Team India: రిటైర్మెంట్‌తో షాకిచ్చిన టీమిండియా 3డీ ప్లేయర్.. సోషల్ మీడియాలో భావోద్వేగ పోస్ట్..!
Team India Player Vijay Shankar Retirement: భారత ఆల్‌రౌండర్ విజయ్ శంకర్ విరిటైర్మెంట్ నిర్ణయంతో ఒక విలక్షణమైన ఆల్‌రౌండర్ భారత క్రికెట్ ప్రయాణం ముగిసింది. తీవ్రమైన పోటీ ఉండే భారత క్రీడారంగంలో ఎన్నో ఎత్తుపల్లాలను చూసిన శంకర్.. తనదైన శైలిలో ముద్ర వేశాడు.
Team India Player Vijay Shankar Retirement: భారత ఆల్‌రౌండర్ విజయ్ శంకర్ క్రికెట్ అభిమానులకు ఊహించని షాక్ ఇచ్చాడు. అన్ని రకాల భారతీయ క్రికెట్ ఫార్మాట్లకు గుడ్‌బై చెపుతున్నట్లు ఆయన సంచలన ప్రకటన చేశాడు. అంతర్జాతీయ మ్యాచ్‌లతో పాటు దేశవాళీ క్రికెట్‌కు కూడా రిటైర్మెంట్ ప్రకటిస్తూ తీసుకున్న ఈ నిర్ణయం ప్రస్తుతం క్రీడా ప్రపంచంలో తీవ్ర చర్చనీయాంశంగా మారింది.
సంచలన నిర్ణయం.. సోషల్ మీడియా వేదికగా ప్రకటన..
తమిళనాడుకు చెందిన 35 ఏళ్ల ఈ స్టార్ ఆల్‌రౌండర్ తన రిటైర్మెంట్ నిర్ణయాన్ని సామాజిక మాధ్యమాల ద్వారా అధికారికంగా పంచుకున్నాడు. ఇన్నాళ్లూ తనకు మద్దతుగా నిలిచిన భారత క్రికెట్ నియంత్రణ మండలి (BCCI), తమిళనాడు క్రికెట్ అసోసియేషన్, తోటి ఆటగాళ్లు, కోచ్‌లు, అభిమానులకు ఆయన హృదయపూర్వక కృతజ్ఞతలు తెలిపాడు. మైదానంలో దేశం కోసం ఆడటం తన జీవితంలో మరువలేని అనుభూతిని ఇచ్చిందని, ఈ ప్రయాణంలో తనకు సహకరించిన ప్రతి ఒక్కరికీ రుణపడి ఉంటానని విజయ్ శంకర్ ఎమోషనల్ అయ్యాడు.
ఆ నిలకడైన ప్రదర్శనే టీమిండియాలోకి తెచ్చింది..!
దేశవాళీ క్రికెట్‌లో తమిళనాడు తరపున విజయ్ శంకర్ అద్భుతమైన ప్రదర్శన చేశాడు. మిడిలార్డర్‌లో నమ్మకమైన బ్యాటింగ్‌తో పాటు, మీడియం పేస్ బౌలింగ్‌తో జట్టుకు ఎన్నో విజయాలు అందించాడు. ఈ నిలకడైన ఆటతీరే ఆయనకు జాతీయ జట్టులో చోటు సంపాదించి పెట్టింది. 2018లో శ్రీలంకలో జరిగిన నిదహాస్ ట్రోఫీ ద్వారా అంతర్జాతీయ టీ20ల్లోకి అరంగేట్రం చేసిన శంకర్.. ఆ తర్వాత వన్డేల్లోనూ భారత జట్టుకు ప్రాతినిధ్యం వహించారు. హార్దిక్ పాండ్యాకు ప్రత్యామ్నాయంగా సెలెక్టర్లు ఆయనకు కీలక బాధ్యతలు అప్పగించారు.
2019 ప్రపంచకప్ టాపిక్.. ఆ ‘త్రీడీ’ ట్యాగ్..
విజయ్ శంకర్ కెరీర్‌లో అత్యంత కీలకమైన ఘట్టం 2019 వన్డే ప్రపంచకప్. అప్పట్లో అద్భుత ఫామ్‌లో ఉన్న అంబటి రాయుడును పక్కనపెట్టి మరీ సెలెక్టర్లు శంకర్‌ను ప్రపంచకప్ జట్టులోకి ఎంపిక చేశారు. ఆ సమయంలో చీఫ్ సెలెక్టర్ ఎంఎస్‌కే ప్రసాద్ ఆయనను ‘త్రీ డైమెన్షనల్’ (త్రీడీ) ప్లేయర్‌గా అభివర్ణించారు. బ్యాటింగ్, బౌలింగ్, ఫీల్డింగ్ మూడింటిలోనూ రాణించగలరని చెప్పిన ఆ మాట క్రీడా వర్గాల్లో పెద్ద సంచలనంగా మారింది. ఆ ప్రపంచకప్‌లో పాకిస్తాన్‌తో జరిగిన మ్యాచ్‌లో తాను వేసిన తొలి బంతికే వికెట్ తీసి విజయ్ శంకర్ రికార్డు సృష్టించాడు. అయితే ఆ తర్వాత గాయం కారణంగా ఆయన టోర్నీ మధ్యలోనే నిష్క్రమించాల్సి వచ్చింది.
ఐపీఎల్‌లోనూ తనదైన ముద్ర..
భారత దేశవాళీ లీగ్ ఐపీఎల్‌లోనూ విజయ్ శంకర్ సుదీర్ఘ కాలం పాటు కొనసాగాడు. సన్‌రైజర్స్ హైదరాబాద్, ఢిల్లీ డేర్‌డెవిల్స్, గుజరాత్ టైటాన్స్ వంటి జట్లకు ఆయన ప్రాతినిధ్యం వహించాడు. ముఖ్యంగా గుజరాత్ టైటాన్స్ జట్టు టైటిల్ గెలవడంలో, తర్వాతి సీజన్‌లో రన్నరప్‌గా నిలవడంలో మిడిలార్డర్ బ్యాటర్‌గా తనదైన శైలిలో రాణించాడు. ఒత్తిడి సమయంలో జట్టును ఆదుకుంటూ పలు కీలక ఇన్నింగ్స్‌లు ఆడాడు.
విజయ్ శంకర్ రిటైర్మెంట్ నిర్ణయంతో ఒక విలక్షణమైన ఆల్‌రౌండర్ భారత క్రికెట్ ప్రయాణం ముగిసింది. తీవ్రమైన పోటీ ఉండే భారత క్రీడారంగంలో ఎన్నో ఎత్తుపల్లాలను చూసిన శంకర్.. తనదైన శైలిలో ముద్ర వేశాడు. భారతీయ పిచ్‌లపై ఆట ముగిసినప్పటికీ, ఆయన భవిష్యత్తులో విదేశీ లీగ్‌లలో ఆడే అవకాశం ఉందని క్రీడా విశ్లేషకులు భావిస్తున్నారు. సెకండ్ ఇన్నింగ్స్ ప్రారంభించబోతున్న విజయ్ శంకర్‌కు అభిమానులు సామాజిక మాధ్యమాల ద్వారా ఆల్‌ ది బెస్ట్ చెబుతున్నారు.