ఇండియన్ ఎయిర్ఫోర్స్లో అగ్నివీర్ వాయు ఉద్యోగాలు.. ఇంటర్, డిప్లొమాతో ఛాన్స్.. పూర్తి వివరాలు ఇవే!
Indian Air Force Agniveer Vayu 2027: భారత వాయుసేన అగ్నిపథ్ స్కీం కింద అగ్నివీర్ వాయు (02/2027) బ్యాచ్ నియామకాలకు నోటిఫికేషన్ విడుదల చేసింది. ఇంటర్ లేదా డిప్లొమా అర్హత కలిగిన అభ్యర్థులు జులై 6 నుంచి 26 వరకు ఆన్లైన్లో దరఖాస్తు చేసుకోవచ్చు. అర్హతలు, వయోపరిమితి, జీతం, ఎంపిక విధానం, పరీక్ష తేదీల పూర్తి వివరాలు తెలుసుకోండి.
Updated on: Jun 28, 2026 | 1:23 PM
దేశ సేవ చేయాలనే లక్ష్యంతో ఉన్న యువతకు భారత వాయుసేన మరో గొప్ప అవకాశాన్ని అందిస్తోంది. అగ్నిపథ్ పథకం కింద ‘అగ్నివీర్ వాయు (02/2027) బ్యాచ్’ నియామకాల కోసం ఇండియన్ ఎయిర్ఫోర్స్ అధికారికంగా నోటిఫికేషన్ విడుదల చేసింది. అర్హత కలిగిన అవివాహిత పురుషులు, మహిళలు ఆన్లైన్ ద్వారా దరఖాస్తు చేసుకోవచ్చు. ఎంపికైన అభ్యర్థులు నాలుగేళ్లపాటు భారత వాయుసేనలో అగ్నివీర్గా సేవలందించే అవకాశం పొందుతారు. ఈ నియామక ప్రక్రియకు సంబంధించిన అర్హతలు, వయోపరిమితి, జీతభత్యాలు, ఎంపిక విధానం, ముఖ్యమైన తేదీల వివరాలు ఇప్పుడు తెలుసుకుందాం.
పోస్టుల వివరాలు
- సంస్థ: ఇండియన్ ఎయిర్ఫోర్స్ (Indian Air Force)
- స్కీమ్: అగ్నిపథ్
- పోస్టు: అగ్నివీర్ వాయు (02/2027 బ్యాచ్)
- దరఖాస్తు విధానం: ఆన్లైన్
విద్యార్హతలు
అభ్యర్థులు కింది అర్హతల్లో ఏదో ఒకటి కలిగి ఉండాలి.
మ్యాథమెటిక్స్, ఫిజిక్స్, ఇంగ్లిష్ సబ్జెక్టులతో కనీసం 50 శాతం మార్కులతో ఇంటర్మీడియట్ (10+2) ఉత్తీర్ణత. లేదా సైన్స్ కాని ఇతర సబ్జెక్టులతో ఇంటర్/వొకేషనల్ ఇంటర్ పూర్తి చేసి ఉండాలి. లేదా కంప్యూటర్ సైన్స్, ఎలక్ట్రికల్, ఎలక్ట్రానిక్స్, మెకానికల్, ఆటోమొబైల్, ఇన్ఫర్మేషన్ టెక్నాలజీ, ఇన్స్ట్రుమెంటేషన్ టెక్నాలజీ వంటి విభాగాల్లో మూడేళ్ల ఇంజినీరింగ్ డిప్లొమా ఉత్తీర్ణులై ఉండాలి. నిర్దేశించిన శారీరక, వైద్య ప్రమాణాలను తప్పనిసరిగా పూర్తి చేయాలి.
వయోపరిమితి
2005 జులై 1 నుంచి 2010 జనవరి 1 మధ్య జన్మించిన అభ్యర్థులు దరఖాస్తు చేసుకోవడానికి అర్హులు.
ఎత్తు
పురుషులు, మహిళలు కనీసం 152 సెం.మీ. ఎత్తు కలిగి ఉండాలి. ఈశాన్య రాష్ట్రాలు లేదా ఉత్తరాఖండ్ కొండ ప్రాంతాలకు చెందిన మహిళలకు కనీస ఎత్తు 147 సెం.మీ.గా నిర్ణయించారు.
జీతభత్యాలు
ఎంపికైన అగ్నివీర్లకు ప్రతి ఏడాది జీతం పెరుగుతూ ఉంటుంది.
- మొదటి సంవత్సరం – రూ.30,000
- రెండో సంవత్సరం – రూ.33,000
- మూడో సంవత్సరం – రూ.36,500
- నాలుగో సంవత్సరం – రూ.40,000
అదనంగా రిస్క్ అండ్ హార్డ్షిప్ అలవెన్స్, డ్రెస్ అలవెన్స్, ట్రావెల్ అలవెన్స్ వంటి ఇతర ప్రయోజనాలు కూడా లభిస్తాయి. నాలుగేళ్ల సేవ పూర్తయ్యాక సుమారు రూ.10.04 లక్షల సేవా నిధి (వడ్డీ మినహా) అందజేస్తారు.
ఎంపిక విధానం
అభ్యర్థుల ఎంపిక మూడు దశల్లో జరుగుతుంది.
- ఫేజ్-1: ఆన్లైన్ రాత పరీక్ష
- ఫేజ్-2: ఫిజికల్ ఫిట్నెస్ టెస్ట్, అడాప్టబిలిటీ టెస్ట్-1, అడాప్టబిలిటీ టెస్ట్-2
- ఫేజ్-3: మెడికల్ పరీక్ష
- చివరగా డాక్యుమెంట్ వెరిఫికేషన్ నిర్వహిస్తారు.
దరఖాస్తు ఫీజు: రూ.550 + జీఎస్టీ
ముఖ్యమైన తేదీలు
- ఆన్లైన్ దరఖాస్తుల ప్రారంభం: 2026 జులై 6
- దరఖాస్తుల చివరి తేదీ: 2026 జులై 26
- ఆన్లైన్ పరీక్షలు: 2026 సెప్టెంబర్ 22, 23
ఎలా దరఖాస్తు చేయాలి?
అర్హత కలిగిన అభ్యర్థులు ఇండియన్ ఎయిర్ఫోర్స్ అధికారిక వెబ్సైట్లో ఆన్లైన్ ద్వారా మాత్రమే దరఖాస్తు చేసుకోవాలి. దరఖాస్తు చేసేముందు అధికారిక నోటిఫికేషన్ను పూర్తిగా చదివి, అవసరమైన పత్రాలను సిద్ధం చేసుకోవడం మంచిది. దేశానికి సేవ చేయాలనే సంకల్పం ఉన్న యువతకు ఇది ఒక మంచి అవకాశం. అర్హతలు ఉన్న అభ్యర్థులు చివరి తేదీ వరకు వేచి చూడకుండా ముందుగానే దరఖాస్తు చేసుకోవడం ఉత్తమం.
