బెంగళూరు వాసులకు గుడ్ న్యూస్.. బెంగళూరు-ముంబై వందే భారత్ స్లీపర్ ట్రైన్ ప్రారంభం

బెంగళూరు, ముంబై నగరాల మధ్య ప్రయాణించే వారికి ఇండియన్ రైల్వేస్ అదిరిపోయే శుభవార్త అందించింది. నవంబర్ 1, 2026న ఈ రెండు ప్రధాన నగరాల మధ్య ప్రతిష్టాత్మకమైన ‘వందే భారత్ స్లీపర్ ట్రైన్’ సేవలు ప్రారంభం కానున్నాయి. ఇప్పటికే ఈ మార్గంలో ట్రయల్ రన్ విజయవంతం కావడంతో ప్రయాణికుల్లో సర్వత్రా ఆసక్తి నెలకొంది. ప్రస్తుతం బెంగళూరు నుంచి ముంబై వెళ్లేందుకు ‘ఉద్యాన్ ఎక్స్‌ప్రెస్’ వంటి రైళ్లు సుమారు 22 నుంచి 24 గంటల సమయం తీసుకుంటున్నాయి. కానీ, ఈ కొత్త వందే భారత్ స్లీపర్ రైలు కేవలం 16 గంటల్లోనే 1,118 కిలోమీటర్ల దూరాన్ని అధిగమించనుంది. దీనివల్ల ప్రయాణికులకు దాదాపు 6 గంటల విలువైన సమయం ఆదా కానుంది. ఈ రైలు వారానికి ఆరు రోజులు సేవలు అందించేలా ప్రణాళిక సిద్ధం చేశారు. షెడ్యూల్ వివరాల ప్రకారం, ఈ రైలు బెంగళూరులోని సర్ ఎం విశ్వేశ్వరయ్య టెర్మినల్ నుంచి రాత్రి 7:50 గంటలకు బయలుదేరి, మరుసటి రోజు ఉదయం 11:55 గంటలకు ముంబై CSMT చేరుకుంటుంది. తిరుగు ప్రయాణంలో ముంబైలో రాత్రి 8:10 గంటలకు బయలుదేరి మరుసటి రోజు ఉదయం 11:55 గంటలకు బెంగళూరుకు చేరుకుంటుంది. ఈ మార్గంలో అనంతపురం, గుంతకల్లు, రాయచూరు, కలబురగి, సోలాపూర్, పుణె, కల్యాణ్ స్టేషన్లలో హాల్టింగ్ ఉండే అవకాశం ఉంది. ఈ రైలులో మొత్తం 16 కోచ్‌లు ఉండనున్నాయి. ఇందులో ఏసీ త్రీ-టైర్, ఏసీ టూ-టైర్, ఏసీ ఫస్ట్ క్లాస్ విభాగాలు అందుబాటులో ఉంటాయి. మొత్తం 823 బెర్త్‌ల సామర్థ్యం కలిగిన ఈ అత్యాధునిక స్లీపర్ రైలు అందుబాటులోకి వస్తే, రెండు నగరాల మధ్య రాకపోకలు సాగించే వ్యాపారవేత్తలు, ఉద్యోగులకు ప్రయాణం మరింత సౌకర్యవంతంగా మారనుంది.

మరిన్ని వీడియోల కోసం ఇక్కడ క్లిక్ చేయండి

Also Watch:

కొత్త కారు.. షోరూమ్‌నుంచి బయటకు తీస్తుండగా.. ఏం జరిగిందో మీరే చూడండి

KimJongUn: కిమ్‌ జోంగ్‌ ఉన్‌ ఇక లేరా.. సోషల్‌ మీడియా ప్రచారంలో నిజమెంత?