పుట్టుకతో ఆడ.. తర్వాత మగగా మారే చేప గురించి తెలుసా? లింగ మార్పిడి ప్రక్రియ ఇదే
పెర్లీ రేజర్ఫిష్ చేపలు పుట్టుకతో ఆడగా ఉంటాయి. జీవితంలో ఒక దశలో పరిస్థితులకు అనుగుణంగా సహజంగా మగగా మారుతాయి. ఆధిపత్య మగ చేపను చేపల వేట ద్వారా తొలగిస్తే, పెద్ద ఆడ చేప మగ పాత్రను చేపడుతుంది. అధిక చేపల వేట కారణంగా ఈ లింగ మార్పు ముందుగానే జరుగుతున్నట్లు పరిశోధనలు సూచిస్తున్నాయి.
సముద్రంలో కొన్ని చేపలు మనకు తెలిసిన సాధారణ జీవశాస్త్ర నియమాలకు భిన్నంగా జీవిస్తాయి. వాటిలో పెర్లీ రేజర్ఫిష్ ఒకటి. ఈ చేపలన్నీ పుట్టుకతో ఆడవే. అయితే జీవితంలో ఒక దశకు చేరుకున్న తర్వాత మగగా మారుతాయి. ఇప్పుడు ఈ సహజ ప్రక్రియపై మానవుల చేపల వేట ప్రభావం చూపుతోందని తాజా పరిశోధనలు సూచిస్తున్నాయి.
పుట్టినప్పుడు ఆడ.. పెద్దయ్యాక మగ
పెర్లీ రేజర్ఫిష్ ప్రోటోజైనస్ హెర్మాఫ్రొడైట్. అంటే మొదట ఆడగా జీవించి, అవసరమైన పరిస్థితులు ఏర్పడినప్పుడు మగగా మారుతుంది. చిన్న ఆడ చేపలు సముద్రపు ఇసుక ప్రాంతాల్లో తమ తమ పరిధుల్లో జీవిస్తాయి. ఒక ప్రాంతంలో సాధారణంగా ఒక పెద్ద, ఆధిపత్య మగ చేప అనేక ఆడ చేపలతో జతకడుతుంది. ఆ మగ చేప కేవలం సంతానోత్పత్తిలోనే కీలకం కాదు. తన పరిధిలో ఆధిపత్యాన్ని కొనసాగించడం ద్వారా చిన్న ఆడ చేపలు ముందుగానే మగగా మారకుండా సామాజిక వ్యవస్థను కూడా నియంత్రిస్తుంది.
మగ చేపను పట్టుకుంటే ఏం జరుగుతుంది?
ఇక్కడే అసలు సమస్య మొదలవుతుంది. ఈ చేపలలో పెద్దది, ఆధిపత్యం కలిగిన మగదే సాధారణంగా ఎరను ముందుగా పట్టుకునే అవకాశం ఎక్కువ. దీంతో చేపల వేట ఎక్కువగా జరిగే ప్రాంతాల్లో మగ చేపలు తొలగిపోతున్నాయి. మగ చేప కనిపించకుండా పోయినప్పుడు, గుంపులోని పెద్ద ఆడ చేపల్లో ఒకటి మగ పాత్రను చేపట్టడం ప్రారంభిస్తుంది. అంటే మగ చేపల కొరతను భర్తీ చేసేందుకు ఆడ చేపలు సహజంగా లింగ మార్పు చేసుకుంటాయి.
కానీ ఇప్పుడు లింగ మార్పు ముందే జరుగుతోంది!
తాజా పరిశోధనల్లో ఆందోళన కలిగించే విషయం బయటపడింది. అధిక చేపల వేట ఉన్న ప్రాంతాల్లో ఈ చేపలు చిన్న వయసులోనే, చిన్న పరిమాణంలోనే మగగా మారుతున్నట్లు ఆధారాలు కనిపిస్తున్నాయి. బాలెరిక్ దీవుల ప్రాంతాల్లో కొన్ని రోజుల్లోనే మొత్తం రేజర్ఫిష్ జనాభాలో భారీగా చేపలు పట్టుబడుతున్న సందర్భాలు నమోదయ్యాయి. ఇది కేవలం సంఖ్య తగ్గడం మాత్రమే కాదు. సహజంగా పెద్దదిగా ఎదిగి మగగా మారాల్సిన చేపలు ముందుగానే లింగం మార్చుకుంటే, వాటి పెరుగుదల, సంతానోత్పత్తి, జనాభా నిర్మాణం ప్రభావితమయ్యే అవకాశం ఉంది.
DNAలోనూ మార్పుల సంకేతాలు
ఇటీవలి పరిశోధనలో మరో ఆసక్తికరమైన అంశం వెలుగులోకి వచ్చింది. రక్షిత ప్రాంతాల్లోని చేపలతో పోలిస్తే, ఎక్కువగా చేపల వేట జరిగే ప్రాంతాల్లోని పెర్లీ రేజర్ఫిష్లలో జీన్ కార్యకలాపాలను ప్రభావితం చేసే ఎపిజెనెటిక్ మార్పులు కనిపించినట్లు నివేదికలు చెబుతున్నాయి. ఎపిజెనెటిక్ మార్పులు అంటే DNA కోడ్నే మార్చడం కాకుండా, కొన్ని జన్యువులు ఎలా పనిచేస్తాయో ప్రభావితం చేసే మార్పులు. అయితే ఈ మార్పులకు చేపల వేట ఒక్కటే కారణమని నిర్ధారించడానికి మరింత పరిశోధన అవసరం.
ఇది ఒక్క రేజర్ఫిష్ సమస్య కాదు
చేపల వేట వల్ల లింగ మార్పు సమయం, పరిమాణం మారడం గురించి ఇతర లింగ మార్పిడి చేపల్లోనూ పరిశోధనలు ఉన్నాయి. ఉదాహరణకు మరో లింగ మార్పిడి చేపపై జరిగిన అధ్యయనంలో అధిక చేపల వేట ఉన్న ప్రాంతాల్లో ఆడ చేపలు చిన్న వయసులోనే, చిన్న పరిమాణంలోనే మగగా మారినట్లు గుర్తించారు.
సముద్ర రక్షిత ప్రాంతాల ప్రాధాన్యం
అందుకే సముద్రంలో రక్షిత ప్రాంతాల కీలకంగా మారుతున్నాయి. చేపల వేట నుంచి రక్షణ ఉన్న ప్రాంతాల్లో పెద్ద మగ చేపలు సహజంగా జీవించి, తమ సామాజిక వ్యవస్థను కొనసాగించగలవు. ఇలాంటి ప్రాంతాలు కేవలం చేపల సంఖ్యను పెంచడమే కాకుండా, వాటి సహజ జీవచక్రం, జన్యు వైవిధ్యం, భవిష్యత్ అనుకూలతను కాపాడే ప్రాంతాలుగా పనిచేయవచ్చని శాస్త్రవేత్తలు సూచిస్తున్నారు. అంటే.. చేపను పట్టుకోవడం వల్ల ఒక జీవి మాత్రమే చనిపోవడం కాదు. ఆ చేపల మొత్తం సామాజిక వ్యవస్థ, లింగ నిష్పత్తి, సంతానోత్పత్తి విధానం కూడా మారిపోయే అవకాశం ఉంది. పెర్లీ రేజర్ఫిష్ కథ.. సముద్ర జీవులపై మనుషుల ప్రభావం ఎంత లోతుగా ఉంటుందో చెప్పే మరో ఉదాహరణ.