భారీ బ్యాటరీ, సరికొత్త ఫీచర్లతో మార్కెట్‌లోకి HMD 102 4G Pro! ధర తెలిస్తే ఫిదా అయిపోతారు

Hmd 102 4g Pro

హెచ్‌ఎమ్‌డీ సంస్థ త్వరలో ‘HMD 102 4G Pro’ ఫీచర్ ఫోన్‌ను మార్కెట్లోకి తీసుకొనుంది. సుమారు రూ.2,199 బడ్జెట్‌లో రానున్న ఈ ఫోన్‌లో 1200mAh బ్యాటరీ, టైప్-సి ఛార్జింగ్ పోర్ట్, ఐపీ52 రేటింగ్, 2 అంగుళాల డిస్‌ప్లే వంటి ఆకట్టుకునే ఫీచర్లను అందించారు. కంపెనీ నుంచి దీనిపై ఇంకా అధికారిక ప్రకటన వెలువడనప్పటికీ, త్వరలోనే ఈ బడ్జెట్ మొబైల్ మార్కెట్లో సందడి చేసే అవకాశం ఉంది. సామాన్య వినియోగదారులను దృష్టిలో ఉంచుకుని రూపొందించిన ఈ లేటెస్ట్ ఫీచర్ ఫోన్‌కు సంబంధించిన పూర్తి వివరాలు తెలుసుకుందాం.

డిస్‌ప్లే పనితీరు

ఈ రాబోయే HMD 102 4G Pro మోడల్‌లో ప్రధానంగా చెప్పుకోవాల్సింది దాని మెరుగైన బ్యాటరీ కెపాసిటీ గురించే. పాత మోడల్‌లో 1000mAh బ్యాటరీ ఉండగా, ఈ సరికొత్త ఫోన్‌లో మరింత శక్తివంతమైన 1200mAh బ్యాటరీని అందించనున్నట్లు తెలుస్తోంది. దీనివల్ల ఫోన్ ఛార్జింగ్ చాలా ఎక్కువ సమయం పాటు నిలబడుతుంది. అంతేకాకుండా ప్రస్తుత ఆధునిక ట్రెండ్‌కు పూర్తిగా తగ్గట్టుగా ఇందులో వేగవంతమైన టైప్-సి (USB-C) ఛార్జింగ్ పోర్ట్‌ను ఇవ్వబోతున్నారు.

సాధారణంగా బడ్జెట్ ఫీచర్ ఫోన్లలో టైప్-సి పోర్ట్ రావడం వినియోగదారులకు ఎంతో ఉపయోగకరంగా ఉంటుంది. ఇక డిస్‌ప్లే విషయానికొస్తే, ఈ HMD 102 4G Pro ఫోన్ 2-అంగుళాల QQVGA ఎల్‌సీడీ డిస్‌ప్లేతో రానుంది. ఇది నమ్మకమైన S30 ప్లస్ ఆపరేటింగ్ సిస్టమ్‌పై పనిచేస్తుందని, దీనికి తోడు యూనిసోక్ 8910FF S ప్రోసెసర్‌ను ఇందులో ఉపయోగించనున్నారని సమాచారం. ఇక ర్యామ్ విషయానికొస్తే 24MB లేదా 48MB ఆప్షన్లు ఉండే అవకాశం ఉంది. మనకు నచ్చిన పాటలు, వీడియోలు దాచుకోవడానికి వీలుగా మైక్రో ఎస్‌డీ కార్డ్ ద్వారా మెమరీని సులభంగా 32GB వరకు పెంచుకునే అద్భుతమైన సదుపాయం కూడా ఇందులో ఉంటుంది.

ఇతర ఫీచర్లు

ఫొటోగ్రఫీ అవసరాల కోసం ఈ ఫోన్ వెనుక వైపు 0.3 మెగాపిక్సెల్ ప్రాథమిక కెమెరాను అందించే అవకాశం ఉంది. అలాగే కనెక్టివిటీ కోసం డ్యూయల్ 4జీ ఎల్‌టీఈ (Dual 4G LTE) మరియు బ్లూటూత్ 4.2 వంటి ఫీచర్లు ఇందులో ఉంటాయి. సంగీత ప్రియుల కోసం ప్రత్యేకంగా 3.5mm హెడ్‌ఫోన్ జాక్, మీడియా ప్లేయర్‌ను కూడా ఇచ్చారు. చిన్ననాటి మధుర జ్ఞాపకాలను గుర్తుచేసే క్లాసిక్ ‘స్నేక్’ గేమ్ కూడా ఇందులో రానుంది. అంతేకాకుండా ఈ ఫోన్‌కు అదనపు రక్షణ కోసం ఐపీ52 (IP52) రేటింగ్ ఉండవచ్చని సమాచారం వెలువడింది.

దీనివల్ల దుమ్ము, చిన్న చిన్న నీటి చుక్కల నుండి ఫోన్‌కు అత్యుత్తమ రక్షణ లభిస్తుంది. ఈ HMD 102 4G Pro ఫోన్ డార్క్ బ్లూ, రెడ్, పర్పుల్ వంటి ఆకర్షణీయమైన రంగుల్లో లభ్యమయ్యే అవకాశం ఉంది. ప్రస్తుతం మార్కెట్లో ఉన్న స్టాండర్డ్ హెచ్‌ఎమ్‌డీ 102 4జీ ఫోన్ ధర దాదాపు రూ.2,199గా ఉండగా, రాబోయే కొత్త ప్రో మోడల్ కూడా దాదాపు ఇదే బడ్జెట్ ధరలో వచ్చే అవకాశం ఉందని టెక్ నిపుణులు భావిస్తున్నారు. అతి త్వరలోనే కంపెనీ ఈ ఫోన్ లాంచ్ తేదీ మరియు అధికారిక ధరను ప్రకటించనుంది.