Cat Worship: ఈ దేశ ప్రజలకు పిల్లులు దేవుళ్ళతో సమానం! వీరు పిల్లులను ఎందుకు పూజిస్తారో మీకు తెలుసా?
ప్రపంచవ్యాప్తంగా పిల్లులను కేవలం పెంపుడు జంతువులుగానో లేదా అశుభ సూచికలుగానో చూస్తారు. కానీ ప్రాచీన ఈజిప్టు సంస్కృతిలో పిల్లుల స్థానం చాలా ప్రత్యేకం. అక్కడ పిల్లులు కేవలం జంతువులు కావు.. దైవిక శక్తులకు ప్రతిరూపాలు. ఈజిప్షియన్లు పిల్లులను ఎంతగానో ఆరాధించేవారు, గౌరవించేవారు. వారి దైనందిన జీవితంలోనే కాకుండా, మరణానంతర జీవితంలో కూడా పిల్లులకు అత్యంత ప్రాధాన్యత ఇచ్చేవారు. ఇంతకీ ఈజిప్టు ప్రజలు పిల్లులను దేవుళ్లుగా ఎందుకు చూసేవారో ఈ కథనంలో తెలుసుకుందాం.
ప్రాచీన ఈజిప్టులో పిల్లులను పూజించడం వెనుక బలమైన ఆధ్యాత్మిక, ఆర్థిక భౌగోళిక కారణాలు ఉన్నాయి. ముఖ్యంగా ‘బాస్టెట్’ అనే పిల్లి తల కలిగిన దేవతను వారు ఆరాధించేవారు. అలాగే ఎడారి దేశమైన ఈజిప్టులో విషసర్పాలు, ఎలుకల నుండి ప్రజలను కాపాడటంలో పిల్లులు కీలక పాత్ర పోషించాయి. ఒకవేళ పొరపాటున కూడా ఎవరైనా పిల్లిని చంపితే వారికి మరణశిక్ష పడేదంటే పిల్లులకు అక్కడ ఎంతటి రక్షణ ఉండేదో అర్థం చేసుకోవచ్చు. ఆ ఆసక్తికరమైన చారిత్రక రహస్యాలు ఇప్పుడు వివరంగా చూద్దాం.
1. బాస్టెట్ దేవతతో అనుబంధం
ఈజిప్షియన్ పురాణాల ప్రకారం ‘బాస్టెట్’ అక్కడి ప్రజలకు అత్యంత ప్రియమైన దేవత. ఈమెను పిల్లి తల కలిగిన స్త్రీ రూపంలో లేదా పూర్తిగా పిల్లి రూపంలో పూజించేవారు. బాస్టెట్ దేవత ఇల్లు, మాతృత్వం, ప్రసవం, సంగీతం, ఆనందం రక్షణకు అధిపతి. ఇంట్లో పిల్లులను పెంచుకోవడం వల్ల బాస్టెట్ దేవత ఆశీస్సులు, రక్షణ లభిస్తాయని ఈజిప్షియన్లు బలంగా విశ్వసించేవారు.
2. ఆహార నిల్వల సంరక్షణ
ప్రాచీన ఈజిప్టు ఆర్థిక వ్యవస్థ నైలు నది వెంబడి జరిగే వ్యవసాయం, ముఖ్యంగా గోధుమల సాగుపై ఆధారపడి ఉండేది. పండించిన ధాన్యాన్ని పెద్ద పెద్ద గిడ్డంగుల్లో నిల్వ చేసేవారు. అయితే ఈ ధాన్యగారాలపై ఎలుకలు దాడి చేసి పంటను నాశనం చేసేవి. పిల్లులు సహజంగానే ఈ ఎలుకలను వేటాడి, ఆహార నిల్వలు పాడవకుండా కాపాడేవి. ఈ రకంగా అవి ఈజిప్టు ఆర్థిక రక్షకులుగా మారాయి.
3. విషపూరిత జీవుల నుండి రక్షణ
ఈజిప్టు చుట్టూ ఎడారి ఉండటం వల్ల నాగుపాములు, తేళ్లు వంటి భయంకరమైన విషపూరిత జీవులు ఇళ్లలోకి వచ్చేవి. పిల్లులు తమ అద్భుతమైన వేట నైపుణ్యంతో, ఎలాంటి భయం లేకుండా ఆ పాములపై దాడి చేసి చంపేసేవి. ఈ నిర్భయత్వాన్ని చూసిన ఈజిప్షియన్లు పిల్లులకు అతీంద్రియ లేదా మాయా శక్తులు ఉన్నాయని నమ్మడం ప్రారంభించారు.
పిల్లులను చంపితే మరణశిక్ష!
ప్రాచీన ఈజిప్టులో పిల్లులకు అత్యున్నత చట్టపరమైన, సామాజిక రక్షణ ఉండేది. పిల్లిని పవిత్ర జంతువుగా భావించడం వల్ల, దానికి ఎలాంటి హాని తలపెట్టినా తీవ్రమైన నేరంగా పరిగణించేవారు. చారిత్రక ఆధారాల ప్రకారం.. ఎవరైనా పొరపాటున లేదా కావాలని పిల్లిని చంపితే, వారికి సమాజంలో అత్యంత కఠినమైన శిక్షలు విధించేవారు. కొన్ని సందర్భాల్లో నిందితుడికి నేరుగా మరణశిక్ష కూడా అమలు చేసేవారు.
చరిత్రలో జంతువులను ప్రకృతి శక్తులుగా, దైవ స్వరూపాలుగా ఆరాధించడం కొత్తేమీ కాదు. కానీ ప్రాచీన ఈజిప్షియన్లు పిల్లుల వల్ల తాము పొందిన లబ్ధిని (ఆహార రక్షణ, ప్రాణ రక్షణ) దైవిక వరంగా భావించి వాటికి గుళ్లు కట్టి పూజించడం నిజంగా విశేషం.
గమనిక: ఈ కథనంలోని అంశాలు అంతర్జాతీయ చారిత్రక పరిశోధనలు, పురావస్తు ఆధారాలు మరియు ప్రాచీన ఈజిప్టు పురాణాల ఆధారంగా అందించబడ్డాయి.