రోడ్డు పైకి బాతుల గుంపు.. భారీగా ట్రాఫిక్‌ జామ్‌.. వీడియో వైరల్‌

ఆస్ట్రేలియాలోని పెర్త్‌ నగరంలో ఇటీవల భారీగా ట్రాఫిక్‌ జామ్ అయింది. ఆ సమయంలో రోడ్డుపై వాహనాలు చాలా స్పీడ్‌గా దూసుకెళ్తున్నాయి. అయితే రోడ్డు క్రాస్‌ చేస్తున్న కొన్నిటిని చూసి వాహనాలు ఒక్కసారిగా ఆగిపోయాయి. వాటిని చూసి సడెన్‌గా బ్రేక్‌ వేయాల్సి వచ్చింది. కొన్ని వాహనాలు నియంత్రణ కోల్పోయాయి. ఒకదాని వెంట మరొకటి ఇలా పలు కార్లు ఢీ కొన్నాయి. ఈ ఘటనలో ఆరు కార్లు దెబ్బతిన్నాయి. పెర్త్ లోని కోమోలోని కానింగ్‌ హైవేపై ఈ ఘటన చోటు చేసుకుంది. ఇంతకీ అక్కడ ఏం జరుగుతోంది? భారీ ట్రాఫిక్‌ జామ్‌కు కారణమేంటని ముందుకొచ్చి చూసిన వారి ఫ్యూజులు ఎగిరిపోయాయి. ఎక్కడి నుంచి వచ్చాయో కానీ ఓ భారీ బాతుల గుంపు రోడ్డుపైకి వచ్చింది. అది గమనించిన కొందరు వాహనదారులు తమ వాహనాలను ఒక్కసారిగా ఆపేశారు. ఆ బాతుల గుంపు ఎంచక్కా ఒకదాని వెనుక మరొకటి నడుచుకుంటూ రోడ్డును దాటాయి. అవి పూర్తిగా రోడ్డు దాటే వరకు వాహనదారులు వేచి చూసారు. ఇందుకు సంబంధించిన వీడియోను అక్కడే ఉన్న కొందరు తమ ఫోన్లలో బంధించి సోషల్‌ మీడియాలో షేర్‌ చేయగా.. ప్రస్తుతం అవి వైరల్‌గా మారాయి. వీడియోపై నెటిజన్లు రకరకాలుగా కామెంట్స్‌ చేస్తున్నారు. వాహనదారులు ప్రవర్తించిన తీరును పశంసిస్తూ కామెంట్స్‌ చేస్తున్నారు.