ఫిట్నెస్, వెయిట్ లాస్ కోసం భోజనం మానేస్తున్నారా? మీరు ప్రమాదంలో ఉన్నట్టే
మనం క్రమం తప్పకుండా భోజనం మానేసినప్పుడు, మన శరీరం అప్రమత్తమై శక్తిని ఖర్చు చేయడానికి బదులుగా నిల్వ చేసుకోవడం ప్రారంభిస్తుంది. దీనివల్ల జీవక్రియ (మెటబాలిజం) నెమ్మదిస్తుంది, ఫలితంగా వర్కౌట్లు చేయడం కష్టతరమవుతుంది. ఎనర్జీ లెవెల్స్ పడిపోయి, తీవ్రమైన మూడ్ స్వింగ్స్, నీరసం మరియు జంక్ ఫుడ్ తినాలనే కోరికలు పెరుగుతాయి. మరోవైపు, శరీరానికి అవసరమైన ప్రోటీన్ అందనప్పుడు, కండరాలు క్షీణించే ప్రమాదం ఉంది. తద్వారా మీరు బలం కోల్పోయి, శరీరం బలహీనంగా మారుతుంది.
చాలామంది ఫిట్నెస్ ప్రయాణాన్ని ప్రారంభించగానే త్వరగా బరువు తగ్గాలనే ఆత్రుతతో భోజనం మానేయడం లేదా తక్కువ తినడం వంటి మార్గాలను ఎంచుకుంటారు. బ్రేక్ఫాస్ట్ స్కిప్ చేయడం, లంచ్ ఆలస్యం చేయడం లేదా కేవలం కాఫీలతో రోజు గడిపేయడం వంటి అలవాట్లు ఫిట్నెస్కు దారితీయకపోగా, మీ ఆరోగ్య పురోగతిని మరింత మందగింపజేస్తాయని నిపుణులు హెచ్చరిస్తున్నారు. ఫిట్నెస్ నిపుణురాలు దీప్తి శర్మ సూచనల ప్రకారం, బరువు తగ్గడం అనేది కేవలం జిమ్లో కష్టపడటంపైనే కాకుండా, సరైన పోషకాహారం, నిద్ర, ఒత్తిడి నిర్వహణ మరియు శారీరక రికవరీపై ఆధారపడి ఉంటుంది.
అతిగా తినే ప్రమాదం..
పగటిపూట భోజనం మానేసే వారు సాయంత్రం వేళల్లో విపరీతమైన ఆకలికి గురవుతారు. దీనివల్ల రాత్రిపూట నియంత్రణ కోల్పోయి అతిగా తినడం లేదా అనారోగ్యకరమైన ఫాస్ట్ ఫుడ్స్ వైపు మొగ్గు చూపడం జరుగుతుంది. ఈ క్రమరహిత ఈటింగ్ ప్యాటర్న్ మీ జీర్ణవ్యవస్థను పూర్తిగా దెబ్బతీస్తుంది. ఫిట్నెస్ను సాధించాలంటే పస్తులుండటం పరిష్కారం కాదు, క్రమశిక్షణతో కూడిన జీవనశైలే కీలకం.
భోజనం మానేయడానికి బదులుగా, ప్రోటీన్, ఫైబర్ (పీచు పదార్థం), ఆరోగ్యకరమైన కొవ్వులు మరియు సంక్లిష్ట కార్బోహైడ్రేట్లు కలిగిన సమతుల్య ఆహారాన్ని నిర్ణీత సమయాల్లో చిన్న చిన్న భాగాలుగా తీసుకోవాలి. ఇవి రోజంతా శక్తిని స్థిరంగా ఉంచి, మీ వర్కౌట్ పనితీరును మెరుగుపరుస్తాయి. క్రాష్ డైట్లు, డిటాక్స్ టీల వంటి తాత్కాలిక పద్ధతుల కంటే, దీర్ఘకాలంలో శరీరం బలంగా, ఆరోగ్యంగా మారేలా పౌష్టికాహారాన్ని అందించడమే అసలైన ఫిట్నెస్. సరైన పోషకాహారం, నిలకడైన జీవనశైలితోనే మీరు కోరుకున్న ఆరోగ్యకరమైన ఫిట్నెస్ను పొందగలరు. ఆకలిని నియంత్రించడం అంటే మానేయడం కాదు, శరీరానికి అవసరమైన ఇంధనాన్ని సరైన సమయంలో అందించడమేనని గుర్తుంచుకోండి.