Forex Reserves: 10 వారాలుగా భారత్ వద్ద కరిగిపోతున్న కరెన్సీ నిల్వలు.. ఆందోళన వ్యక్తం చేస్తున్న నిపుణులు..
Forex Reserves: మన చుట్టుపక్కల ఉన్న శ్రీలంక, బంగ్లాదేశ్ వంటి దేశాలు ఇప్పటికే విదేశీ మారక నిల్వలు తరిగిపోవటం వల్ల ఆర్థిక సంక్షోభంలో కూరుకుపోయాయి. ఇతర దేశాల నుంచి కీలక దిగుమతులకు సైతం చెల్లింపులు చేసేందుకు సరిపడా మారక నిల్వలు లేక కొట్టుమిట్టాడుతున్నాయి.
Forex Reserves: మన చుట్టుపక్కల ఉన్న శ్రీలంక, బంగ్లాదేశ్ వంటి దేశాలు ఇప్పటికే విదేశీ మారక నిల్వలు తరిగిపోవటం వల్ల ఆర్థిక సంక్షోభంలో కూరుకుపోయాయి. ఇతర దేశాల నుంచి కీలక దిగుమతులకు సైతం చెల్లింపులు చేసేందుకు సరిపడా మారక నిల్వలు లేక కొట్టుమిట్టాడుతున్నాయి. గత కొన్ని వారాలుగా భారత్ వద్ద సైతం కరెన్సీ నిల్వలు తరిగిపోవటం చూస్తుంటే పరిస్థితులు అందోళనకరంగా ఉన్నాయని అర్థమౌతోంది. దీనిపై ఆర్థిక వేత్తలు, నిపుణులు ఇప్పటికే ఆందోళన వ్యక్తం చేస్తున్నారు. ఇది ఇలాగే కొనసాగితే దిగుమతులు భారంగా మారతాయని, ఇదే సమయంలో రూపాయి విలువ పతనం అవుతున్నందున దిగుమతులు ఖరీదుగా మారతాయని వారు అంటున్నారు. ఇప్పుడు వాస్తవ పరిస్థితులపై రిజర్వు బ్యాంకి ఇచ్చిన వివరాలు ఎలా ఉన్నాయో పరిశీలిద్దాం..
భారత్ వద్ద విదేశీ మారక నిల్వలు వరుసగా పడిపోతూనే ఉన్నాయి. దీనిని కట్టడి చేసేందుకు రిజర్వు బ్యాంక్ చర్యలు చేపట్టినప్పటికీ ఫలితంలో మాత్రం మార్పు రావటం లేదు. మార్చి 13తో ముగిసిన వారానికి భారత్ వద్ద విదేశీ మారక నిల్వలు 2.67 బిలియన్ డాలర్లు కరిగిపోయి 593.27 బిలియన్ డాలర్లుగా ఉన్నట్లు రిజర్వు బ్యాంక్ నిన్న వెల్లడించింది. అంతకు ముందు వారం మారక నిల్వలు 1.77 బిలియన్ డాలర్లు పడిపోయి 595.95 బిలియన్ డాలర్లు భారత్ వద్ద ఉన్నాయి. మే నెలకు సంబంధించి రిజర్వు బ్యాంక్ విడుదల చేసిన బులిటెన్ ప్రకారం పది నెలల దిగుమతులకు సరిపడా 596 బిలియన్ డాలర్ల విదేశీ మారక నిల్వలు ఉన్నాయని.. అవి 2022-23లో అంచనా వేసిన దిగుమతుల చెల్లింపులకు సరిపోతాయని తెలిపింది.
తాజా వారంలో మారక నిల్వలు తరిగిపోవటానికి ఫారెన్ కరెన్సీ అసెట్స్ తగ్గిపోవటమే కారణంగా తెలుస్తోంది. ఫారెన్ కరెన్సీ అసెట్స్ 1.302 బిలియన్ డాలర్లు తగ్గటంతో వాటి విలువ 529.55 బిలియన్ డాలర్లకు చేరుకున్నాయి. వీటిలో ఇతర దేశాలకు చెందిన కరెన్సీ నిల్వల విలువ హెచ్చుతగ్గులను డాలర్లలో మార్చి లెక్కగడతారు. బంగారం నిల్వలు 1.169 బిలియన్ డాలర్ల మేర తరిగిపోవటంతో వాటి విలువ 40.57 బిలియన్ డాలర్లకు చేరుకుంది. ఇదే సమయంలో అంతర్జాతీయ ద్రవ్యనిధి వద్ద ఉన్న భారత నిల్వలు కూడా తగ్గినట్లు రిజర్వు బ్యాంక్ వెల్లడించింది.