కిమ్ వారసురాలా? కిమ్ జు యే టాలెంట్ ఏంటి?వీడియో
ఇటీవల చైనా మిలటరీ పరేడ్కు రష్యా అధ్యక్షుడు పుతిన్ సహా 26 దేశాలకు చెందిన నాయకులు హాజరయ్యారు. వీరిలో ఉత్తర కొరియా అధ్యక్షుడు కిమ్ తన 13 ఏళ్ల వయసున్న చిన్న కూతురితో హాజరుకావడం అందర్నీ ఆశ్చర్యపరిచింది. దీంతో కిమ్ వారసురాలు ఆమే అంటూ జరుగుతోన్న ప్రచారానికి బలం చేకూరినట్టయ్యింది. మూడేళ్ల కిందట కిమ్తో కలిసి ఖండాంతర క్షిపణి పరీక్షకు హాజరైన పదేళ్ల ఆ బాలిక అప్పట్లో ప్రపంచం దృష్టిని ఆకర్షించింది.
కిమ్ తన కుమార్తె కిమ్ జుయేతో కలిసి బుల్లెట్ రైల్లో ప్రయాణించి చైనాలోని బీజింగ్కు చేరుకున్నారు. అక్కడ చైనా నిర్వహించిన సైనిక కవాతుకు వారు హాజరయ్యారు. కాగా, ఆ బాలికే రాబోయే రోజుల్లో ఉత్తర కొరియా పాలకురాలు అయ్యే ఛాన్స్ ఉందని.. ఉత్తర కొరియా దాయాది దేశమైన దక్షిణ కొరియా నిఘా వర్గాలు బలంగా విశ్వసిస్తున్నాయి. కానీ, ఆది నుంచి పురుషాధిక్యత గల కిమ్ కుటుంబంలో ఓ యువతికి పగ్గాలు అప్పగిస్తారా? అనే అనుమానం పలు దేశాల మనసులో ఉంది. ఉత్తర కొరియాలో ‘గౌరవనీయ’ అనే పదాన్ని అత్యున్నత స్థాయి అధికారులకు మాత్రమే ఉపయోగిస్తారు. కాగా, ఇటీవలి కాలంలో.. కిమ్ స్వయంగా ‘రెస్పెక్టెడ్ కామ్రెడ్’ అంటూ తన రెండో కూతురిని సంబోధిస్తున్నారని, కిమ్ కుటుంబంలో.. వారసత్వ స్థానం బలపడిన కారణంగానే అధ్యక్షుడు అలా పిలుస్తున్నాడని రాజకీయ నిపుణులు చెబుతున్నారు. అలాగే..తమ దేశంలో …కిమ్ జూ ఏ అనే పేరున్న వారంతా తమ పేర్లను మార్చుకోవాలని ఉత్తర కొరియా ప్రభుత్వం ఆదేశించిందని 2023 ఫిబ్రవరిలో రేడియో ఫ్రీ ఆసియా సంస్థ రిపోర్ట్ చేయటమూ ఈ అనుమానాలకు తావిస్తోంది. ఆ బాలికకు గుర్రపు స్వారీ, స్కీయింగ్, ఈత అంటే ఇష్టమని, ఆమె పేరు ఏ విద్యా సంస్థలోనూ నమోదు కాలేదని, ఆమె ఇంట్లోనే ఉంటూ హోం-స్కూలింగ్ చదువుతోందని తెలిసింది. కిమ్ జూ ఏకు ఒక అన్న, ఒక తమ్ముడు లేదా చెల్లి కూడా ఉన్నారనే వార్తలూ వినిపించినా.. వారెవరూ ఎప్పుడూ బహిరంగంగా కనిపించలేదు.
మరిన్ని వీడియోల కోసం :