Maldives: మార్చి 15లోగా మిలిటరీ సిబ్బందిని వెనక్కి తీసుకోవాలి.. భారత్‌ను కోరిన మాల్దీవుల ప్రెసిడెంట్

భారత్ – మాల్దీవుల మధ్య ఉద్రిక్తత పెరుగుతుందనే భయంతో మార్చి 15లోగా తమ సైన్యాన్ని ఉపసంహరించుకోవాలని మాల్దీవుల ప్రభుత్వం భారత్‌ను కోరింది. ఐదు రోజుల చైనా పర్యటన అనంతరం దూకుడు వైఖరి ప్రదర్శిస్తున్నారు అధ్యక్షుడు మొహమ్మద్ ముయిజు.. ఇదే తమ ప్రభుత్వ విధానమని ముయిజు స్పష్టం చేశారు. భారత్ తన 88 మంది సైనికులను రెండు నెలల్లో వెనక్కి తీసుకోవలసి ఉంటుందన్నారు.

చైనా నుంచి తిరిగొచ్చిన తర్వాత మాల్దీవుల అధ్యక్షుడు మహమ్మద్ ముయిజు కఠిన వైఖరిని ప్రదర్శిస్తున్నారు. ఒక రోజు ముందు పేరు పెట్టకుండా వ్యాఖ్యానించిన ముయిజు, మార్చి 15 లోగా మాల్దీవులలో మోహరించిన సైనిక సిబ్బందిని ఉపసంహరించుకోవాలని భారతదేశాన్ని కోరింది. రెండు నెలల క్రితం అధ్యక్షుడైన తర్వాత, మాల్దీవుల్లో మోహరించిన ఇతర దేశాల సైనికులను తొలగిస్తున్నట్లు ముయిజు ప్రకటించారు. ఎన్నికల ప్రచారంలో ఇండియా ఔట్ అంటూ నినాదాలు కూడా చేశారు. మాల్దీవులను బెదిరించే హక్కు ఏ దేశానికీ లేదని ఆయన భారత్ పేరు చెప్పకుండా అన్నారు.

ప్రస్తుతం మాల్దీవుల్లో ఉన్న 88 మంది భారతీయ సైనికులు, ఇప్పుడు వారిని రెండు నెలల్లో ఉపసంహరించుకోవాల్సి ఉంటుంది. మార్చి 15 లోగా తమ సైనిక సిబ్బందిని ఉపసంహరించుకోవాలని అధ్యక్షుడు ముయిజ్జు అధికారికంగా భారతదేశాన్ని కోరినట్లు మాల్దీవుల ప్రభుత్వ సీనియర్ అధికారి తెలిపారు. ముయిజు కార్యాలయంలో కార్యదర్శి అబ్దుల్లా నజీమ్ ఇబ్రహీం, ‘భారత సైనిక సిబ్బంది మాల్దీవులలో ఉండలేరు. ఇది అధ్యక్షుడు డాక్టర్ మొహమ్మద్ ముయిజు ప్రభుత్వం విధానం. ప్రభుత్వ తాజా సమాచారం ప్రకారం మాల్దీవుల్లో 88 మంది భారత సైనిక సిబ్బంది ఉన్నారు.

మరోవైపు మాల్దీవులు, భారతదేశం దళాల ఉపసంహరణ గురించి చర్చించడానికి ఒక ఉన్నత స్థాయి కోర్ గ్రూపును ఏర్పాటు చేశాయి, భారత హైకమిషనర్ సమక్షంలో జరిగిన మొదటి సమావేశం ఆదివారం ఉదయం మాలేలోని విదేశాంగ మంత్రిత్వ శాఖ ప్రధాన కార్యాలయంలో జరిగింది. ఈ సమావేశంలో భారత హైకమిషనర్ మును మహవార్ కూడా పాల్గొన్నారు. ప్రెసిడెంట్ ముయిజు కార్యాలయంలోని కార్యదర్శి అబ్దుల్లా నజీమ్ ఇబ్రహీం కూడా సమావేశాన్ని ధృవీకరించారు. మార్చి 15లోగా బలగాలను ఉపసంహరించుకోవాలన్నదే ఈ సమావేశ ఎజెండా అని తెలిపారు. ఈ విషయాన్ని భారత ప్రభుత్వం ఇంకా ధృవీకరించలేదు. మొత్తం సంఘటనపై ఎటువంటి వ్యాఖ్య చేయలేదు.

చైనా అనుకూల నేతగా ఉన్న ముయిజూ, గత ఏడాది నవంబర్ 17న మాల్దీవుల అధ్యక్షుడిగా బాధ్యతలు స్వీకరించారు. ఆ వెంటనే తన సైనిక సిబ్బందిని ఉపసంహరించుకోవాలని అధికారికంగా భారతదేశాన్ని అభ్యర్థించారు. ముయిజు ప్రకారం, సైనికులను వెనక్కి పంపే విషయంలో మాల్దీవుల ప్రజలు అతనికి అండగా నిలిచారు. మాల్దీవుల దేశీయ వ్యవహారాలపై ఎలాంటి బయటి దేశాలు ప్రభావం చూపడాన్ని తాను అనుమతించబోనని ముయిజు చెప్పారు. గత ప్రభుత్వ హయాంలో కుదిరిన 100కు పైగా ద్వైపాక్షిక ఒప్పందాలను సమీక్షించడం గురించి కూడా ఆయన మాట్లాడారు.

చైనాతో ముయిజుకు ఉన్న సాన్నిహిత్యం, భారత్ పట్ల కఠిన వైఖరి కారణంగా ఇరుదేశాల మధ్య ఉద్రిక్తతలు పెరిగే అవకాశం ఉందని రాజకీయ విశ్లేషకులు భావిస్తున్నారు. ఇటీవల ఆయన ప్రభుత్వంలోని ముగ్గురు మంత్రులు ప్రధాని మోదీపై కించపరిచే వ్యాఖ్యలు చేశారు. ఈ ఘటన తర్వాత సోషల్ మీడియాలో దుమారం రేగింది. టూరిజం ఆధారిత ఆర్థిక వ్యవస్థ కలిగిన మాల్దీవులను బహిష్కరించేందుకు భారతీయ నెటిజన్లు కలిసి రావడం కనిపించింది. మాల్దీవులకు వెళ్లడం కంటే భారత్‌లోని లక్షద్వీప్‌కు వెళ్లడమే మంచిదని పలువురు వ్యాఖ్యానించారు. ప్రధాని మోదీ లక్షద్వీప్‌లో పర్యటించిన తర్వాత, దాని చిత్రాలు, వీడియోలు బయటకు వచ్చిన తర్వాత కొత్త వివాదం రాజుకుంది.

మరిన్ని అంతర్జాతీయ వార్తల కోసం ఇక్కడ క్లిక్ చేయండి…