పాత బకాయిలు అడిగారని.. మొబైల్ షాప్ ధ్వంసం.. వీడియో వైరల్..

పాత బకాయిలు అడిగినందుకు ఏకంగా షాపు సిబ్బందిపై దాడికి పాల్పడ్డాడు ఓ యువకుడు. ఈ ఘటన హైదరాబాద్ నగరంలోని అమీర్‎పేటలో జరిగింది. ఇందుకు సంబంధించిన పూర్తి వివరాలు ఇలా ఉన్నాయి. నగరంలోని కూకట్ పల్లికి చెందిన అఖిల్ అనే యువకుడు తన అనుచరులతో వచ్చి అమీర్‎పేటలోని నీలగిరి బ్లాక్‎లో ఉన్న మొబైల్ రిపేరీ షాపు నిర్వాహకుడితో పాటు అతని సిబ్బందిపై విచక్షణారహితంగా దాడి చేశాడు. అంతటితో ఆగకుండా షాపులోని సామగ్రిని సైతం ధ్వంసం చేశాడు. ఆ షాపు సిబ్బంది ఆ యువకుడికి పాత బకాయిలు చెల్లించాలని అడగడమే ఈ గొడవకు కారణమైందని తెలిసింది. షాపు సిబ్బందిపై ఆ యువకులు దాడి చేయడం, షాపులోని సామాన్లను ధ్వంసం చేయడం అక్కడి సీసీ కెమెరాలో రికార్డు అయింది. ఘటనకు సంబంధించి సమాచారం అందుకున్న ఎస్ ఆర్ నగర్ పోలీసులు సంఘటన స్థలానికి చేరుకుని పూర్తి వివరాలు తెలుసుకున్నారు. అనంతరం దాడికి పాల్పడిన ఏడుగురు నిందితులను అరెస్ట్ చేసి రిమాండ్‎కు తరలించారు.

మరిన్ని తెలంగాణ వార్తల కోసం ఇక్కడ క్లిక్ చేయండి..