజూ ఉదయం పూర్తి శక్తితో, ఉత్సాహంతో మేల్కొనవచ్చు.
మరిన్ని లైఫ్ స్టైల్ న్యూస్ కోసం క్లిక్ చేయండి..