రెండో టెస్ట్‌లో కోహ్లీ డబుల్ సెంచరీ!

విరాట్ కోహ్లీ మరోసారి తన సత్తా చాటాడు. దక్షిణాఫ్రికాతో జరుగుతున్న రెండో టెస్టులో టీమిండియా కెప్టెన్‌ విరాట్‌ కోహ్లీ (200; 295 బంతుల్లో 28X4) ద్విశతకంతో కదం తొక్కాడు. ఓవర్‌నైట్‌ స్కోర్‌ 273/3తో శుక్రవారం రెండో రోజు ఆటను ప్రారంభించిన కోహ్లీ, వైస్‌ కెప్టెన్‌ రహానె(59; 168బంతుల్లో 8×4)తో కలిసి నాలుగో వికెట్‌కు 178 పరుగుల అమూల్యమైన భాగస్వామ్యం జోడించాడు. ఈ క్రమంలో రహానె అర్ధశతకం తర్వాత మహారాజ్‌ బౌలింగ్‌లో కీపర్‌కి క్యాచ్‌ ఇచ్చి ఔటయ్యాడు. అనంతరం ఆల్‌రౌండర్‌ రవీంద్ర జడేజా(26; 66 బంతుల్లో 2×4)తో కలిసిన కోహ్లీ మరో 107 పరుగుల విలువైన భాగస్వామ్యం నిర్మించాడు. ఈ ద్విశతకంతో కోహ్లీ ఏడు వేల పరుగుల మైలురాయిని కూడా అందుకోవడం విశేషం. దీంతో భారత్‌ భారీ స్కోర్‌ దిశగా పయనిస్తోంది. అంతర్జాతీయ టెస్ట్ క్రికెట్ లో అత్యధికంగా డాన్ బ్రాడ్ మాన్ 12 డబుల్ సెంచరీలు సాధించాడు.