ఇదెక్కడి చోద్యం.. తన కాళ్లు మొక్కలేదని 31 మంది విద్యార్థులను చితకబాదిన టీచర్!
ఒడిశాలోని మయూర్భంజ్ జిల్లాలోని ప్రభుత్వ పాఠశాల ఉపాధ్యాయురాలు తన పాదాలు తాకని 31 మంది విద్యార్థులను వెదురు కర్రతో కొట్టింది. ఈ ఘటనలో పిల్లలకు తీవ్ర గాయాలు అయ్యాయి. బాధిత తల్లిదండ్రులు ఆందోళన చేశారు. విచారణ తర్వాత ఉపాధ్యాయురాలిని సస్పెండ్ చేశారు.
ఉపాధ్యాయులంటే రేపటి తరాన్ని తీర్చిదిద్దే మార్గదర్శకులు. వారి నుంచి విద్యార్థులు విద్యాబుద్ధులు నేర్చుకోవడమే కాదు.. వారిని చూస్తూ పెరుగుతూ ఉంటారు. అలాంటి వారి ప్రవర్తన బాగుంటేనే విద్యార్థులు కూడా మంచి ప్రవర్తనతో ఎదుగుతారు. అయితే తాజాగా ఓ టీచర్ పిల్లల పట్ల చాలా క్రూరంగా వ్యవహరించారు. అందుకు కారణం వాళ్లు సరిగ్గా చదవడం లేదని కాదు.. తన కాళ్లు మొక్కలేదని. వినేందుకు విచిత్రంగా ఉన్నా.. ఈ ఘటన ఒడిశాలో చోటు చేసుకుంది. పూర్తి వివరాల్లోకి వెళ్తే..
ఒడిశాలోని మయూర్భంజ్ జిల్లాకు చెందిన ఒక పాఠశాల ఉపాధ్యాయురాలు ఉదయం ప్రార్థన తర్వాత తన పాదాలను తాకని 31 మంది విద్యార్థులను తీవ్రంగా కొట్టారు. ప్రభుత్వ పాఠశాలలో ఈ సంఘటన జరిగింది. అక్కడ ఆరు నుండి ఎనిమిదో తరగతి వరకు 31 మంది విద్యార్థులను వెదురు కర్రతో కొట్టినట్లు ఉపాధ్యాయుడిపై ఆరోపణలు ఉన్నాయి. ఉదయం అసెంబ్లీ ముగిసిన కొద్దిసేపటికే విద్యార్థులు తమ తరగతి గదులకు వెళ్లిపోయినప్పుడు ఈ సంఘటన వెలుగులోకి వచ్చింది.
పెద్దల పట్ల గౌరవం చూపే సాంప్రదాయ సంజ్ఞ అయిన తన పాదాలను ఎందుకు తాకలేదని టీచర్ విద్యార్థులను ప్రశ్నించి, ఆ తర్వాత పాటించని వారిని కొట్టినట్లు ఆరోపణలు ఉన్నాయి. దీంతో విద్యార్థులకు గాయాలు అయ్యాయి. కొట్టిన సమయంలో ఒక బాలుడి చేతికి బలమైన గాయమైందని, ఒక బాలికకు కూడా గాయమైందని తెలుస్తోంది. గాయపడిన పిల్లలను చికిత్స కోసం ఆసుపత్రికి తరలించారు. బాధిత విద్యార్థుల తల్లిదండ్రులు పాఠశాల వద్దకు చేరుకొని, టీచర్పై క్రమశిక్షణా చర్యలు తీసుకోవాలని డిమాండ్ చేశారు. పాఠశాల ప్రధానోపాధ్యాయుడు ఈ సంఘటనను స్థానిక బ్లాక్ ఎడ్యుకేషన్ ఆఫీసర్ (BEO)కి నివేదించడంతో విషయం వెలుగులోకి వచ్చింది. BEO, పాఠశాల నిర్వహణ కమిటీ సభ్యునితో కూడిన బృందం విచారణ నిర్వహించడానికి క్యాంపస్ను సందర్శించి, టీచర్ను సస్పెండ్ చేశారు.
మరిన్ని ట్రెండింగ్ వార్తల కోసం ఇక్కడ క్లిక్ చేయండి