Virat Kohli : వరుస సెంచరీలతో కింగ్ విధ్వంసం.. విరాట్ కోహ్లీ దెబ్బకు సచిన్ టెండూల్కర్ రికార్డుకు గుబులు
భారత స్టార్ బ్యాటర్ విరాట్ కోహ్లీ తన అద్భుతమైన ఫామ్ను కొనసాగిస్తూ దక్షిణాఫ్రికాపై వరుసగా రెండో సెంచరీ నమోదు చేశాడు. రాయ్పూర్లోని షహీద్ వీర్ నారాయణ్ సింగ్ ఇంటర్నేషనల్ స్టేడియంలో జరిగిన రెండో వన్డేలో కోహ్లీ తన కెరీర్లో 84వ అంతర్జాతీయ సెంచరీని కొట్టాడు. గత మ్యాచ్లో 135 పరుగులు చేసిన విరాట్, ఈ సెంచరీతో 2027 వన్డే వరల్డ్ కప్ జట్టులో తన స్థానాన్ని మరింత పదిలం చేసుకున్నాడు.
Virat Kohli : భారత స్టార్ బ్యాటర్ విరాట్ కోహ్లీ తన అద్భుతమైన ఫామ్ను కొనసాగిస్తూ దక్షిణాఫ్రికాపై వరుసగా రెండో సెంచరీ నమోదు చేశాడు. రాయ్పూర్లోని షహీద్ వీర్ నారాయణ్ సింగ్ ఇంటర్నేషనల్ స్టేడియంలో జరిగిన రెండో వన్డేలో కోహ్లీ తన కెరీర్లో 84వ అంతర్జాతీయ సెంచరీని కొట్టాడు. గత మ్యాచ్లో 135 పరుగులు చేసిన విరాట్, ఈ సెంచరీతో 2027 వన్డే వరల్డ్ కప్ జట్టులో తన స్థానాన్ని మరింత పదిలం చేసుకున్నాడు. ఈ సెంచరీతో విరాట్ కోహ్లీ మరో అరుదైన మైలురాయిని చేరుకున్నాడు. ఇది అంతర్జాతీయ క్రికెట్లో స్వదేశంలో కోహ్లీకి 40వ సెంచరీ కావడం విశేషం. ఈ అద్భుతమైన లిస్ట్లో దిగ్గజ ఆటగాడు సచిన్ టెండూల్కర్ మాత్రమే 42 సెంచరీలతో కోహ్లీ కంటే ముందు ఉన్నాడు.
స్వదేశంలో అత్యధిక సెంచరీలు
సచిన్ టెండూల్కర్: 42
విరాట్ కోహ్లీ: 40
రికీ పాంటింగ్: 36
జో రూట్: 34
డేవిడ్ వార్నర్: 31
కోహ్లీకి ఇప్పుడు 37 ఏళ్లు. ఒకవేళ అతను 2027 వరల్డ్ కప్ వరకు వన్డే క్రికెట్ ఆడితే, ఈ రెండు సెంచరీల తేడాను అధిగమించి, సచిన్ టెండూల్కర్ ప్రపంచ రికార్డును బ్రేక్ చేసేందుకు అన్ని అవకాశాలు ఉన్నాయి.
ఫామ్తో ప్రశ్నలకు సమాధానం
ఈ వన్డే సిరీస్ ప్రారంభానికి ముందు, అంతర్జాతీయ క్రికెట్లో కోహ్లీ భవిష్యత్తుపై అనేక చర్చలు, ప్రశ్నలు వచ్చాయి. అయితే వరుసగా బ్యాక్-టు-బ్యాక్ సెంచరీలతో విరాట్ ఆ ప్రశ్నలన్నింటికీ బ్యాట్తోనే సమాధానం చెప్పాడు. కేవలం 90 బంతుల్లోనే సెంచరీ పూర్తి చేయడం చూస్తే, ఈ ఫార్మాట్లో అతను తన స్ట్రైక్ రేట్ను గణనీయంగా మెరుగుపరుచుకున్నాడని స్పష్టమవుతోంది.
రుతురాజ్ తొలి సెంచరీ
ఈ మ్యాచ్లో విరాట్ కోహ్లీకి తోడుగా యువ బ్యాటర్ రుతురాజ్ గైక్వాడ్ కూడా అద్భుత ప్రదర్శన చేశాడు. శ్రేయస్ అయ్యర్ లేకపోవడంతో నాలుగో స్థానంలో బ్యాటింగ్కు వచ్చిన రుతురాజ్, తన కెరీర్లో తొలి వన్డే సెంచరీని నమోదు చేశాడు. అతను 83 బంతుల్లో 105 పరుగులు చేసి, అద్భుతమైన స్ట్రైక్ రేట్ను కొనసాగించాడు. మార్కో జాన్సెన్ బౌలింగ్లో 36వ ఓవర్లో రుతురాజ్ ఔటయ్యాడు.
మ్యాచ్ హైలైట్స్
కోహ్లీ, రుతురాజ్ జోడీ కలిసి మూడో వికెట్కు ఏకంగా 195 పరుగుల భారీ భాగస్వామ్యాన్ని నెలకొల్పారు. ఈ భాగస్వామ్యం భారత ఇన్నింగ్స్కు పటిష్టమైన పునాది వేయడమే కాకుండా, జట్టును విజయం దిశగా నడిపించింది. ఇద్దరు సెంచరీ హీరోలు నిష్క్రమించిన తర్వాత, ఆఖరి పది ఓవర్లలో స్కోరును 400 మార్కుకు చేరుకోవాలనే లక్ష్యంతో, కేఎల్ రాహుల్ ఐదవ స్థానంలో బ్యాటింగ్కు వచ్చాడు.