దేశం గర్వించదగ్గ విషయం.. 2027 నాటికి భారత్ ఆర్థిక వృద్ధి అంచనా ఎంతో తెలుసా?

India Economic Growth

రాబోయే సంవత్సరాల్లో భారతదేశ ఆర్థిక వ్యవస్థకు శక్తివంతమైన ఊపు రానుందని ప్రముఖ ఆర్థిక సలహా సంస్థ EY ఎకానమీ వాచ్ తాజా నివేదిక వెల్లడించింది. 2027 ఆర్థిక సంవత్సరంలో దేశ వృద్ధి రేటు 6.8 శాతం నుంచి 7.2 శాతం మధ్య ఉండొచ్చని అంచనా వేయడంతో మార్కెట్ వర్గాల్లో ఆశావహ వాతావరణం నెలకొంది. ఈ వేగవంతమైన వృద్ధి ఉపాధి అవకాశాల పెరుగుదలతో పాటు మార్కెట్లో ద్రవ్యత మెరుగుపడే సూచనగా నిపుణులు చెబుతున్నారు.

ప్రభుత్వం ఇటీవల అమలు చేసిన విధాన చర్యలు, మధ్యకాలిక ఆర్థిక అవకాశాలు ఈ వృద్ధి అంచనాలకు ప్రధాన బలంగా నిలిచాయని నివేదిక పేర్కొంది. ద్వైపాక్షిక వాణిజ్య ఒప్పందాల విస్తరణతో భారత వాణిజ్య నెట్‌వర్క్ మరింత బలోపేతం అయిందని EY ఇండియా చీఫ్ పాలసీ అడ్వైజర్ డీకే శ్రీవాస్తవ అభిప్రాయపడ్డారు. ప్రధాన ఆర్థిక సమూహాలతో పెరుగుతున్న వాణిజ్య సంబంధాలు దేశ వృద్ధి అవకాశాలను మరింత ప్రకాశవంతం చేస్తున్నాయని ఆయన తెలిపారు.

దేశంలో కొనసాగుతున్న నిర్మాణాత్మక సంస్కరణలు కూడా ఆర్థిక దిశను మార్చుతున్నాయని నివేదిక స్పష్టం చేసింది. ఈ చర్యలు ప్రపంచ ఆర్థిక వ్యవస్థలో భారత స్థానం మరింత బలపడేందుకు దోహదపడుతున్నాయి. సాధారణ ప్రజలపై ప్రభావం పరంగా చూస్తే, వ్యక్తిగత ఆదాయపు పన్ను, జీఎస్టీ నిర్మాణాల్లో చేసిన మార్పులు కుటుంబాల వినియోగయోగ్య ఆదాయాన్ని పెంచడమే లక్ష్యంగా ఉన్నాయి. ప్రజల చేతుల్లో డబ్బు పెరిగితే వినియోగం పెరిగి, అది ఆర్థిక వృద్ధికి ఊతమిస్తుందని ఆర్థికవేత్తలు చెబుతున్నారు.

అయితే పన్ను మినహాయింపుల వల్ల ప్రభుత్వానికి ఆదాయ లోటు ఒత్తిడి పెరిగే అవకాశముందని నివేదిక హెచ్చరించింది. 2026 ఆర్థిక సంవత్సరం పన్ను వసూళ్ల లక్ష్యాలను పూర్తిగా చేరుకోలేకపోవచ్చని కూడా అంచనా వేసింది. ఇదిలా ఉండగా అభివృద్ధి చెందిన భారతదేశం 2047 లక్ష్య సాధనకు పన్ను-జీడీపీ నిష్పత్తి పెంపు కీలకమని నిపుణులు సూచిస్తున్నారు. అయినప్పటికీ ప్రస్తుత విధానాలపై మార్కెట్ విశ్లేషకులు విశ్వాసంగా ఉన్నారు. ప్రభుత్వం తన ఆర్థిక లోటు లక్ష్యాన్ని చేరుకునే అవకాశాలు ఉన్నాయని వారు భావిస్తున్నారు.

మరిన్ని బిజినెస్‌ వార్తల కోసం ఇక్కడ క్లిక్‌ చేయండి