Raj Tarun: ఓటీటీలోకి వస్తోన్న రాజ్ తరుణ్ యాక్షన్ డ్రామా.. స్ట్రీమింగ్ ఎక్కడంటే..

Purushothamudu Movie

ఇటీవల కొద్ది రోజులుగా టాలీవుడ్ హీరో రాజ్ తరుణ్ పేరు వార్తలలో మారుమోగుతున్న సంగతి తెలిసిందే. వ్యక్తిగత విషయాలతో నిత్యం నెట్టింట ట్రెండ్ అయిన ఈ హీరో.. అటు బ్యాక్ టూ బ్యాక్ సినిమాలతో అడియన్స్ ముందుకు వచ్చాడు. చాలాకాలం తర్వాత రాజ్ తరుణ్ హీరోగా నటించిన సినిమా పురుషోత్తముడు. ఈ చిత్రానికి మిశ్రమ స్పందన వచ్చింది. జూలై 26న థియేటర్లలో విడుదలైన ఈ మూవీ ఆశించినంతగా మెప్పించలేకపోయింది. యాక్షన్ కామెడీ డ్రామాగా వచ్చిన ఈ చిత్రానికి రామ్ భీమన దర్శకత్వం వహించారు. ఈ సినిమా ఇప్పుడు ఓటీటీలోకి రాబోతుంది. థియేటర్లలో అంతగా ఆకట్టులేకపోయిన ఈ సినిమా స్ట్రీమింగ్ డేట్ ఫిక్సైంది. తాజా సమాచారం ప్రకారం ఈ సినిమా ఆగస్ట్ 29న ప్రముఖ ఓటీటీ ప్లాట్ ఫామ్ ఆహాలో స్ట్రీమింగ్ కానుంది. ఈ విషయాన్ని అధికారికంగా ప్రకటించింది ఆహా.

“ధైర్యానికి ఉన్న శక్తిని చూసేందుకు రెడీగా ఉండండి. ఆగస్ట్ 29న పురుషోత్తముడు ఆహాలో ప్రీమియర్ కానుంది” అంటూ ట్వీట్ చేసింది ఆహా ఓటీటీ. ఈ మూవీలో రాజ్ తరుణ్ సరసన హాసినీ సుధీర్ కథానాయికగా నటించింది. ప్రకాష్ రాజ్, రమ్యకృష్ణ, మురళీశర్మ, బ్రహ్మానందం కీలకపాత్రలు పోషించగా రామ్ భీమన ఈ చిత్రాన్ని తెరకెక్కించారు. సీఈవో కావాలనుకునే యువకుడు 100 రోజుల్లో సామాన్యుడిలా జీవితం గడపడం అనే అంశం చుట్టూ ఈ సినిమా స్టోరీ సాగుతుంది. శ్రీశ్రీదేవి ప్రొడక్షన్ బ్యానర్ పై రమేశ్ తేజవత్, ప్రకాష్ తేజవత్ కలిసి ఈ చిత్రాన్ని నిర్మించగా గోపీ సుందర్ సంగీతం అందించారు.

ఈ సినిమాతోపాటు రాజ్ తరుణ్ హీరోగా నటించిన మరో సినిమా తిరగబడరా సామి. ఆగస్ట్ 2న థియేటర్లలో విడుదలైన ఈ మూవీ కూడా బాక్సాఫీస్ వద్ద బోల్తా కొట్టింది. ఇందులో మాల్వీ మల్హోత్రా కథానాయికగా నటించింది. ఇదిలా ఉంటే.. అటు రాజ్ తరుణ్, లావణ్య కేసు ఇంకా కొనసాగుతూనే ఉంది.

మరిన్ని సినిమా వార్తల కోసం ఇక్కడ క్లిక్ చేయండి.