అదిరిపోయే చీర కట్టులో స్టార్..! ట్రైలర్ లాంచ్ ఈవెంట్లో ఆకట్టుకునే స్టైల్లో బ్యూటీ
మరాఠీ సంప్రదాయానికి నిలువుటద్దంలా నిలిచింది నటి జెనీలియా. తన భర్త రితేష్ ప్రతిష్టాత్మక చిత్రం 'రాజా శివాజీ' ట్రైలర్ లాంచ్లో పింక్ కలర్ నౌవారీ చీరలో మెరిసిపోయిన ఈ భామ, భారతీయ చేనేత వైభవాన్ని ప్రపంచానికి చాటిచెప్పింది. తన మూలాలను ప్రతిబింబించేలా ఆమె ఎంచుకున్న ఆ అద్భుతమైన వేషధారణ విశేషాలేంటో తెలుసుకుందాం..
‘రాజా శివాజీ’ ట్రైలర్ లాంచ్ వేడుకలో నటి జెనీలియా దేశ్ముఖ్ అందరి దృష్టిని ఆకర్షించింది. తన భర్త రితేష్ దేశ్ముఖ్తో కలిసి నటించిన ఈ ప్రతిష్టాత్మక చిత్రం ప్రమోషన్స్ కోసం ఆమె పక్కా మహారాష్ట్రీయ సంప్రదాయ శైలిని ఎంచుకుంది. సంస్కృతిని మించిన ఫ్యాషన్ స్టేట్మెంట్ మరొకటి ఉండదని నిరూపిస్తూ, జెనీలియా నౌవారీ చీరలో దేవతలా మెరిసిపోయింది. తన మూలాలకు దగ్గరగా ఉండే ఈ వేషధారణలో ఆమె చూపిన హుందాతనం నెటిజన్లను విశేషంగా ఆకట్టుకుంటోంది. తన లుక్ గురించి ఇన్ స్టాగ్రామ్లో స్పందిస్తూ, “నా మనసుకు దగ్గరగా ఉండే నౌవారీ చీరను ధరించాను. ఇది నా మూలాలకు గుర్తు. హిమ్రూ నేత, అహింసా సిల్క్ దీనిని మరింత ప్రత్యేకం చేశాయి” అని జెనీలియా పేర్కొన్నారు.
హిమ్రూ నేత రాజసం
జెనీలియా ఈ వేడుక కోసం ‘రైరీ బై శ్రేయా దేశ్ముఖ్’ బ్రాండ్ రూపొందించిన సాఫ్ట్ పింక్ కలర్ నౌవారీ చీరను ధరించారు. చారిత్రక ప్రాధాన్యత కలిగిన ‘హిమ్రూ’ నేతతో, అహింసా సిల్క్ ఫ్యాబ్రిక్తో తయారైన ఈ చీర రాజసాన్ని ఉట్టిపడేలా చేసింది. దీనికి జతగా భారీ బంగారు రంగు ఎంబ్రాయిడరీ ఉన్న పింక్ దుపట్టాను ఆమె ధరించారు. ఈ కలర్ కాంబినేషన్ జెనీలియాకు ఒక సున్నితమైన మరియు శక్తివంతమైన రూపాన్ని ఇచ్చింది. కేవలం అందం కోసమే కాకుండా, చేనేత కళాకారుల నైపుణ్యాన్ని గౌరవించేలా ఆమె ఈ ఎంపిక చేయడం విశేషం.
సంప్రదాయ అభరణాలతో
మరాఠీ సంప్రదాయ లుక్ అంటేనే ఆభరణాల ప్రత్యేకత. జెనీలియా తన హెరిటేజ్ లుక్ను పూర్తి చేయడానికి ‘నాథ్’ (ముక్కు పుడక), ఆకుపచ్చని చంద్రకోర్ బిందీని ఎంచుకున్నారు. సన్జానీ, రాబ్తా బై రాహుల్ వంటి బ్రాండ్ల నుండి సేకరించిన భారీ లేయర్డ్ నెక్లెస్లు, చేతులకు నిండుగా గాజులు ధరించి ఒక అసలైన మరాఠీ ఇల్లాలులా కనిపించారు. క్లాసిక్ బన్ హెయిర్ స్టైల్, పూల అలంకరణ ఆమె గ్రేస్ను మరింత పెంచాయి.
‘అపరాజిత టూర్’ రూపొందించిన ట్రెడిషనల్ శాండల్స్ ఈ లుక్కు ఫినిషింగ్ టచ్ ఇచ్చాయి. స్టైలిస్ట్ కరిష్మా గులాటి ఆధ్వర్యంలో జెనీలియా మేకోవర్ అద్భుతంగా కుదిరింది. రితేష్ దేశ్ముఖ్ ఛత్రపతి శివాజీ మహారాజ్ పాత్రలో కనిపిస్తుండగా, జెనీలియా ఆయన భార్య ‘సాయిబాయి’ పాత్రను పోషిస్తున్నారు. ట్రైలర్లో యుద్ధ సన్నివేశాలు, శివాజీ మహారాజ్ స్వరాజ్య పోరాటం ప్రేక్షకుల్లో ఉత్కంఠను రేపుతున్నాయి.