రైతు చట్టాలపై ప్రభుత్వ చర్చల మీద నమ్మకం లేదు, సీపీఎం సీనియర్ నేత సీతారాం ఏచూరి, తొందరపడ్డారని విమర్శ

రైతు చట్టాలపై అన్నదాతలతో ప్రభుత్వం జరుపుతున్న చర్చలమీద తమకు విశ్వాసం లేదని సీపీఐ ఎం సీనియర్ నేత సీతారాం ఏచూరి అన్నారు. ఈ చట్టాలకు సంబంధించిన బిల్లులను పార్లమెంటులో హడావుడిగా ఎందుకు ఆమోదించారని ఆయన ప్రశ్నించారు. రైతు సమస్యలపై ఏ సమయంలోనైనా అరమరికలు లేకుండా ఓపెన్ మైండ్ తో  చర్చలకు ప్రభుత్వం సిధ్ధంగా ఉందని ప్రధాని మోదీ నిన్న ప్రకటించారని, మరి ఈ పని అప్పుడే ఎందుకు చేయలేదన్నారు. పార్లమెంటులో ఈ బిల్లులమీద చర్చను బీజేపీ అడ్డుకోలేదా ? వీటిపై చర్చ జరగాలని పట్టు బట్టిన  ఎంపీలను సస్పెండ్ చేయలేదా ?  ఓపెన్ మైండ్ తో మీరెందుకు రైతులతో ముందే ఎందుకు చర్చలు జరపలేదు అని సీతారాం ఏచూరి ప్రశ్నలు సంధించారు. బిల్లులను హడావుడిగా ఆమోదించాల్సిన అవసరం ఏమొచ్చిందన్నారు. ఇప్పుడేమో ఈ అంశాలపై చర్చలకు సిధ్ధమంటున్నారు..మరి అలాంటప్పుడు ఈ చర్చలపై ఎవరికైనా నమ్మకం ఎలా ఉంటుందన్నారు.

రైతు చట్టాలపై ఓ తీర్మానాన్ని ఆమోదించేందుకు ప్రత్యేక అసెంబ్లీని సమావేశపరచాలని కేరళ ప్రభుత్వం కోరితే గవర్నర్ తిరస్కరించారని ఏచూరి గుర్తు చేశారు. ఆ రాష్ట్రంలో ఈ చట్టాలను వ్యతిరేకిస్తూ పెద్ద నిరసన  ప్రదర్శన జరిగిన విషయం పత్రికల్లో ప్రధాన వార్తలుగా  వచ్చిన విషయాన్ని మోదీ పట్టించుకోలేదన్నారు. గుడ్ గవర్నెన్స్ అని పదేపదే వల్లె వేస్తుంటారని, అంటే ఇదేనా అని సీతారాం ఏచూరి ప్రశ్నించారు.