Weather: తీరం దాటినా మురసు ప్రభావం తగ్గలేదు.. ఈ ప్రాంతాల్లో ఈదురుగాలులతో వర్షాలు

మురసు తీవ్ర తుఫాను నవంబర్ 3న తెల్లవారుజామున ఒంగోలు సమీపంలో తీరం దాటినప్పటికీ, దాని ప్రభావం ఆంధ్రప్రదేశ్, తెలంగాణ రాష్ట్రాలపై ఇంకా స్పష్టంగా కనిపిస్తోంది. తుఫాను బలహీనపడి, అల్పపీడనంగా మారే క్రమంలో పలు ప్రాంతాల్లో ఈదురు గాలులతో కూడిన భారీ వర్షాలు కొనసాగుతున్నాయి. వాతావరణ శాఖ అధికారుల అంచనా ప్రకారం, మురసు తుఫాను ప్రస్తుతం కోస్తాంధ్ర, తూర్పు తెలంగాణ సరిహద్దు ప్రాంతాల్లో కేంద్రీకృతమై ఉంది. ఇది ఉత్తర దిశగా ప్రయాణిస్తూ రాబోయే గంటల్లో మరింత బలహీనపడనుంది.

తీరం దాటే సమయంలో గంటకు 100 కిలోమీటర్ల వేగంతో వీచిన ఈదురు గాలులు, విపరీతమైన భారీ వర్షాలతో మురసు తీవ్ర విధ్వంసం సృష్టించింది. తీరం దాటిన కొన్ని గంటల తర్వాత గాలుల తీవ్రత తగ్గి సాధారణ తుఫానుగా, ఆపై అల్పపీడనంగా మారుతుండటంతో పరిస్థితి కొంత ప్రశాంతంగా మారే అవకాశం ఉంది. అయినప్పటికీ, ఈ ప్రక్రియలో ఒక్కసారిగా చాలా ప్రాంతాలను అతలాకుతలం చేసింది.

ఆంధ్రప్రదేశ్‌లో తుఫాను ప్రభావం:

మురసు తుఫాను ప్రభావంతో నవంబర్ 3న ఆంధ్రప్రదేశ్‌లోని పలు ప్రాంతాల్లో భారీ నుంచి అతి భారీ వర్షాలు కురిశాయి. దక్షిణ కోస్తా, మధ్య కోస్తా జిల్లాల్లో రికార్డు స్థాయిలో వర్షపాతం నమోదైంది. బాపట్ల, గుంటూరు, నెల్లూరు, ప్రకాశం, కృష్ణా జిల్లా, విజయవాడ, పల్నాడు, వెస్ట్ గోదావరి ప్రాంతాల్లో ఎడతెరిపి లేకుండా కుండపోత వర్షాలు పడ్డాయి. గంటకు 50 నుంచి 80 కిలోమీటర్ల వేగంతో గాలులు వీచాయి. నేడు కూడా కొన్ని ప్రాంతాల్లో విపరీతమైన వర్షాలు కురిసే అవకాశం ఉందని అధికారులు హెచ్చరిస్తున్నారు. ఐఎండీ ఇచ్చిన మ్యాప్ ప్రకారం, బుధవారం కోస్తాంధ్రలో భారీ వర్షాలకు అవకాశం లేకపోయినా, ఎల్లో అలర్ట్ కొనసాగుతోంది, అంటే వర్షం ఉండే అవకాశం ఉంది. ఈదురు గాలులు, మేఘావృతమైన ఆకాశం ఉండవచ్చు.

తెలంగాణలో మురసు ప్రభావం:

మురసు తుఫాను ప్రభావం తెలంగాణలోనూ స్పష్టంగా కనిపించింది. మంగళవారం తెలంగాణలోని చాలా జిల్లాల్లో విస్తారంగా వర్షాలు పడ్డాయి. ఖమ్మం, కొత్తగూడెం, సూర్యాపేట, నల్గొండ, నాగర్కర్నూల్, వనపర్తి జిల్లాల్లోని కొన్ని ప్రాంతాల్లో భారీ వర్షాలు నమోదయ్యాయి. బుధవారం దమ్మపేట, అశ్వరావుపేట, ములకాలపల్లె, కొత్తగూడెం, భద్రాచలంలో విపరీతమైన వర్షాలు పడుతున్నాయి. భద్రాచలం, ఖమ్మం, మహబూబాబాద్‌లలో కుండపోత వర్షాలు కురిసే అవకాశం ఉందని ఐఎండీ అంచనా వేస్తోంది. తెలంగాణ అధికారుల అంచనా ప్రకారం, నేడు, రేపు కూడా ఇలాంటి పరిస్థితే ఉండే అవకాశం ఉంది. గురువారం నాటికి భారీ వర్షాలు తగ్గి సాధారణ వర్షాలుగా మారి, ఆపై పరిస్థితి ప్రశాంతంగా మారవచ్చు.

ప్రభుత్వ హెచ్చరికలు, జాగ్రత్తలు:

తీరం దాటినప్పటికీ, మురసు తుఫాను ప్రభావం నుంచి పూర్తిగా బయటపడలేదని అధికారులు స్పష్టం చేస్తున్నారు. భారీ వర్షాల వలన చెట్లు పడిపోవడం, విద్యుత్ సరఫరాకు అంతరాయం ఏర్పడటం వంటివి జరిగాయి. మత్స్యకారులను వేటకు వెళ్లొద్దని, విద్యుత్ స్తంభాలకు దూరంగా ఉండాలని, పైకప్పులు ఎగిరిపోయే ప్రమాదం ఉన్నందున పూరిళ్లు, పెంకుటిళ్లలో నివసించే వారు సురక్షిత ప్రాంతాలకు తరలి వెళ్లాలని హెచ్చరించారు. ప్రయాణాలను వాయిదా వేసుకోవడం మంచిదని సూచించారు. అత్యవసర పరిస్థితి అయితే తప్ప ఇళ్ల నుంచి బయటకు రాకూడదని ప్రజలకు విజ్ఞప్తి చేశారు. ప్రభుత్వం కూడా టెక్నాలజీ ద్వారా ముందే హెచ్చరికలు జారీ చేసి, అవసరమైనవన్నీ నిల్వ చేసుకోవాలని సూచించింది. ప్రజలు అప్రమత్తంగా ఉండి, అధికారులు జారీ చేసే సూచనలను పాటించాలని కోరారు.