బయోకాన్ డ్రగ్ కి చుక్కెదురు..’నో’ చెప్పిన కేంద్రం

కోవిడ్-19 రోగుల చికిత్సలో ఉపయోగపడుతుందంటూ బయోకాన్ కంపెనీ  ఉత్పత్తి చేసిన ‘ఐటోలిజుమాబ్’…మందుకు కేంద్రం నుంచి చుక్కెదురైంది.   నేషనల్ ట్రీట్ మెంట్ ప్రోటోకాల్ లో దీన్ని చేర్చలేదని ఆరోగ్యమంత్రిత్వ శాఖ ప్రకటించింది. సాధారణ స్థాయి నుంచి విషమ స్థితిలో ఉన్న కరోనా వైరస్ రోగులకు ఈ మెడిసిన్ ని వినియోగించేందుకు రెండు వారాల క్రితమే డ్రగ్ కంట్రోలర్ జనరల్ ఆఫ్ ఇండియా ఈ సంస్థను అనుమతించింది. కానీ ఈ మందుకు అనుకూలమైన ఆధారాలు చాలా తక్కువగా ఉన్నాయని కోవిడ్ పై తాము ఏర్పాటు చేసిన  జాతీయ నిపుణుల బృందం అభిప్రాయపడిందని హెల్త్ మినిస్ట్రీ ఓ నోట్ లో తెలిపింది. ట్రయల్ కోసం కేవలం 30 మంది వలంటీర్లను బయోకాన్ వినియోగించిందని పలువురు ఇతర నిపుణులు కూడా పేర్కొన్నారు. కాగా-సోరియాసిస్ వ్యాధికి చికిత్స కోసం ఈ మెడిసిన్ ని గతంలోనే అనుమతించారని, దీన్ని కోవిడ్ రోగులకు కూడా వాడవచ్చునని బయోకాన్ వివరించింది. రోగులకు అత్యవసర సమయాల్లో వాడాలన్న తమ ప్రొసీజర్ కూడా అంతర్జాతీయ నిబంధనలకు లోబడే ఉందని వెల్లడించింది. ఆరోగ్య శాఖ ఏర్పాటు చేసిన నిపుణుల బృందం కోరితే మేము మరిన్ని ఆధారాలను సమర్పిస్తాం.. ప్రోటోకాల్ లో ఈ మెడిసిన్ ని చేర్చే విషయమై పునరాలోచించండి అని బయోకాన్ విజ్ఞప్తి చేసింది. దేశవ్యాప్తంగా దీన్ని వెయ్యిమంది రోగులకు వాడినట్టు తెలిపింది.