మళ్ళీ తెరపైకి ప్రత్యేక హోదా .. ఈసారి ఎవరంటే ?

ఏపీ ప్రత్యేక హోదా అంశం మరోసారి తెరమీదికొస్తోంది. ఎన్నికలకు ముందు అప్పటి పాలక, ప్రతిపక్షాలు ప్రత్యేక హోదా అంశాన్ని పలు దఫాలుగా, వివిధ రకాలు ప్రస్తావించాయి. ఎన్నికలు ముగిసాక వారు వీరయ్యారు.. వీరు వారయ్యారు. ప్రతిపక్ష నేతగా వున్న జగన్మోహన్ రెడ్డి ముఖ్యమంత్ర పీఠాన్ని అధిరోహించారు. అప్పటి ముఖ్యమంత్రి ఇప్పుడు ప్రతిపక్షానికి పరిమితమై పార్టీ నేతలను రక్షించుకునే పనిలో పడ్డారు.

ఎన్నికలు ముగిసిన దాదాపు 5 నెలలు కావస్తోంది. అటు ప్రతిపక్షంగానీ.. ఇటు అధికార పక్షంగానీ ప్రత్యేక హోదాపై నోరు మెదపడం లేదు. ప్రత్యేక హోదాపై అప్పట్లో ఊదరగొట్టిన ఓ సినీ నటుడైతే ఇటు అతాపతా లేకుండా పోయారు. ఈ నేపథ్యంలో మొదట్నించి తెలుగు భాష కోసం.. తెలుగు ప్రజల కోసం ప్రత్యేక ఉద్యమాలకు ఊపిరి పోసిన ఏపీ ప్రత్యేక హోదా, విభజన హామీల సాదన సమితి అధ్యక్షుడు చలసాని శ్రీనివాస్ మరోసారి ప్రత్యేక హోదాపై గళం విప్పారు.

ముఖ్య మంత్రి, ప్రతి పక్ష నాయకులు ఎందుకు విభజన హామీలు కోసం పోరాటం చేయడం లేదని చలసాని ప్రశ్నించారు. కేంద్రం పై విరోధం పెట్టుకోమని చెప్పడంలేదు.. కానీ హామీలు అమలు కాకపోతే రూపాయి కూడా ఉత్తరాంధ్ర, రాయలసీమలకు రావన్న అంశాన్ని రాజకీయ నేతలు గుర్తించాలని ఆయనన్నారు. విశాఖలో మంగళవారం నాడు మీడియాతో ఆయన మాట్లాడారు. ఆంధ్రబ్యాంకు లేకుండా చేస్తున్న కేంద్రంపై ఆంధ్ర, తెలంగాణ ప్రజలు కలిసి పోరాడాలని ఆయన పిలుపునిచ్చారు. మిగతా రాష్ట్రాల తరహాలో జెఈఈ పరీక్షలు తెలుగులో కూడా రాసే అవకాశమివ్వాలని, ఈ అంశాన్ని వచ్చే పార్లమెంటు సమావేశాల్లో తెలుగు రాష్ట్రాల ఎంపీలు గట్టి స్వరంతో వినిపించాలని ఆయనంటున్నారు.