Telangana: గ్రూప్‌ 2 పరీక్షను వాయిదా వేయాల్సిందే.. అభ్యర్థుల డిమాండ్‌ ఏంటంటే.

Tspsc Group 2

తెలంగాణలో టీఎస్పీఎస్సీ గ్రూప్ 2 పరీక్ష ఆగస్టు 29, 30 తేదీల్లో నిర్వహించేందుకు అన్ని ఏర్పాట్లను ప్రభుత్వం చేస్తుంది. అయితే ఈ గ్రూప్ 2 పరీక్షను వాయిదా వేయాలంటూ ఇప్పుడు అభ్యర్థులు కోరుతున్నారు. ఆగస్టు నెలలో గురుకుల బోర్డు పరీక్షలు ఉన్నందున రెండు పరీక్షలకు ఒకేసారి ప్రిపేర్ కాలేకపోతున్నామని మూడు నెలలు గ్రూప్ -2 పరీక్షను వాయిదా వేయాలంటూ అభ్యర్థులు విన్నవిస్తున్నారు. ఈ మేరకు టీఎస్పీఎస్సీ కార్యాలయానికి 200 మంది అభ్యర్థులు చేరుకొని వినతి పత్రాన్ని అందజేశారు. ఆగస్టు ఒకటి నుంచి 20వ తేదీ వరకు గురుకుల పోస్టుల భర్తీకి సంబంధించిన పరీక్షలు ప్రకటించారు . గురుకులాల సిలబస్, గ్రూప్-2 సిలబస్ వేరువేరుగా ఉన్నందున ఒకే అభ్యర్థి రెండు పరీక్షల సిలబస్ను కవర్ చేయడం ఇబ్బందిగా ఉందని అభ్యర్థులు చెబుతున్నారు. దీంతో గురుకుల పరీక్షలు ముగిసిన తర్వాత రెండు నెలల కు గ్రూప్ 2 ఎగ్జామ్ నిర్వహించాలని వారు కోరుతున్నారు.

దానితోపాటు గ్రూప్ 2 మూడవ పేపర్ ఎకానమీ లో గత సిలబస్ కు 70% అదనంగా చేర్చారని.. ఇటీవల టీఎస్పీఎస్సీ పేపర్ లీకేజీ వ్యవహారంతో మానసికంగా కృంగిపోయి మూడు నెలలు చదవలేకపోయామని అభ్యర్థులు చెబుతున్నారు. వీటన్నిటిని పరిగణలోకి తీసుకొని మూడు నెలలపాటు గ్రూప్ 2 ఎగ్జామ్ను వాయిదా వేయాలంటూ TSPSC నీ వారు డిమాండ్ చేస్తున్నారు. ఇటు గురుకుల.. అటు గ్రూప్-2 ఈ రెండు పరీక్షలకు అర్హతలు ఉన్నా ఒకే నెలలో నిర్వహించడం వల్ల ఏదో ఒక దాంట్లో తాము అవకాశం కోల్పోయే పరిస్థితి ఉందని.. వాయిదా వేసి తీరాలని కోరుతున్నారు.

టీఎస్పీఎస్సీ గత ఏడాది 783 పోస్టులకు గాను గ్రూప్ 2 నోటిఫికేషన్ వెలువడించింది. ఈ పోస్టులకు 5,51,943 మంది అభ్యర్థులు దరఖాస్తు చేసుకున్నారు. ఒక్కో పోస్టుకు సుమారు 705 మంది అభ్యర్థులు పోటీ పడబోతున్నారు. ఆగస్టు 29, 30 తేదీల్లో గ్రూప్ 2 పరీక్ష నిర్వహించనున్నట్లు టీఎస్పీఎస్సీ ఇప్పటికే ప్రకటించింది. అందుకు అనుగుణంగా రాష్ట్ర ప్రభుత్వం ఆయా సెంటర్లకు సంబంధించిన పాఠశాలలకు సెలవులు కూడా అధికారికంగా ప్రకటించింది. ఇప్పుడు గ్రూప్-2 వాయిదా వేయాలన్న డిమాండ్పై టీఎస్పీఎస్సీ ఏ విధంగా నిర్ణయం తీసుకుంటుందో వేచి చూడాలి.

మరిన్ని తెలంగాణ వార్తల కోసం క్లిక్ చేయండి..