Repaying Home Loan: పీఎఫ్ సొమ్ముతో హోమ్‌లోన్ క్లియర్ చేస్తున్నారా..? ఆ విషయం తెలుసుకోకపోతే మీ సొమ్ము ఫసక్

Bank Home Loan

ఆర్‌‌బీఐ ఇటీవల గృహ రుణాలపై  కీలకమైన రెపో రేట్లను కొనసాగించినప్పటికీ హెచ్‌డీఎఫ్‌సీ బ్యాంక్‌తో సహా పలు బ్యాంకులు తమ రెపో-లింక్డ్ హోమ్ లోన్ రేట్లను మార్చి 2024లో 10-15 బేసిస్ పాయింట్లు పెంచాయి. ఫలితంగా గృహ రుణాలపై వడ్డీ రేట్లు 8.70 శాతం నుంచి  9.80 శాతం వరకు ఉన్నాయి. దీంతో గృహ రుణ చెల్లింపుదారులకు ఈఎంఐలు కట్టడం భారంగా మారింది. దీంతో రుణ ముందస్తు చెల్లింపు గానీ, పొడిగించిన రుణ కాల వ్యవధిని ఎంచుకోవాల్సి వస్తుంది. చాలా మంది రుణగ్రహీతలు తమ రుణాలను త్వరగా క్లియర్ చేయాలనే ఆసక్తితో పొదుపు లేదా వారి ఉద్యోగుల ప్రావిడెంట్ ఫండ్ ఖాతాల వంటి పెట్టుబడులను ఉపయోగిస్తున్నారు. అయితే పొదుపుతో గృహ రుణం తిరిగి చెల్లిస్తే పర్లేదు కానీ, ఈపీఎఫ్ ఉపసంహరణ ద్వారా రుణం చెల్లించాలనుకునే వాళ్లు ఓ సారి ఆలోచించాలని నిపుణులు సూచిస్తున్నారు. ఈ నేపథ్యంలో ఈపీఎఫ్ ఉపసంహరణపై నిపుణుల సూచనలను ఓ సారి తెలుసుకుందాం. 

హోమ్ లోన్ రీపేమెంట్ కోసం మీ ఈపీఎఫ్ ఉపసంహరణ నిర్ణయం తీసుకునే ముందు ఆలోచించాలని నిపుణులు సూచిస్తున్నారు. ఎందుకంటే ఈపీఎఫ్ పొదుపులు వడ్డీతో పాటు పెరుగుతాయి. పైగా ఈపీఎఫ్ సొమ్ము మీ రిటైర్మెంట్ పొదుపులో ముఖ్యమైన భాగం. ఈ నిధులను విత్‌డ్రా చేయడం వల్ల ఈ మొత్తం తగ్గిపోతుంది. దీని ఫలితంగా పదవీ విరమణ ప్రయోజనాలు తగ్గుతాయి. గృహ రుణాలపై తక్కువ వడ్డీ రేటును పొందేందుకు రుణ ఏకీకరణ లేదా బ్యాలెన్స్ బదిలీ వంటి ప్రత్యామ్నాయాలను అన్వేషించాలని ఆర్థిక నిపుణులు కూడా సూచిస్తున్నారు. అయితే మీ లోన్‌ని తిరిగి చెల్లించడానికి మీరు ఈపీఎఫ్ ఉపసంహరణను ఎంచుకోవాలా? లేదా? అనేది లోన్ రీపేమెంట్‌కు సంబంధించిన అత్యవసరత, అవసరమైన మొత్తం, మీ మొత్తం ఆర్థిక పరిస్థితి వంటి వివిధ అంశాలపై ఆధారపడి ఉంటుంది. మీ ఈపీఎఫ్ ఉపసంహరణ ముందు వాటి వల్ల కలిగే నష్టాలను పరిగణనలోకి తీసుకోవడం చాలా ముఖ్యం. ఎందుకంటే ఇది మీ రిటైర్మెంట్ కార్పస్, భవిష్యత్తు ఆర్థిక భద్రతను తగ్గిస్తుంది.

మీ ఈపీఎఫ్ ఉపసంహరణకు ముందు మీ హోమ్ లోన్‌ని నిర్వహించడానికి అన్ని మార్గాలను అన్వేషించడం మంచిదని ఆర్థిక నిపుణులు సూచిస్తున్నారు. వడ్డీ రేటుపై మళ్లీ చర్చలు జరపడం, లోన్ వ్యవధిని పొడిగించడం లేదా అదనపు చెల్లింపులు చేయడం సాధ్యమేనా? అనే అంశాలపై అవగాహన తెచ్చుకోవాలంటున్నారు. ముఖ్యంగా రుణాన్ని తిరిగి చెల్లించాల్సిన ఆవశ్యకతను అంచనా వేయాలని పేర్కొంటున్నారు. అలాగే ఈపీఎఫ్ ఉపసంహరణలు ఉపసంహరణకు కారణంతో మీ ఉద్యోగ కాల వ్యవధి ఆధారంగా పన్ను చెల్లించాల్సి ఉంటుంది. ఈ పన్ను ఏ స్థాయిలో ఉంటుందో? ఈపీఎఫ్ఓ మార్గదర్శకాలతో మీ అవసరాలకు అనుగుణంగా సమాచారం తెలుసుకోవాలి. ఈ విషయంపై మీకు ఇంకా ఏమైనా అనుమానాలు ఉంటే ఆర్థిక నిపుణులను సంప్రదించడం మంచిది.