Air Conditioner: వేసవిలో ఏసీలు కొనేవారికి బ్యాడ్‌ న్యూస్‌.. భారీగా పెరగనున్న ధరలు.. తప్పదంటున్న కంపెనీలు..!
Air Conditioner: వేసవి కాలం వచ్చిందంటే చాలు ఏసీల కింద సేద తీరాలనుకుంటారు. కానీ ఈ ఏడాది ఏసీ ధరలు మండిపోనున్నట్లు తెలుస్తోంది. అయితే ఏసీలో...
Air Conditioner: వేసవి కాలం వచ్చిందంటే చాలు ఏసీల కింద సేద తీరాలనుకుంటారు. కానీ ఈ ఏడాది ఏసీ ధరలు మండిపోనున్నట్లు తెలుస్తోంది. అయితే ఏసీలో ఉపయోగించే ధరలు పెరగడం వల్ల ఈ ఏడాది ఏసీల ధరలు దాదాపు 5 నుంచి 8 శాతం పెంచేందుకు ప్రయత్నాలు చేస్తున్నట్లు సంకేతాలు అందుతున్నాయి. ధరలు పెంచినా ఈ ఏడాది ఏసీల విక్రయాల్లో రెండంకెల వృద్ధిని సాధిస్తామన్న విశ్వాసం కంపెనీలు ధీమా వ్యక్తం చేస్తున్నాయి.
గత రెండు, మూడు నెలల కాలంలోనే విక్రయాల్లో 25 శాతం వృద్ధి నమోదైనట్లు ఆయా ఏసీ కంపెనీల ప్రతినిధులు చెబుతున్నారు. మొత్తం మీద ఏసీల తయారీపై 10 నుంచి 12 శాతం భారం పడినా తొలి విడతల్లో 5 నుంచి 6 శాతం మేర ధరలు పెంచామని, ఏప్రిల్‌లో మరో 5 నుంచి 6 శాతం పెరగవచ్చని ఎలక్ట్రానిక్స్‌, అప్లయెన్సెస్‌ తయారీదారుల సంఘం చెబుతోంది.
ఈ ఏడాది ఏసీల విక్రయాల్లో 20 శాతం వృద్ధిని ఆశిస్తున్నట్లు పేర్కొంటున్నారు. ఏసీల తయారీలో ఉపయోగించే కొన్ని మెటల్స్‌, కంప్రెసర్ల ధర పెరగడం వల్ల ధరలు పెంచక తప్పదనే అభిప్రాయం పలు కంపెనీల నుంచి వ్యక్తం అవుతోంది. తాము ఈ సారి ఏసీల ధరలు 3 నుంచి 5శాతం పెంచాలనుకున్నట్లు దైకిన్‌ సీఈవో కన్వల్‌జీత్‌ జవా వెల్లడించారు. విక్రయాలపై ఈ పెంపు ప్రభావం కొంత పడుతుందని ఆయన అన్నారు.
అలాగే ఏసీల ధరల్లో 6 నుంచి 8శాతం పెంచాలనుకుంటున్నట్లు పానాసోనిక్‌ సీఈఓ మనీష్‌ శర్మ తెలిపారు. కాగా, ఏసీల విభాగంలో అగ్రగామి కంపెనీల్లో ఒకటైన టాటా గ్రూప్‌ కంపెనీ వోల్టాస్‌ ఇప్పటికే అన్ని రకాల ఏసీల ధరలు పెంచేసింది. తాము ఇప్పటికే ఏసీల ధర 5 నుంచి 8 శాతం పెంచినా ఏప్రిల్‌లో మరో 3 శాతం వరకు పెంచే ఆస్కారం ఉన్నట్లు పేర్కొంటున్నారు.
కాగా, కరోనా సంక్షోభం కారణంగా చాలా మంది వర్క్‌ ఫ్రంహోం చేస్తున్నారని, జనం కూడా ఎక్కువగా ఇళ్లకే పరిమితం అవుతున్నారని అన్నారు. అయితే విక్రయాల్లో 40 నుంచి 45శాతం వృద్ధిని ఆశిస్తున్నట్లు ఎల్‌జీ కంపెనీ చెబుతోంది.