బీహార్ ఎన్నికలకు ఈసీ మార్గదర్శకాలు

కరోనా మహమ్మారి ఒకవైపు దేశాన్ని వణికిస్తోంది. మరోవైపు గడువు ముగుస్తున్న అసెంబ్లీ ఎన్నికలు నిర్వహించేందుకు కేంద్ర ఎన్నికల సంఘం రెడీ అవుతోంది.

  • Balaraju Goud
  • Publish Date - 5:40 pm, Fri, 25 September 20
బీహార్ ఎన్నికలకు ఈసీ మార్గదర్శకాలు

కరోనా మహమ్మారి ఒకవైపు దేశాన్ని వణికిస్తోంది. మరోవైపు గడువు ముగుస్తున్న అసెంబ్లీ ఎన్నికలు నిర్వహించేందుకు కేంద్ర ఎన్నికల సంఘం రెడీ అవుతోంది. కరోనా వైరస్ కాలంలో దేశంలో మొదటిసారి ఎన్నికలు జరగబోతున్నాయి. బీహార్ అసెంబ్లీ ఎన్నికలకు షెడ్యూల్ కూడా విడుదల చేసింది ఈసీ. బీహార్ ఎన్నికలపై రాజకీయాలతో కొవిడ్-19 తీవ్ర ప్రభావాన్ని చూపుతోంది. ఈ నేపథ్యంలో ఈసీ పలు మార్గదర్శాలు జారీ చేసింది. కొవిడ్ నిబంధనలు అనుసరించి పోలింగ్ నిర్వహించాలని సూచించింది.

బీహార్ అసెంబ్లీ ఎన్నికలను మూడు విడతలుగా నిర్వహించేలా షెడ్యూల్ విడుదల చేసింది. పోలింగ్‌ను ఉదయం 7 నుంచి సాయంత్రం 6 వరకు నిర్వహించనున్నారు. ఇంతకు ముందు కొన్ని ప్రత్యేక సందర్భాలు తప్పితే సాయంత్రం 5 వరకే నిర్వహించేవారు. ఓటర్లు ఎలాంటి ఇబ్బందీ లేకుండా తమ ఓటు హక్కును వినియోగించుకునేందుకు గంట పొడగించినట్లు ఈసీ పేర్కొంది. అయితే, వామపక్ష ప్రభావిత ప్రాంతాల్లో ఇది వర్తిందని ఈసీ తెలిపింది. కొవిడ్-19 అనంతరం జరుగుతున్న ఎన్నికలు కావడంతో ఓటర్లు భౌతిక దూరాన్ని పాటించాలని, తప్పని సరిగా సానిటైజ్ చేసుకోవాలని వెల్లడించింది. ఇందుకు సంబంధించి అన్ని ఏర్పాట్లు చేసినట్లు ఎన్నికల అధికారులు తెలిపారు.

ఓటర్ల ఆరోగ్య భద్రతను దృష్టిలో పెట్టుకొని దీనిని తప్పనిసరి చేసినట్లు వారు పేర్కొన్నారు. అంతే కాకుండా 7.2 కోట్ల గ్లౌజులను ఏర్పాటు చేసినట్లు, ఓటు వేసే సమయంలో ఓటర్లు ఇవి తప్పనిసరిగా ఉపయోగించాలని ఈసీ తెలిపింది. పోలింగ్ కేంద్రాల వద్ద మొత్తంగా 45 లక్షల మాస్కులు, 7 లక్షల సానిటైజర్లు, 6 లక్షల పీపీఈ కిట్లు, 6.7 లక్షల ఫేస్ షీల్డులు, 23 లక్షల చేతి తొడుగులు ఎన్నికల సిబ్బంది కోసం ఏర్పాటు చేయబోతున్నట్లు అధికారులు వెల్లడించారు. అక్టోబర్, నవంబర్ నెలల్లో మూడు విడుతలుగా జరిగే ఈ ఎన్నికలు దేశవ్యాప్తంగానే కాకుండా ప్రపంచం దృష్టినీ ఆకర్షించబోతున్నాయి. ఆయా దేశాల్లో జరిగే ఎన్నికలకు బహుశా బీహార్ అసెంబ్లీ ఎన్నికలు మార్గదర్శం అవుతాయనే చర్చ కూడా సాగుతోంది. కొవిడ్ తర్వాత జరుగుతున్న ఎన్నికలు కావడంతో అందరి దృష్టిని ఆకర్షిస్తున్నాయి బీహార్ ఎన్నికలు.