కలెక్టర్ అంటే ఏసీ గదుల్లో కూర్చోవడం కాదు.. సైరన్లు, గన్ మెన్, హంగూ ఆర్భాటం హడావుడి ఉంటుందని సాధారణంగా అందరికీ తెలిసింది. చూసేది కూడా ఇదే. కానీ, ఈ కలెక్టర్ వెరీ స్పెషల్. ఇతడి రూటే సపరేటు అన్నట్టుగా ఉన్నాడు. ప్రజల కష్టాలు తెలుసుకున్న వాడే కలెక్టర్ అంటూ ప్రజా జీవితంలోకి అడుగెట్టాడు కలెక్టర్ ముజామిల్ ఖాన్ ..10 రోజుల క్రితం ఖమ్మం జిల్లా నూతన కలెక్టర్ గా బాధ్యతలు స్వీకరించారు ముజామిల్ ఖాన్.. వచ్చిన దగ్గర నుంచి స్కూల్స్, అంగన్ వాడి సెంటర్లు, ప్రభుత్వ కార్యాలయాలకు సామాన్యుడు లా వెళ్లి ..అక్కడ కూర్చొని వారితో మమేకమై..సమస్యలు తెలుసుకుంటున్నారు..ఉద్యోగులు, ప్రజలతో ప్రేమగా మాట్లాడి మరింత దగ్గర అవుతున్నారు. ఇపుడు పొలం బాట పట్టారు కలెక్టర్.
కలెక్టర్ హోదాలో తనకు సెక్యూరిటీ గన్మెన్లు, ఇతర ఉన్నతాధికారులు, సిబ్బంది తన చుట్టూ ఉన్న ఒక సామాన్యుడిలా ప్రజలు, రైతులతో కలిసిపోయాడు. అంతేకాదు.. వ్యవసాయ క్షేత్రంలోకి దిగినప్పుడు.. తన కాళ్లకు వేసుకున్న బూట్లు విప్పి చేతిలో పట్టుకుని పొలం గట్లపై మోసుకుంటూ పంటలను పరిశీలించారు కలెక్టర్. ఖమ్మం జిల్లా తల్లాడ మండల కేంద్రం సమీపంలో రైతులు సాగు చేస్తున్న వరిసాగు పంటలను పరిశీలించారు జిల్లా కలెక్టర్ ముజామిల్ ఖాన్. ఈ సందర్భంగా తను వేసుకున్న షూస్ ను విడిచి తన చేతిలో పట్టుకొని చేను గట్లపై తిరుగుతూ కనిపించాడు. రైతులు పడుతున్న కష్టాల గురించి వారిని అడిగి తెలుసుకున్నారు. రైతులతో సమానంగా పంట చేనులో ఉన్న బురదలో సైతం దిగారు. వారితో సమానంగా నేలపై కూర్చున్నాడు. జిల్లా వ్యవసాయ శాఖ అధికారులు, మండల వ్యవసాయ శాఖ అధికారులను సైతం అక్కడే కింద కూర్చోబెట్టి రైతుల సమస్యలను అడిగి తెలుసుకున్నారు.
ఈ సందర్భంగా కలెక్టర్ మాట్లాడుతూ..రైతులకు పలు సూచనలు చేశారు. వాతావరణానికి అనుకూలంగా ఉండే పంటలను సాగు చేయాలని కోరారు. రైతు సమస్యలను చెప్పుకోవడానికి ఎప్పుడైనా సరే తన వద్దకు రావాలని కోరారు. ప్రజలు పడుతున్న ఇబ్బందులు, సమస్యలు అన్నీ తనకు తెలుసునని అన్నారు. గ్రామాలలో పారిశుద్ధ్య పని తీరుపై కూడా ప్రజలను అడిగి తెలుసుకున్నారు. అధికారుల పని తీరు ఎలా ఉందని ఆరా తీశారు. కలెక్టర్ పనితీరు, సింప్లిసిటీ పై ప్రజలు అభినందనలు కురిపిస్తున్నారు.
మరిన్ని తెలంగాణ న్యూస్ కోసం క్లిక్ చేయండి..