న్యూజిలాండ్ స్టూడెంట్ వీసాలో భారీ మార్పులు.. రేపట్నుంచే అమల్లోకి కొత్త నిబంధనలు
న్యూజిలాండ్ అంతర్జాతీయ విద్యార్థులకు శుభవార్త చెప్పింది. పాత్వే స్టూడెంట్ వీసా (PSV)లో కీలక మార్పులు చేస్తూ జూలై 20 నుంచి కొత్త నిబంధనలను అమలు చేయనుంది. ఈ మార్పులతో ఒకే వీసాపై ఐదు సంవత్సరాల వరకు గుర్తింపు పొందిన విద్యాసంస్థల్లో వరుసగా మూడు ప్రోగ్రామ్లను అభ్యసించే అవకాశం మరింత సులభం కానుంది. అలాగే ఇంగ్లిష్ లాంగ్వేజ్ స్టడీ గరిష్ట వ్యవధిని 20 వారాల నుంచి 30 వారాలకు పెంచడంతో పాటు, ఫౌండేషన్, సర్టిఫికేట్, వొకేషనల్ తదితర కోర్సులను ఒకే వీసా మార్గంలో అభ్యసించే వెసులుబాటును కల్పించింది. విద్యార్థులు కోర్సులు మారేందుకు బహుళ వీసాల అవసరాన్ని తగ్గించడం ద్వారా విదేశీ విద్యా ప్రక్రియను మరింత సరళతరం చేయడమే ఈ మార్పుల ప్రధాన ఉద్దేశమని ఇమ్మిగ్రేషన్ న్యూజిలాండ్ వెల్లడించింది..
Updated on: Jul 19, 2026 | 8:02 AM
న్యూజిలాండ్ తన పాత్వే స్టూడెంట్ వీసా (PSV)లో పలు మార్పులను ప్రవేశపెట్టనుంది. జూలై 20 నుంచి కొత్త వీసా విధానం అమలులోకి రానుంది. ఇంగ్లిష్ లాంగ్వేజ్ స్టడీ అర్హత గల స్టడీ పాత్వేలను విస్తరించడం ద్వారా అంతర్జాతీయ విద్యార్థులకు అధ్యయన అవకాశాలను విస్తృతం చేయడం, అలాగే వివిధ విద్యా దశలలో పురోగమిస్తున్న విద్యార్థులకు వీసా నిబంధనలను సులభతరం చేయడం లక్ష్యంగా ఈ మార్పులు చేపడుతున్నారు. పాత్వే స్టూడెంట్ వీసా అనేది ఒకే వీసాపై ఐదు సంవత్సరాల వరకు గుర్తింపు పొందిన విద్యా సంస్థలలో వరుసగా మూడు ప్రోగ్రామ్లలో చేరడానికి అనుమతిస్తుంది. అయితే తాజాగా చేసిన మార్పులు నేథప్యంలో స్టడీ పాత్వేలను ‘ఫ్లెక్సిబుల్’గా మార్చడం జరిగింది. అంటే ఒక అర్హత నుంచి మరొకదానికి మారే విద్యార్థులకు బహుళ వీసా దరఖాస్తుల అవసరాన్ని తగ్గించడమేనని ఇమ్మిగ్రేషన్ న్యూజిలాండ్ వెల్లడించింది.
పాత్వే స్టూడెంట్ వీసా కింద ఇంగ్లిష్ లాంగ్వేజ్ స్టడీ గరిష్ట వ్యవధిలో గణనీయమైన పెరుగుదల ఒక ప్రధాన మార్పు. సవరించిన నిబంధనల ప్రకారం అంతర్జాతీయ విద్యార్థులు ఉన్నత స్థాయి అర్హతలకు వెళ్లే ముందు, తమ ఆంగ్ల ప్రావీణ్యాన్ని మెరుగుపరచుకోవడానికి ఇప్పుడు 20 వారాలకు బదులుగా 30 వారాల వరకు సమయం ఉంటుంది. అంతేకాకుండా వీసా కింద ఉన్న అధ్యయన మార్గాల పరిధిని కూడా విస్తరించారు. జూలై 20 నుంచి పాత్వే స్టూడెంట్ వీసాలో న్యూజిలాండ్ క్వాలిఫికేషన్స్ అండ్ క్రెడెన్షియల్స్ ఫ్రేమ్వర్క్ (NZQCF) లెవెల్స్ 1 నుంచి 4 వరకు, వాటి మధ్య ఉన్న ప్రోగ్రామ్లు ఉంటాయి. దీనివల్ల అంతర్జాతీయ విద్యార్థులు ఒకే వీసా మార్గంలో ఫౌండేషన్, సర్టిఫికేట్, వొకేషనల్, ఇతర సబ్-డిగ్రీలను అభ్యసించడానికి వీలవుతుంది. ఇటీవలి పరిణామాలు విద్యా పురోగతిని క్రమబద్ధీకరించడం, విదేశీ విద్యార్థులకు పరిపాలనాపరమైన అడ్డంకులను తగ్గించడం ద్వారా న్యూజిలాండ్ అంతర్జాతీయ విద్యా రంగాన్ని బలోపేతం చేయాలని లక్ష్యంగా పెట్టుకున్నాయి.
పాత్వే విద్యార్థి వీసా దరఖాస్తు ప్రక్రియ ఎలా ఉంటుందంటే..
ఆమోదిత విద్యా సంస్థ నుంచి ముందుగా అడ్మిషన్ ఆఫర్ను పొందాలి. తర్వాత చెల్లుబాటు అయ్యే పాస్పోర్ట్, నిధుల రుజువు, ఆరోగ్య, నడవడిక ధృవపత్రాలు, వర్తించే చోట ఆంగ్ల భాషా పత్రాలతో సహా నిర్దేశించిన పత్రాలను సమకూర్చుకోవాలి. ఆన్లైన్ పాత్వే స్టూడెంట్ వీసా దరఖాస్తును పూర్తి చేసి, సహాయక పత్రాలను అప్లోడ్ చేయాలి. అవసరమైన వైద్య పరీక్షలు, పోలీస్ క్లియరెన్స్, బయోమెట్రిక్ వంటి వాటిని పూర్తి చేయాలి. వీరి ఆమోదం పొందిన తర్వాత పాత్వే స్టూడెంట్ వీసా సాయంతో న్యూజిలాండ్లో అడుగుపెట్టొచ్చు. అయితే తాజా నిబంధనల ప్రకారం అర్హులైన విద్యార్థుల వీసా షరతులలో ఇకపై నిర్దిష్ట అకడమిక్ విభాగానికి బదులుగా అర్హత రకం, విద్యా సంస్థను పేర్కొంటారు. అంటే పాఠశాల విద్య నుంచి ఉన్నత విద్యకు వెళ్లే విద్యార్థులు, ఇప్పటికే ఉన్న వీసా షరతులకు అనుగుణంగా ఉంటే.. కొత్త వీసా కోసం దరఖాస్తు చేయకుండానే తమ విభాగాలను మార్చుకునే వెసులుబాటు ఉంటుంది.
