MS Dhoni Salary: ఒక్క మ్యాచ్ ఆడకుండా ధోనీ ఎంత జీతం తీసుకున్నాడో తెలుసా..?

MS Dhoni IPL Salary: గురువారం రాత్రి గుజరాత్ టైటాన్స్‌తో జరిగిన మ్యాచ్‌లో 89 పరుగుల భారీ తేడాతో చెన్నై సూపర్ కింగ్స్ ఘోర పరాజయాన్ని చవిచూసింది. ఈ ఓటమితో సీఎస్‌కే ప్లేఆఫ్స్ రేసు నుంచి అధికారికంగా నిష్క్రమించింది. అయితే ఈ పరాజయం కేవలం టోర్నీ ముగింపు మాత్రమే కాదు.. పసుపు రంగు జెర్సీలో తమ ప్రియతమ నాయకుడు మహేంద్ర సింగ్ ధోనీని మళ్లీ మైదానంలో చూడాలనుకున్న కోట్ల మంది అభిమానుల ఆశలపై పిడుగుపాటులాంటిది. ఐపీఎల్ చరిత్రలోనే ధోనీ ఒక్క మ్యాచ్ కూడా ఆడకుండా ఒక సీజన్‌ను ముగించడం ఇదే తొలిసారి కావడంతో అభిమానులు తీవ్ర నిరాశలో మునిగిపోయారు.

గాయాల వేట.. మైదానానికి దూరమైన ధోనీ..

ఈ సీజన్ ప్రారంభానికి ముందే చెన్నైలో జరిగిన ముందస్తు శిక్షణా శిబిరంలో ధోనీ తీవ్రమైన పిక్క కండరాల గాయానికి గురయ్యాడు. మొదట్లో ఈ గాయం నుంచి కోలుకోవడానికి కేవలం రెండు వారాల సమయం పడుతుందని భావించినప్పటికీ, వయసు రీత్యా కోలుకునే ప్రక్రియ ఆలస్యమైంది. టోర్నీ మధ్యలో ఆయన కోలుకుంటున్నారనే వార్తలు వచ్చినప్పటికీ, దురదృష్టవశాత్తూ బొటనవేలికి మరో గాయం కావడంతో ఆయన పునరాగమనం పూర్తిగా అసాధ్యంగా మారింది. సీఎస్‌కే ప్లేఆఫ్స్‌కు అర్హత సాధిస్తేనే ధోనీ జట్టుతో చేరుతారని బ్యాటింగ్ కోచ్ మైఖేల్ హస్సీ స్పష్టం చేసినప్పటికీ, గుజరాత్ చేతిలో ఓటమితో ఆ ఆశలు కూడా అడియాసలయ్యాయి.

ఇది కూడా చదవండి: IPL 2026: తొలి క్వాలిఫైయర్‌లో SRH ఎంట్రీ అవ్వాలంటే.. RCBపై ఎంత తేడాతో గెలవాలంటే?

ఒక్క మ్యాచ్ ఆడకపోయినా రూ. 4 కోట్లు ఎలా వస్తాయి?

మైదానంలో అడుగుపెట్టకపోయినా ధోనీకి సీఎస్‌కే యాజమాన్యం రూ. 4 కోట్ల పూర్తి వేతనాన్ని చెల్లించనుంది. అంతర్జాతీయ క్రికెట్‌కు వీడ్కోలు పలికి ఐదేళ్లు దాటిన భారతీయ ఆటగాళ్లను తక్కువ ధరకే జట్టులో ఉంచుకునే ‘అన్‌క్యాప్డ్ ప్లేయర్’ నిబంధన కింద సీఎస్‌కే ధోనీని రూ. 4 కోట్లకు అట్టిపెట్టుకుంది. ఇది ఒక స్థిరమైన ఒప్పందం కావడం వల్ల, ఆటగాడు ఎన్ని మ్యాచ్‌లు ఆడాడనే దానితో సంబంధం లేకుండా పూర్తి మొత్తాన్ని చెల్లించాల్సి ఉంటుంది. అయితే, ప్రతి మ్యాచ్‌కు లభించే రూ. 7.5 లక్షల మ్యాచ్ ఫీజును మాత్రం ధోనీ కోల్పోనున్నారు. అంతేకాకుండా, ఐపీఎల్ ఆటగాళ్లకు ఉండే పూర్తి బీమా సౌకర్యం కారణంగా, గాయం వల్ల మ్యాచ్‌లకు దూరమైతే ఆ ఆర్థిక భారాన్ని బీమా సంస్థే భరిస్తుంది.

తొలి సీజన్ నుంచి ఇప్పటివరకు.. ధోనీ ఐపీఎల్ సంపాదన..

2008లో ఐపీఎల్ ప్రారంభమైనప్పుడు రూ. 6 కోట్ల ధరతో ప్రయాణాన్ని మొదలుపెట్టిన ధోనీ, ఒకానొక దశలో ఏడాదికి రూ. 15 కోట్ల అత్యున్నత పారితోషికాన్ని అందుకున్నాడు. తన సుదీర్ఘ ఐపీఎల్ కెరీర్‌లో చెన్నై సూపర్ కింగ్స్, రైజింగ్ పూణే సూపర్‌జైంట్స్ తరపున మొత్తం 278 మ్యాచ్‌లు ఆడిన ధోనీ, 38.30 సగటుతో, 137.45 స్ట్రైక్ రేట్‌తో ఏకంగా 5,439 పరుగులు సాధించి తిరుగులేని రికార్డు సృష్టించాడు.

ఇది కూడా చదవండి: ‘ఎవరున్నా లేకపోయినా.. 2027 ప్రపంచకప్‌లో ఈ ఇద్దరు ఉంటే చాలు.. ట్రోఫీ టీమిండియాదే..’

ధోని అందుకున్న శాలరీ వివరాలు (భారతీయ రూపాయలలో)..

2008-2010, చెన్నై సూపర్ కింగ్స్, రూ.. 6 కోట్లు

2011-2013, చెన్నై సూపర్ కింగ్స్, రూ. 8.28 కోట్లు

2014-2015, చెన్నై సూపర్ కింగ్స్, రూ. 12.5 కోట్లు

2016-2017, రైజింగ్ పూణే సూపర్‌జైంట్స్, రూ. 12.5 కోట్లు

2018-2021, చెన్నై సూపర్ కింగ్స్, రూ. 15 కోట్లు

2022-2024, చెన్నై సూపర్ కింగ్స్, రూ. 12 కోట్లు

2025-2026, చెన్నై సూపర్ కింగ్స్, రూ. 4 కోట్లు

మహేంద్ర సింగ్ ధోనీ కేవలం ఒక ఆటగాడు మాత్రమే కాదు, చెన్నై సూపర్ కింగ్స్ జట్టుకు ఒక భావోద్వేగం. ఈ సీజన్‌లో ఆయన బ్యాటింగ్‌ను చూడలేకపోయామనే బాధ అభిమానుల్లో ఉన్నప్పటికీ, నిబంధనల ప్రకారం ఆయనకు దక్కాల్సిన గౌరవం, పారితోషికం పూర్తిగా లభిస్తుండటం గమనార్హం. రాబోయే కాలంలో ధోనీ మెంటార్‌గా లేదా సరికొత్త పాత్రలో కనిపిస్తారేమో చూడాలి.

మరిన్ని క్రీడా వార్తల కోసం ఇక్కడ క్లిక్ చేయండి..