Mohammed Siraj : ఓవల్ టెస్ట్లో సిరాజ్ బిగ్ మిస్టేక్.. కష్టాల్లో పడిన టీమిండియా..చేతులు కాలిన తర్వాత…
ఓవల్ టెస్ట్లో మహ్మద్ సిరాజ్ ఆరు వికెట్లు తీసినప్పటికీ, ఒక కీలక క్యాచ్ను బౌండరీ లైన్పై వదిలేయడం ద్వారా టీమ్ ఇండియాను ఇబ్బందుల్లోకి నెట్టాడు. ఈ పొరపాటు వల్ల హ్యారీ బ్రూక్కు లైఫ్లైన్ లభించింది. ఈ సంఘటన కు సంబంధించిన ఈ వీడియో సోషల్ మీడియాలో వైరల్ అవుతుంది.
Mohammed Siraj : ఇంగ్లాండ్ పర్యటనలో భారత స్టార్ ఫాస్ట్ బౌలర్ మహ్మద్ సిరాజ్ తన ప్రదర్శనతో అందరినీ ఆకట్టుకున్నాడు. ఐదు టెస్ట్ మ్యాచ్ల ఈ సిరీస్లో అత్యధిక వికెట్లు తీసిన బౌలర్గా నిలిచాడు. ముఖ్యంగా జస్ప్రీత్ బుమ్రా లేని మ్యాచ్లలో సిరాజ్ అద్భుతంగా రాణించాడు. ఓవల్లో జరుగుతున్న చివరి టెస్ట్ మ్యాచ్లో కూడా అతను అదే ప్రదర్శన కనబరిచాడు. కానీ, మ్యాచ్ నాలుగో రోజున అతను చేసిన ఒక పొరపాటు టీమ్ ఇండియాను ఇబ్బందుల్లో పడేసింది.
ఓవల్ టెస్ట్ మ్యాచ్ నాలుగో రోజు, ఇంగ్లాండ్ జట్టు 374 పరుగుల లక్ష్య ఛేదనలో బ్యాటింగ్ ప్రారంభించింది. ఆ రోజు ఇంగ్లాండ్ ఒక వికెట్ నష్టానికి 50 పరుగుల నుంచి ఆట మొదలుపెట్టింది. ఓపెనర్ బెన్ డకెట్ వేగంగా హాఫ్ సెంచరీ పూర్తి చేశాడు. కానీ ప్రసిద్ధ్ కృష్ణ అతడిని వెంటనే అవుట్ చేశాడు. ఆ తర్వాత సిరాజ్, ఇంగ్లాండ్ కెప్టెన్ ఆలీ పోప్ను ఎల్బిడబ్ల్యుగా అవుట్ చేసి పెవిలియన్కు పంపాడు. ఈ మ్యాచ్లో ఇది సిరాజ్కు ఆరో వికెట్.
106 పరుగులకే ఇంగ్లాండ్ 3 వికెట్లు కోల్పోవడంతో టీమిండియా మంచి స్థితిలో ఉన్నట్లు కనిపించింది. ఈ సమయంలో జో రూట్, హ్యారీ బ్రూక్ భాగస్వామ్యంపై అందరి దృష్టి పడింది. హ్యారీ బ్రూక్ దూకుడుగా ఆడుతూ బౌండరీలు కొట్టడం మొదలుపెట్టాడు. సరిగ్గా 35వ ఓవర్లో ప్రసిద్ధ్ కృష్ణ వేసిన మొదటి బంతిని బ్రూక్ హుక్ షాట్ ఆడగా, బంతి నేరుగా డీప్ ఫైన్ లెగ్ బౌండరీ దగ్గర ఫీల్డింగ్ చేస్తున్న సిరాజ్ చేతిలోకి వెళ్లింది.
సిరాజ్ క్యాచ్ను సునాయాసంగా పట్టుకున్నాడు. కానీ సరిగ్గా అదే సమయంలో పెద్ద పొరపాటు చేశాడు. తాను బౌండరీకి ఎంత దగ్గరగా ఉన్నాడో మర్చిపోయి, బ్యాలెన్స్ కోల్పోకుండా ఉండటానికి ఒక అడుగు వెనక్కి వేశాడు. ఆ అడుగు నేరుగా బౌండరీ లైన్ను తాకింది. అంతే, అంతవరకు ప్రసిద్ధ్ కృష్ణతో సహా మొత్తం టీమ్ ఇండియా ముఖాల్లో ఉన్న ఆనందం ఒక్కసారిగా ఆవిరైపోయింది. సిరాజ్ తాను చేసిన తప్పును నమ్మలేకపోయాడు. అతను తన చేతులతో ముఖం కప్పుకున్నాడు. అదే సమయంలో సంబరాలు చేసుకుంటున్న భారత అభిమానులు నిరాశకు గురయ్యారు. ఇంగ్లాండ్ అభిమానుల్లో మాత్రం కొత్త ఉత్సాహం నిండింది.
Out? Six!?
What’s Siraj done 😱 pic.twitter.com/hp6io4X27l
— England Cricket (@englandcricket) August 3, 2025
ఈ క్యాచ్ డ్రాప్ అయినప్పుడు హ్యారీ బ్రూక్ కేవలం 21 బంతుల్లో 19 పరుగులు మాత్రమే చేసి ఉన్నాడు. సిరాజ్ పొరపాటుతో అతనికి ఒక లైఫ్లైన్ లభించడంతో పాటు 6 పరుగులు కూడా లభించాయి. అక్కడి నుంచి బ్రూక్ మరింత దూకుడుగా ఆడాడు. అదే ఓవర్లో ప్రసిద్ధ్పై మరో 2 ఫోర్లు కొట్టి జట్టు స్కోరును త్వరగా 150 దాటించాడు. మొదటి సెషన్ ముగిసే సమయానికి బ్రూక్ కేవలం 30 బంతుల్లో 38 పరుగులు చేసి, రూట్తో కలిసి 63 బంతుల్లో 58 పరుగుల భాగస్వామ్యం నెలకొల్పాడు.
మరిన్ని క్రికెట్ వార్తల కోసం ఇక్కడ క్లిక్ చేయండి..