క్రెడిట్ కార్డ్ బిల్లు కట్టమని కస్టమర్ను వేధించిన బ్యాంక్! ఊహించని షాకిచ్చిన కోర్టు..
ఢిల్లీ హైకోర్టు క్రెడిట్ కార్డ్ మోసం కేసులో బ్యాంక్కు షాకిచ్చింది. కస్టమర్ ఫిర్యాదును నిర్లక్ష్యం చేసి, అనవసర వసూళ్లకు ప్రయత్నించినందుకు బ్యాంక్ను మందలించింది. బ్యాంక్ నిర్లక్ష్యానికి రూ.1 లక్ష నష్టపరిహారం, మోసపోయిన మొత్తాన్ని తిరిగి చెల్లించాలని, CIBIL స్కోర్ను సరిచేయాలని ఆదేశించింది.
ఢిల్లీ హైకోర్టు క్రెడిట్ కార్డు బిల్లు విషయంలో కస్టమర్, బ్యాంక్ మధ్య తలెత్తిన వివాదంలో ఊహించని షాకిచ్చింది. బ్యాంకు తప్పుగా క్రెడిట్ కార్డ్ బిల్లు డిమాండ్ చేయడమే కాకుండా అతని ఇంటికి కలెక్షన్ ఏజెంట్ను పంపడం ద్వారా కస్టమర్పై ఒత్తిడి తెచ్చింది. ఈ కేసులో కస్టమర్ క్రెడిట్ కార్డ్ ఉపయోగించి రూ.76,777 మోసపూరిత లావాదేవీ జరిగింది. బ్యాంకుకు వెంటనే తెలియజేసినప్పటికీ అతనికి రికవరీ నోటీసు అందింది. ఈ నిర్లక్ష్యానికి కోర్టు బ్యాంకును తీవ్రంగా మందలించింది.
సిటీ బ్యాంక్ ఈ కస్టమర్కు జనవరి 2022లో క్రెడిట్ కార్డ్ జారీ చేసింది. ఏప్రిల్ 2022లో అనేక తప్పు లాగిన్ ప్రయత్నాల కారణంగా కార్డ్ బ్లాక్ చేయబడింది. బ్యాంక్ భద్రత పేరుతో వెంటనే కొత్త కార్డ్ జారీ చేసింది, కానీ కస్టమర్ కొత్త కార్డ్ను అభ్యర్థించలేదని లేదా యాక్టివేట్ చేయలేదని పేర్కొన్నారు. ఈ సమయంలో అత్యంత షాకింగ్ విషయం జరిగింది. మోసగాళ్ళు కస్టమర్ రిజిస్టర్డ్ మొబైల్ నంబర్ను మార్చేశారు. బ్యాంక్ పాత నంబర్కు సందేశాలు పంపింది, కానీ కస్టమర్కు మార్పు గురించి తెలియదు. కొత్త నంబర్కు OTPలు పంపి, ఏప్రిల్ 6న రూ.76,777 లావాదేవీ జరిగింది.
ఏప్రిల్ 12న కస్టమర్కు తన కార్డు స్టేట్మెంట్ను ఇమెయిల్ ద్వారా అందింది. తన పేరు మీద కొత్త కార్డు జారీ చేశారు. దాని కోసం గణనీయమైన మొత్తం ఖర్చు అయినట్లు గుర్తించారు. అతను అదే రోజు బ్యాంకు, సైబర్ సెల్ రెండింటికీ ఫిర్యాదు చేశాడు. బ్యాంకు ప్రారంభంలో దర్యాప్తు పెండింగ్లో ఉన్న మొత్తాన్ని తాత్కాలికంగా తిరిగి చెల్లించింది, కానీ కొన్ని నెలల తర్వాత, అది అకస్మాత్తుగా ఫిర్యాదును ముగించి, పూర్తి బ్యాలెన్స్తో పాటు వడ్డీ, జరిమానాలను కస్టమర్ నుంచి వసూలే చేసే ప్రయత్నం చేసింది. తమ రికవరీ ఏజెంట్ను సైతం కస్టమర్ వద్దకు పంపింది. ఆ ఏజెంట్ కస్టమర్ను బెదిరింపులకు కూడా గురి చేయడంతో కస్టమర్ కోర్టును ఆశ్రయించాడు.
ఒక కస్టమర్ అనుకోకుండా OTP ని పంచుకున్నప్పటికీ, కార్డును వెంటనే బ్లాక్ చేయడానికి బ్యాంకు ఒక వ్యవస్థను కలిగి ఉండాలని కోర్టు స్పష్టంగా పేర్కొంది. ఫిర్యాదు పెండింగ్లో ఉన్నప్పుడు, బ్యాంకు జరిమానాలు, ఆలస్య రుసుములు లేదా డబ్బును తిరిగి పొందలేం. ఇంకా కలెక్షన్ ఏజెంట్లు కస్టమర్ల ఇళ్లకు వెళ్లి వారిని బెదిరించడం పూర్తిగా ఆమోదయోగ్యం కాదని కోర్టు స్పష్టంగా పేర్కొంది. కస్టమర్కు రూ.1 లక్ష నష్టపరిహారం చెల్లించాలని, మోసం చేసిన మొత్తాన్ని తిరిగి చెల్లించాలని, అతని CIBIL స్కోర్ను వెంటనే సరిచేయాలని కోర్టు బ్యాంకును ఆదేశించింది.
మరిన్ని బిజినెస్ వార్తల కోసం ఇక్కడ క్లిక్ చేయండి