Rohit Sharma : ఆకాశమే హద్దుగా హిట్ మ్యాన్ విధ్వంసం..650 సిక్సర్లతో రోహిత్ శర్మ వరల్డ్ రికార్డ్

Ind Vs Nz Rohit Sharma Records

Rohit Sharma : వడోదరలోని బీసీఏ స్టేడియంలో న్యూజిలాండ్‌తో జరిగిన తొలి వన్డే మ్యాచ్ రోహిత్ శర్మ కెరీర్‌లో ఒక చిరస్మరణీయ జ్ఞాపకంగా నిలిచిపోయింది. ఈ మ్యాచ్‌లో రోహిత్ తన 650వ అంతర్జాతీయ సిక్సర్‌ను బాది, ఈ ఘనత సాధించిన ప్రపంచంలోనే మొట్టమొదటి బ్యాటర్‌గా చరిత్రకెక్కారు. కివీస్ బౌలర్ కైల్ జేమిసన్ వేసిన బంతిని స్టాండ్స్‌లోకి పంపడం ద్వారా రోహిత్ ఈ అరుదైన ఫీట్‌ను సొంతం చేసుకున్నారు. గతంలోనే అత్యధిక సిక్సర్ల రికార్డును తన పేరిట లిఖించుకున్న హిట్ మ్యాన్, ఇప్పుడు ఆ సంఖ్యను ఏకంగా 650కి చేర్చి తన రికార్డును మరింత సుస్థిరం చేసుకున్నారు.

ఈ మ్యాచ్‌లో రోహిత్ కేవలం 650 సిక్సర్ల మార్కును అందుకోవడమే కాకుండా, మరో కీలక రికార్డును కూడా బద్దలు కొట్టారు. వన్డే క్రికెట్‌లో ఓపెనర్‌గా అత్యధిక సిక్సర్లు కొట్టిన ఆటగాడిగా వెస్టిండీస్ దిగ్గజం క్రిస్ గేల్ (328 సిక్సర్లు) రికార్డును రోహిత్ అధిగమించారు. ప్రస్తుతం రోహిత్ ఖాతాలో ఓపెనర్‌గా 329 సిక్సర్లు ఉన్నాయి. కేవలం 191 ఇన్నింగ్స్‌ల్లోనే రోహిత్ ఈ ఘనత సాధించడం గమనార్హం. అదే గేల్ ఈ రికార్డు కోసం 284 ఇన్నింగ్స్‌లు తీసుకున్నారు.

రోహిత్ శర్మ తన అంతర్జాతీయ కెరీర్‌లో ఇప్పటివరకు మూడు ఫార్మాట్లు కలిపి 650 సిక్సర్లు పూర్తి చేసుకున్నారు. వీటిలో వన్డేల్లో 357 సిక్సర్లు, టీ20ల్లో 205 సిక్సర్లు మరియు టెస్టుల్లో 88 సిక్సర్లు ఉన్నాయి. ఈ జాబితాలో క్రిస్ గేల్ 553 సిక్సర్లతో రెండో స్థానంలో ఉండగా, పాకిస్థాన్‌కు చెందిన షాహిద్ అఫ్రిది 476 సిక్సర్లతో మూడో స్థానంలో ఉన్నారు. హిట్ మ్యాన్ దరిదాపుల్లో కూడా ఏ ఇతర యాక్టివ్ క్రికెటర్ లేకపోవడం అతని ఆధిపత్యానికి నిదర్శనం.

సుమారు 16 ఏళ్ల తర్వాత వడోదరలో జరిగిన పురుషుల అంతర్జాతీయ మ్యాచ్‌లో రోహిత్ ఈ రికార్డు సృష్టించడంతో స్టేడియం హోరెత్తిపోయింది. రోహిత్ 29 బంతుల్లో 26 పరుగులు (3 ఫోర్లు, 2 సిక్సర్లు) చేసి స్వల్ప స్కోరుకే అవుట్ అయినప్పటికీ, తన చిన్న ఇన్నింగ్స్‌తోనే ప్రపంచ రికార్డును నెలకొల్పారు. అదే సమయంలో విరాట్ కోహ్లీ కూడా అంతర్జాతీయ క్రికెట్‌లో 28,000 పరుగుల మైలురాయిని దాటి అభిమానులకు రెట్టింపు ఉత్సాహాన్ని ఇచ్చారు.

మరిన్ని క్రికెట్ వార్తల కోసం ఇక్కడ చూడండి..