Video: వీడూ ఓ బౌలరేనా? అని తిట్టినోళ్లకు ఒక్క బాల్‌తో సమాధానం ఇచ్చి పడేశాడుగా..!
భారత్-ఆఫ్ఘానిస్థాన్ టెస్ట్ మ్యాచ్లో టీమిండియా 564 పరుగులు చేసి డిక్లేర్ చేసింది. ఆఫ్ఘాన్ బ్యాటింగ్‌లో మానవ్ సుతార్ మొదటి వికెట్ తీయగా, అందరి దృష్టి ప్రసిద్ధ్ కృష్ణపై పడింది. గతంలో విమర్శలు ఎదుర్కొన్న ప్రసిద్ధ్, అద్భుతమైన బంతితో సెదిఖుల్లా అటల్‌ను క్లీన్ బౌల్డ్ చేసి తన సత్తా చాటాడు.
ప్రస్తుతం టీమిండియా, ఆఫ్ఘనిస్థాన్‌తో టెస్ట్ మ్యాచ్ ఆడుతోంది. ఈ మ్యాచ్లో టాస్ గెలిచిన భారత్ తొలి బ్యాటింగ్ ఎంచుకుంది. కెప్టెన్ శుబ్‌‌మన్ గిల్, ఓపెనర్ కేఎల్ రాహుల్ సెంచరీలతో చెలరేగగా, అలాగే సాయి సుదర్శన్, రిషభ్ పంత్‌లు హాఫ్ సెంచరీలతో రాణించడంతో భారత్ భారీ స్కోర్ చేసింది. రెండో రోజు 8 వికెట్ల నష్టానికి 564 పరుగులు చేసి ఇన్నింగ్స్ డిక్లేర్ చేసి ఆఫ్ఘాన్‌ను బ్యాటింగ్‌కు ఆహ్వానించారు. ఆ జట్టును ఆరంభంలోనే తొలి మ్యాచ్ ఆడుతున్న మానవ్ సుతార్ దెబ్బ తీశాడు. తొలి వికెట్‌గా ఆదిల్ మాలిక్‌ను అవుట్ చేసి పెవిలియన్ పంపాడు.
ఆ తర్వాత ఇన్నింగ్స్ 9వ ఓవర్‌లో మరో వికెట్ పడింది. ఆఫ్ఘాన్ ఓపెనర్ సెదిఖుల్లా అటల్ క్లీన్ బౌల్డ్ అయ్యాడు. ఆ బాల్ చూస్తే ఎవరైనా వావ్ అనాల్సిందే. ఈ వికెట్ పడిన తీరు చూసి ప్రతి క్రికెట్ అభిమాని గుండె నిండిపోవాల్సిందే. అంత చక్కని బాల్‌తో సెదిఖుల్లాను క్లీన్ బౌల్డ్ చేసింది ఎవరో తెలుసా? మొన్నటి వరకు వీడూ ఓ బౌలరేనా, అసలు వీడ్ని ఎందుకు టీమిండియాకు సెలెక్ట్ చేస్తున్నారంటూ అందరితో తిట్లు తిన్న బౌలర్ ప్రసిద్ధ్ కృష్ణ. మంచి హైట్, స్పీడ్‌తో బౌలింగ్ వేసే ప్రసిద్ధ్ తన స్థాయికి తగ్గ ప్రదర్శన చేయకా చాలా విమర్శలే ఎదుర్కొన్నాడు.
కానీ ఆఫ్ఘాన్‌తో జరుగుతున్న టెస్ట్ మ్యాచ్లో అయితే అద్బుతమైన బాల్‌తో బ్యాటర్‌ వద్ద ఆన్సర్ లేకుండా చేశాడు. దీంతో తనపై వచ్చిన విమర్శలకు ఎంతో కొంత సమాధానం అయితే ఈ వికెట్‌తో చెప్పాడని అనుకోవచ్చు. ఇంకా ఈ మ్యాచ్లో చాలా గేమ్ మిగిలి ఉంది. ప్రస్తుతం ప్రసిద్ధ్ మంచి బౌలింగ్‌తో ఆకట్టుకుంటున్నాడు. ఇంకా ఈ మ్యాచ్లో మరిన్ని వికెట్లు తీసి.. తనపై వచ్చిన విమర్శలకు పూర్తి స్థాయిలో సమాధానం చెప్పాలని అనుకుంటూ ఉంటాడు. చూడాలి మరి ఏం జరుగుతుందో ప్రసిద్ధ్ మరిన్ని వికెట్లు తన ఖాతాలో వేసుకుంటాడో లేదో. ప్రస్తుతం ఆఫ్ఘాన్ 77 పరుగులకు 3 వికెట్లు కోల్పోయి కష్టాల్లో ఉంది.
మరిన్ని క్రికెట్ వార్తల కోసం ఇక్కడ క్లిక్ చేయండి