Uttej: ఆ హీరో దేవుడు.. గొప్ప సినిమాలు చేశారు.. ఆయన మూవీస్ డిక్షనరీ లాంటివి.. నటుడు ఉత్తేజ్..
నటుడు ఉత్తేజ్ తన మూడు దశాబ్దాల సినీ ప్రస్థానం గురించి, నటులు పెట్టుబడులు పెట్టాల్సిన ఆవశ్యకత గురించి పంచుకున్నారు. అలాగే టాలీవుడ్ సీనియర్ హీరోను దేవుడు అని అన్నారు ఉత్తేజ్. అలాగే తన సినీ ప్రయాణంలో ఎదురైన సవాళ్లను వెల్లడించారు. ప్రస్తుతం ఉత్తేజ్ నటుడిగా, సహయ నటిగా మెప్పిస్తున్నారు.
నటుడు ఉత్తేజ్ తన మూడు దశాబ్దాల సినీ ప్రస్థానం, చిత్ర పరిశ్రమలోని ఆర్థిక విషయాలు, అలాగే దివంగత మహానటుడు, మాజీ ముఖ్యమంత్రి నందమూరి తారక రామారావు (ఎన్టీఆర్)పై తన అపారమైన గౌరవం గురించి ఓ ఇంటర్వ్యూలో వెల్లడించారు. రామ్ గోపాల్ వర్మ దర్శకత్వంలో 1989లో విడుదలైన శివ చిత్రంతో వెండితెరకు పరిచయమైన ఉత్తేజ్, ఫలక్నామా దాస్ వరకు తన ప్రయాణాన్ని గుర్తు చేసుకున్నారు. దాదాపు 25-30 సంవత్సరాలుగా నిరంతరం చిత్ర పరిశ్రమలో కొనసాగుతున్నందుకు సంతోషంగా ఉందని ఆయన పేర్కొన్నారు. “నాకు ఎక్కడా బ్రేక్ రాలేదు. ప్రొడ్యూసర్ డబ్బుతో బతుకుతున్నాను, ఎంతో మంది దర్శకులతో వేషాలతో ఉంటున్నాను. సినిమానే, నాకు ఇంకా వేరే పక్క వ్యాపారం అస్సలు లేదు. బతికితే దీంట్లోనే బతుకుతాను, చచ్చిపోతే దీంట్లోనే చచ్చిపోతాను అనిపిస్తా ఉంటుంది,” అని తన అభిప్రాయాన్ని వెల్లడించారు. తాను మంచి నటుడినని నమ్ముతానని తెలిపారు.
నేటి తరం నటీనటులు కేవలం సినిమాలపై ఆధారపడకుండా, ఇతర వ్యాపారాలు, పెట్టుబడులపై దృష్టి పెట్టడాన్ని ఉత్తేజ్ అభినందించారు. నాగేశ్వరరావు, రామారావు వంటి గొప్ప నటులు స్టూడియోలు, భూములు, భవనాలపై పెట్టుబడులు పెట్టి భవిష్యత్తుకు భద్రత కల్పించుకున్నారని ఆయన గుర్తు చేశారు. “మధ్యలో ఒక జనరేషన్ మొత్తం పాడైపోయింది, కొంత. ఏదీ కొనక, ఏదీ చేయక,” అని పేర్కొన్నారు. రామానాయుడు గారు సైతం స్టూడియోలను నిర్మించి వందలాది మందికి ఉపాధి కల్పించారని ఉదహరించారు. ఎన్టీఆర్ ను ఉత్తేజ్ దేవుడిగా అభివర్ణించారు. ఎన్టీఆర్ గొప్ప సినిమాలు ఇచ్చి వెళ్ళారని, తనే నిర్మించి, తనే దర్శకత్వం వహించారని కొనియాడారు. ఏదైనా చరిత్ర కావాలంటే ఎన్టీఆర్ సినిమాలను ఓపెన్ చేస్తామని, కొత్త దర్శకులకు, నటులకు ఆయన సినిమాలు డిక్షనరీ లాంటివని ఉత్తేజ్ తెలిపారు. తన సంపాదన మొత్తం సినిమాలకే పెట్టి వెళ్లిన మహోన్నత వ్యక్తి ఎన్టీఆర్ అని ఆయన ప్రశంసించారు.
ఎన్టీఆర్ జీవితంపై ఇటీవల విడుదలైన మూడు చిత్రాలైన ఎన్టీఆర్: కథానాయకుడు, ఎన్టీఆర్: మహానాయకుడు, లక్ష్మీస్ ఎన్టీఆర్లను చూశానని ఉత్తేజ్ వెల్లడించారు. “ఒక్కొక్కటి ఒక్కొక్క ధోరణి, వాళ్ళ-వాళ్ళ పాయింట్ ఆఫ్ వ్యూ అది,” అని ఆయన వివరించారు. చంద్రుడిని ఒక్కొక్కరు ఒక్కో కోణం నుంచి చూసినట్లుగా, ఈ చిత్రాలు ఎన్టీఆర్ జీవితాన్ని వేర్వేరు దృక్పథాల నుంచి ఆవిష్కరించాయని తెలిపారు. లక్ష్మీస్ ఎన్టీఆర్ చిత్రం లక్ష్మీపార్వతి గారి పాయింట్ ఆఫ్ వ్యూలో వచ్చిందని, వారిద్దరి మధ్య సంబంధం, భావోద్వేగాలు, వారు ఏం చెప్పుకునేవారు అనే అంశాలను ప్రధానంగా చూపించారని ఉత్తేజ్ అన్నారు.
ఎన్టీఆర్: కథానాయకుడు, ఎన్టీఆర్: మహానాయకుడు చిత్రాలు “ఒరిజినల్ రామారావు గారిని” చూపించడానికి ప్రయత్నించాయని ఉత్తేజ్ పేర్కొన్నారు. ఎన్టీఆర్ సైకిల్ మీద పాలు అమ్ముకున్న దగ్గర నుండి, చెన్నైలో ఆయన కష్టాల దగ్గర నుంచి, ఆయన పర్ఫెక్షన్, డెడికేషన్, డిసిప్లిన్, ప్రొఫెషనలిజం, దేవుడి పాత్రలు వేస్తే నేల మీద పడుకొని, మాంసాహారం తినకుండా నిష్టగా ఉండటం వంటి విషయాలను ఆ చిత్రాలు చూపించాయన్నారు. ఎన్టీఆర్ సినిమాలు కొంచెం సమయం తీసుకుని ఉంటే, ప్రత్యేకించి బాలకృష్ణ గారికి ఎన్టీఆర్ తో రక్తసంబంధం ఉన్నందున, మరింత గొప్ప చిత్రంగా రూపొంది ఉండేవని ఉత్తేజ్ అన్నారు. “ఎన్టీఆర్ దేవుడు! ప్రపంచానికే తెలుగు తేటలు చెప్పిన అతను. దేవుడి సినిమా ఫ్లాప్ అవ్వొద్దు. కదా? దేవుడి సినిమా ఏమాత్రమైనా సెకండ్ టాక్ ఉండకూడదు. దేవుడి సినిమా దేవుడి సినిమా లాగే ఉండాలి. ఒక లవకుశ నడిచినట్టు నడవాలి,” అని వ్యాఖ్యానించారు. లక్ష్మీస్ ఎన్టీఆర్ చిత్రం హిట్ అయ్యిందని, అది తన లక్ష్యాన్ని ప్రేక్షకులకు చేరవేసిందని ఉత్తేజ్ అంగీకరించారు.