AQI
TV9 Network
User
Sign In

By signing in or creating an account, you agree with Associated Broadcasting Company's Terms & Conditions and Privacy Policy.

భిక్షాటనతో జీవనం.. ఆలయాలకు లక్షల్లో విరాళం.. నర్సియమ్మ గొప్ప మనసు!

భిక్షాటన చేస్తూ జీవనం సాగిస్తున్న ఓ యాచకురాలు.. తన కష్టార్జితంలో కొంత పొదుపు చేస్తూ ఆలయాలకు లక్షల్లో విరాళాలు అందిస్తున్నారు. సొంత ఇల్లు, ఆస్తిపాస్తులు లేకపోయినా.. దేవుడి సేవకు మాత్రం వెనుకాడడం లేదు. తునికి చెందిన నర్సియమ్మ ధారాలమ్మ ఆలయానికి రూ.లక్ష, శివాలయానికి రూ.50 వేలు, తాజాగా విశ్వేశ్వర స్వామి ఆలయానికి మరో రూ.50 వేల విరాళం అందించారు. శ్రీశైలం భ్రమరాంబిక అమ్మవారికి బంగారు కళ్లు సమర్పించారు. ఆమె దాతృత్వం, భక్తి పలువురికి స్ఫూర్తిగా నిలుస్తున్నాయి.

భిక్షాటనతో జీవనం.. ఆలయాలకు లక్షల్లో విరాళం.. నర్సియమ్మ గొప్ప మనసు!
Narsiyamma,
Pvv Satyanarayana
| Edited By: |

Updated on: Nov 20, 2026 | 4:37 PM

Share

దాతృత్వానికి డబ్బు, హోదా, సంపదే ప్రామాణికం కాదు.. ఇవ్వాలనే మంచి మనసుంటే చాలని నిరూపిస్తున్నారు ఓ యాచకురాలు. రోజూ భిక్షాటన చేస్తూ జీవనం సాగిస్తున్న ఆమె.. తాను సంపాదించిన కొద్దిపాటి మొత్తంలో కొంత పొదుపు చేస్తూ ఆలయాలకు విరాళాలు అందిస్తున్నారు. ఉండటానికి సొంత ఇల్లు లేదు.. కూడబెట్టిన ఆస్తులు లేవు.. అయినా దేవుడి సేవకు తన వంతు సహాయం చేయాలన్న తపన మాత్రం ఎంతో గొప్పది. ఇలా భిక్షాటన ద్వారా వచ్చిన డబ్బుతో ఆలయాలకు లక్షల రూపాయలు విరాళంగా అందిస్తూ అందరి ప్రశంసలు అందుకుంటున్నారు కాకినాడ జిల్లా తునికి చెందిన నర్సియమ్మ.

భిక్షాటనతో జీవనం.. దేవుడి సేవకు పొదుపు

కాకినాడ జిల్లా తుని పట్టణంలోని ధారాలమ్మ ఆలయ ప్రాంగణంలో తన కుమారుడితో కలిసి నివసిస్తున్న నర్సియమ్మ.. వివిధ ఆలయాల వద్ద భిక్షాటన చేస్తూ జీవనం సాగిస్తున్నారు. రోజూ వచ్చిన డబ్బులో తన కనీస అవసరాలకు కొంత వినియోగించుకుని, మిగిలిన మొత్తాన్ని ఆలయాలకు విరాళంగా ఇవ్వాలనే ఉద్దేశంతో పొదుపు చేస్తున్నారు. తన జీవన పరిస్థితులు ఎలా ఉన్నా.. భక్తి, దాతృత్వంలో మాత్రం వెనుకడుగు వేయడం లేదు.

ఆలయాలకు లక్షల్లో విరాళాలు

కార్తీకమాసం సందర్భంగా తుని గాంధీ సత్రంలోని అన్నపూర్ణ విశాలాక్షి సమేత విశ్వేశ్వర స్వామి ఆలయానికి నర్సియమ్మ తాజాగా రూ.50 వేల విరాళం అందించారు. అంతేకాదు, ఇప్పటికే తునిలోని ధారాలమ్మ ఆలయానికి రూ.లక్ష, శివాలయానికి రూ.50 వేల విరాళం సమర్పించారు. శ్రీశైలం భ్రమరాంబిక అమ్మవారికి బంగారు కళ్లు కూడా అందించి తన భక్తిని చాటుకున్నారు.

భిక్షాటన ద్వారా వచ్చే కొద్దిపాటి ఆదాయంతో తన జీవనం సాగిస్తూ.. అందులో నుంచి వేలాది రూపాయలు, లక్షల రూపాయలు దేవుడి సేవకు అందించడం పలువురిని ఆశ్చర్యానికి గురిచేస్తోంది. తనకు ఉన్నది తక్కువైనా, అందులో నుంచి ఇతరుల కోసం, దైవ సేవ కోసం కొంత ఇవ్వాలనే నర్సియమ్మ ఆలోచన ఎంతో మందికి స్ఫూర్తిగా నిలుస్తోంది.

సంపద కాదు.. మంచి మనసే గొప్పది!

సాధారణంగా ఆలయాలకు భారీ విరాళాలు అందించేవారంటే సంపన్నులు, వ్యాపారవేత్తలు గుర్తుకొస్తారు. కానీ నర్సియమ్మలాంటి వారు దాతృత్వానికి సంపదతో సంబంధం లేదని తమ చేతలతో చూపిస్తున్నారు. కోట్ల రూపాయలు ఉన్నా దానం చేయని వారు ఉండొచ్చు.. కానీ రోజూ రూపాయి రూపాయి కూడబెట్టి, తన కష్టార్జితంలో నుంచి దేవుడికి లక్షల్లో విరాళాలు ఇచ్చే నర్సియమ్మ వంటి వారు నిజంగా అరుదు.

తన జీవితం ఎన్నో పరిమితుల మధ్య సాగుతున్నా.. దేవుడి సేవలో తనకున్నదాంట్లో కొంత సమర్పించాలన్న ఆమె తపన గొప్పది. నిజమైన దాతృత్వం అంటే ఎంత ఇచ్చామన్నది కాదు.. మన దగ్గర ఉన్నదాంట్లో ఇతరుల కోసం ఎంత మనసుతో ఇచ్చామన్నదే అని నర్సియమ్మ జీవితం మరోసారి గుర్తు చేస్తోంది.

Follow Us