ఇంటి పైకప్పును చీల్చి బెడ్రూమ్లో పడిన అంతరిక్ష రాయి..అదేంటని పరిశీలించగా, శాస్త్రవేత్తలే షాక్!
భూమిపై అసలు నీరు ఎక్కడి నుంచి వచ్చింది? ఇక్కడ జీవం ఎలా మొదలైంది? ఈ ప్రశ్నలకు సమాధానాలు వెతికేందుకు నాసా వంటి పెద్ద పెద్ద అంతరిక్ష సంస్థలు వేల కోట్లు ఖర్చు చేస్తున్నాయి. అయితే, ప్రకృతి మాత్రం ఆ రహస్యాల నిధిని నేరుగా ఒక వ్యక్తి బెడ్రూమ్లో తెచ్చి పడేసింది. అమెరికాలోని న్యూజెర్సీలో ఒక ఇంటిపై పడిన ఉల్కాపాతంపై ఇటీవల సైన్స్ అడ్వాన్సెస్ జర్నల్లో ప్రచురితమైన పరిశోధన, భూమి అత్యంత పురాతన రహస్యాలను వెల్లడించింది.
భూమిపై నీరు, జీవం ఎలా ఉద్భవించాయనే శతాబ్దాల నాటి రహస్యానికి అమెరికాలోని న్యూజెర్సీలో పడిన ఒక ఉల్క సజీవ సాక్ష్యంగా నిలిచింది. SETI ఇన్స్టిట్యూట్ అధికారిక నివేదిక ప్రకారం , అమెరికాలోని న్యూజెర్సీలో ఒక ఇంటి పైకప్పును చీల్చుకుంటూ పడిన ఉల్క, విశ్వం రహస్యాన్ని వెల్లడించింది. ఈ రహస్యాన్ని తెలుసుకోవడానికి నాసా వంటి పెద్ద పెద్ద అంతరిక్ష సంస్థలు బిలియన్ల రూపాయలు ఖర్చు చేస్తున్నాయి. ప్రపంచవ్యాప్తంగా శాస్త్రవేత్తలను ఆశ్చర్యపరిచిన, విపత్తులా ఆకాశం నుండి పడిన ఈ రాయిలో దాగి ఉన్న నిధి కథను వివరంగా తెలుసుకుందాం.
ఆకాశం నుండి ఊడిపడిన ఆపద:
ఈ ఆసక్తికరమైన కథ 16 జూలై 2024న ప్రారంభమైంది. ఒక పెద్ద బ్యాగ్ పరిమాణంలో ఉన్న ఒక అంతరిక్ష శిల గంటకు 32,000 మైళ్ల వేగంతో భూ వాతావరణంలోకి ప్రవేశించింది. న్యూయార్క్ నగరంలోని స్టాచ్యూ ఆఫ్ లిబర్టీ మీదుగా ఇది వెళుతున్నప్పుడు వచ్చిన శబ్దం ఆ ప్రాంతాన్ని వణికించింది. అనంతరం ఈ శిలకు చెందిన దాదాపు ఒక కిలో బరువున్న ముక్క న్యూజెర్సీలోని హిల్స్బరో లో ఉన్న ఒక ఇంటి పైకప్పును చీల్చుకుంటూ మాస్టర్ బెడ్రూమ్లో పడింది. దీనికి శాస్త్రవేత్తలు హిల్స్బరో ఉల్క అని పేరు పెట్టారు. ఆ సమయంలో ఇంటి యజమాని అప్రమత్తంగా వ్యవహరించి, చేతులకు గ్లౌజులు వేసుకుని ఆ ముక్కలను అల్యూమినియం ఫాయిల్ సహాయంతో గాజు జార్లో భద్రపరిచాడు. దీనివల్ల మానవ చెమట లేదా భూమిపై ఉండే బ్యాక్టీరియా ఆ రాయికి అంటకుండా అత్యంత స్వచ్ఛమైన నమూనా లభించింది.
ఉల్కలో దొరికిన జీవన మూలాలు:
శాస్త్రవేత్తలు ఈ రాయిని ల్యాబ్లో పరీక్షించగా అందులో ప్రాచీన ఉప్పు నీరు, ఉప్పుతో నిండిన భాగాలు ఉన్నట్లు తేలింది. వీటితో పాటు కార్బన్ సమ్మేళనాలు, అమైనో ఆమ్లాలు, ప్రీబయోటిక్ అణువులను కనుగొన్నారు. సైన్స్ భాషలో వీటిని జీవానికి పునాదిరాళ్లు అని పిలుస్తారు.
ఈ ఆవిష్కరణ ఎందుకు ప్రత్యేకం?
కోట్లాది సంవత్సరాల క్రితం భూమి పూర్తిగా ఎండిపోయి, బంజరుగా ఉన్న సమయంలో.. అంతరిక్షం నుండి ఇలాంటి ఉప్పు నీరు, అమైనో ఆమ్లాలు ఉన్న లక్షలాది ఉల్కలు భూమిపై కురిసి ఉంటాయని ఈ పరిశోధన నిరూపిస్తోంది. ఆ ఉల్కల ద్వారానే భూమికి మొదటిసారి నీరు లభించిందని, ఆ నీటిలో జరిగిన రసాయన చర్యల వల్లే జీవం ఉద్భవించిందని శాస్త్రవేత్తలు స్పష్టం చేస్తున్నారు. నాసా తన స్పేస్ మిషన్ల ద్వారా గ్రహశకలాలపై వెతుకుతున్న సమాచారాన్ని, ఈ హిల్స్బరో ఉల్క ఉచితంగా అందించింది. ప్రస్తుతం ఈ అమూల్యమైన రాయిని న్యూయార్క్లోని అమెరికన్ మ్యూజియం ఆఫ్ నేచురల్ హిస్టరీలో భద్రపరిచారు.
మరిన్ని ట్రెండింగ్ న్యూస్ కోసం క్లిక్ చేయండి..