Andhra Pradesh: సినిమాకెళ్లొస్తున్న ఫ్రెండ్స్.. అర్ధరాత్రి పాడుబడిన భవనం నుంచి భయంకర సౌండ్స్.. వెళ్లి చూడగా..

కాకినాడ జిల్లా కాజులూరు మండలం తిప్పరాజుపాలెంలో క్షుద్రపూజల ఉదంతం తీవ్ర కలకలం రేపింది. గ్రామంలోని ఓ పాడుబడిన పాత భవనంలో గుర్తుతెలియని వ్యక్తులు గుట్టుచప్పుడు కాకుండా క్షుద్రపూజలు, చేతబడులు నిర్వహిస్తుండటాన్ని స్థానిక యువకులు గుర్తించారు. గ్రామానికి చెందిన కొందరు యువకులు అర్ధరాత్రి సినిమా చూసి తిరుగు ప్రయాణంలో ఆ మార్గం గుండా వెళ్తుండగా, పాడుబడిన భవనంలో అనుమానాస్పద కదలికలు కనిపించాయి. లోపలికి వెళ్లి చూడగా క్షుద్రపూజలు చేస్తున్న దృశ్యాలు కంటపడ్డాయి. వెంటనే యువకులు వారిని పట్టుకునేందుకు ప్రయత్నించగా, పూజలు చేస్తున్న వ్యక్తులు చీకటిలో అక్కడి నుంచి పరారయ్యారు.

గ్రామస్థుల ఆరోపణలు.. పోలీసులకు ఫిర్యాదు

తిప్పరాజుపాలెం శివారు అంచమచెరువుకు చెందిన గుమ్మడి నాగేశ్వరరావు అనే వ్యక్తే బయటి ప్రాంతాల నుంచి తాంత్రికులను రప్పించి ఈ చేతబడులు చేయిస్తున్నాడని గ్రామస్థులు తీవ్రంగా ఆరోపిస్తున్నారు. ఈ ఘటనతో ఊరి ప్రజలు, చిన్నారులు తీవ్ర భయాందోళనలకు గురవుతున్నారు. పిల్లలను పాఠశాలలకు పంపించాలన్నా భయపడాల్సి వస్తోందని ఆవేదన వ్యక్తం చేస్తూ గొల్లపాలెం పోలీసులకు ఫిర్యాదు చేశారు.

ఫిర్యాదు స్వీకరించిన వెంటనే గొల్లపాలెం ఎస్సై మూర్తి తన సిబ్బందితో కలిసి ఘటనా స్థలానికి చేరుకున్నారు. పాడుబడిన భవనాన్ని పరిశీలించగా.. అక్కడ తాంత్రిక పూజల కోసం తవ్విన హోమం గొయ్యి, కోడి రక్తం మరకలు, విచిత్రమైన ముగ్గులు, పువ్వులు, పూజా సామాగ్రి చెల్లాచెదురుగా పడి ఉండటం గుర్తించారు. వీటన్నింటినీ పోలీసులు రికార్డు చేసుకుని, సాక్ష్యాధారాలు సేకరించారు. ఈ వ్యవహారంపై కేసు నమోదు చేసి లోతైన దర్యాప్తు చేపడుతున్నట్లు పోలీసులు తెలిపారు.

వీడియో చూడండి..