కేవలం రూ.4 లక్షలకే ఎలక్ట్రిక్ కారు! మారుతీ సుజుకీ నుంచి మరో సంచలనం
మారుతి సుజుకి ఎలక్ట్రిక్ వాహనాల విభాగంలో తన ఆధిపత్యాన్ని నెలకొల్పేందుకు సిద్ధమవుతోంది. వచ్చే కొన్నేళ్లలో నాలుగు కొత్త ఈవీలను విడుదల చేయాలని ప్రణాళికలు రూపొందించింది. BaaS (Battery as a Service) మోడల్తో తక్కువ ధరలో వాహనాలను అందించాలని చూస్తున్న మారుతి, రూ.4-5 లక్షల బడ్జెట్ ఈవీ నుండి ప్రీమియం మోడల్స్ వరకు అన్ని సెగ్మెంట్లను లక్ష్యంగా చేసుకుంది.
భారతీయ ఆటోమొబైల్ రంగంలో దశాబ్దాలుగా అగ్రస్థానంలో నిలిచిన మారుతీ సుజుకీ, ఇప్పుడు ఎలక్ట్రిక్ వాహనాల విభాగంలో కూడా తన ఆధిపత్యాన్ని నెలకొల్పేందుకు దూసుకెళ్తోంది. ఇప్పటివరకు ఐసీ ఇంజిన్ కార్లతో మార్కెట్ను కట్టిపడేసిన ఈ కంపెనీ, మారుతున్న వినియోగదారుల అభిరుచులను దృష్టిలో పెట్టుకుని ఎలక్ట్రిక్ మొబిలిటీ వైపు దృష్టి మళ్లిస్తోంది. ఈ నేపథ్యంలో వచ్చే కొన్నేళ్లలో నాలుగు కొత్త ఎలక్ట్రిక్ కార్లను విడుదల చేయాలని కంపెనీ ప్రణాళికలు రూపొందించింది. ఇప్పటికే తన మొదటి ఎలక్ట్రిక్ మోడల్గా మారుతి సుజుకి ఈ-విటారాను పరిచయం చేసిన కంపెనీ, 2031 నాటికి విస్తృత ఈవీ పోర్ట్ఫోలియోను నిర్మించాలనే లక్ష్యంతో ఉంది. ముఖ్యంగా తక్కువ ధరలో ఎలక్ట్రిక్ కారును అందించాలనే ఆలోచన వినియోగదారుల్లో ఆసక్తిని రేకెత్తిస్తోంది. సుమారు రూ.4-5 లక్షల పరిధిలో ఒక బడ్జెట్ ఈవీని తీసుకురావాలని యోచిస్తుండటం, మార్కెట్లో పెద్ద మార్పుకు దారితీయవచ్చని భావిస్తున్నారు.
ఈ వ్యూహంలో భాగంగా ‘YMC’ కోడ్నేమ్తో అభివృద్ధి చేస్తున్న 7-సీటర్ ఎలక్ట్రిక్ MPV ప్రత్యేకంగా నిలుస్తోంది. కుటుంబ వినియోగదారులను లక్ష్యంగా చేసుకున్న ఈ వాహనం సుమారు రూ.17 లక్షల ధరలో రావచ్చని అంచనా. అయితే ఇందులో ప్రధాన ఆకర్షణగా నిలిచేది Battery as a Service (BaaS) మోడల్. ఈ విధానం ద్వారా వాహనం కొనుగోలు సమయంలో బ్యాటరీ ఖర్చును విడిగా చెల్లించాల్సిన అవసరం ఉండదు. వినియోగదారులు వాడిన దూరం ఆధారంగా బ్యాటరీ అద్దె చెల్లించవచ్చు. దీంతో ప్రారంభ ధర సుమారు రూ.12 లక్షల వరకు తగ్గే అవకాశం ఉంది.
టెక్నికల్ పరంగా, ఈ MPVలో 49 kWh, 61.1 kWh సామర్థ్యంతో రెండు బ్యాటరీ ఆప్షన్లు వచ్చే అవకాశం ఉంది. ఇదే సమయంలో కంపెనీ కాంపాక్ట్ SUV సెగ్మెంట్లో కూడా తన స్థానం బలపరచాలని చూస్తోంది. Tata Nexon EVకు పోటీగా, బ్రెజ్జా లేదా ఫ్రాంక్స్ ఆధారంగా ఎలక్ట్రిక్ వెర్షన్ను తీసుకురావచ్చని సమాచారం. దీని ధర సుమారు రూ.12 లక్షలుగా ఉండొచ్చు, అయితే BaaS మోడల్తో అది రూ.8-9 లక్షలకు తగ్గే అవకాశం ఉంది. అదే విధంగా టాటా టియాగో EV, MG కామెట్ EVలకు పోటీగా ఒక చిన్న ఎలక్ట్రిక్ కారును కూడా కంపెనీ అభివృద్ధి చేస్తోంది. ఈ మోడల్ ధర సుమారు రూ.7 లక్షలుగా ఉండవచ్చని అంచనా, కానీ బ్యాటరీ సబ్స్క్రిప్షన్ మోడల్ అమలులోకి వస్తే అది రూ.4-5 లక్షల పరిధిలో అందుబాటులోకి రావచ్చు.
ఇవన్నీ కాకుండా అత్యాధునిక ఫీచర్లతో కూడిన ఒక ప్రీమియం ఎలక్ట్రిక్ కారును కూడా మారుతి సిద్ధం చేస్తోంది. ఆధునిక డిజైన్, అత్యుత్తమ టెక్నాలజీతో ఈ మోడల్ను రూపొందించి, తన బ్రాండ్ ఇమేజ్ను మరింత ఉన్నత స్థాయికి తీసుకెళ్లాలని కంపెనీ భావిస్తోంది. మొత్తంగా బడ్జెట్ నుంచి ప్రీమియం వరకు విస్తరించే ఈ ఎలక్ట్రిక్ వ్యూహంతో మారుతి సుజుకి భారత ఈవీ మార్కెట్లో కొత్త పోటీని సృష్టించబోతోంది. వినియోగదారులకు మరిన్ని ఎంపికలు అందుబాటులోకి రానున్నాయి.
మరిన్ని టెక్ వార్తల కోసం ఇక్కడ క్లిక్ చేయండి