KL Rahul : మైదానంలో అంపైర్ అవతారం ఎత్తిన రాహుల్.. మ్యాచ్ వదిలేసి పెవిలియన్ వైపు పరిగెత్తిన ప్లేయర్లు

KL Rahul : ఢిల్లీలోని అరుణ్ జైట్లీ స్టేడియంలో భారత్, వెస్టిండీస్ మధ్య జరుగుతున్న రెండో టెస్ట్ మ్యాచ్‌ మూడో రోజున ఒక ఫన్నీ సంఘటన జరిగింది. లంచ్‌ విరామానికి సరిగ్గా ముందు, టీమిండియా ఓపెనర్ కేఎల్ రాహుల్ చేసిన ఒక పని వల్ల మైదానంలో గందరగోళం ఏర్పడింది. రాహుల్ చేసిన పనిని చూసి, సెషన్ ముగిసిపోయిందేమోనని ఆటగాళ్లు, కామెంటేటర్లు కూడా తప్పుగా అర్థం చేసుకున్నారు. దాంతో కొందరు ఆటగాళ్లు పెవిలియన్‌కు తిరిగి వెళ్లడం మొదలుపెట్టారు. అయితే, అంపైర్లు వెంటనే స్పందించి, అసలు విషయం చెప్పడంతో ఆ గందరగోళం తొలగిపోయింది. ప్రస్తుతం కేఎల్ రాహుల్ చేసిన ఈ పనికి సంబంధించిన వీడియో సోషల్ మీడియాలో వైరల్ అవుతోంది.

కేఎల్ రాహుల్ ఏం చేశాడు?

మూడో రోజు తొలి సెషన్ సమయంలో ఈ సంఘటన జరిగింది. లంచ్‌కు కేవలం ఒక ఓవర్ మాత్రమే మిగిలి ఉండగా, కేఎల్ రాహుల్ ఫీల్డింగ్ ప్లేస్ మార్చుకోవడానికి వెళుతూ అనుకోకుండా తన చేతితో వికెట్లపై ఉన్న బెయిల్స్‌ను కింద పడేశాడు. సాధారణంగా, సెషన్ పూర్తయిన తర్వాత అంపైర్లు స్టంప్‌లపై ఉన్న బెయిల్స్‌ను తీసివేస్తారు.

రాహుల్ ఇలా బెయిల్స్ పడవేయడంతో.. కొందరు ఆటగాళ్లకు, కామెంటేటర్లకు సెషన్ పూర్తయిపోయిందనే తప్పుడు సిగ్నల్ వెళ్లింది. దాంతో కొందరు విండీస్ ఆటగాళ్లు డ్రెస్సింగ్ రూమ్‌కు వెళ్లేందుకు సిద్ధమయ్యారు. కామెంటేటర్ మురళీ కార్తీక్ కూడా స్కోర్‌కార్డు చదవడం మొదలుపెట్టాడు. దీంతో మైదానంలో కాసేపు అయోమయం నెలకొంది.

Opener ✅Middle-Order ✅Finisher ✅Wicket-keeper ✅Captain ✅

Ladies & Gentlemen,we present to you KL Rahul, the UMPIRE 🤣🤣pic.twitter.com/hvb7WWoBcK

— Jyotirmay Das (@dasjy0tirmay) October 12, 2025

అంపైర్ల జోక్యం, ఆట కొనసాగింపు

పరిస్థితిని అర్థం చేసుకున్న అంపైర్లు వెంటనే జోక్యం చేసుకుని, ఆటగాళ్లకు ఇంకా ఒక ఓవర్ మిగిలి ఉందని స్పష్టం చేశారు. దాంతో రవీంద్ర జడేజా ఆ మిగిలిన ఒక ఓవర్‌ను పూర్తి చేశాడు. ఆ తర్వాతే అంపైర్లు లంచ్‌ విరామాన్ని ప్రకటించారు. కేఎల్ రాహుల్ చేసిన ఈ సరదా పని వల్ల కొద్దిసేపు ఆట ఆగిపోయినా, అంతా నవ్వుకున్నారు. ఈ వీడియో ప్రస్తుతం క్రికెట్ అభిమానులను ఆకట్టుకుంటోంది.

టెస్ట్‌లో భారత్ పట్టు

ఈ మ్యాచ్‌లో టీమిండియా స్ట్రాంగ్ పొజిషన్లో ఉంది. భారత్ మొదటి ఇన్నింగ్స్‌లో 5 వికెట్ల నష్టానికి 518 పరుగులు చేసి డిక్లేర్ చేసింది. దీనికి సమాధానంగా వెస్టిండీస్ జట్టు తొలి ఇన్నింగ్స్‌లో 248 పరుగులకే ఆలౌట్ అయింది. దీంతో విండీస్‌ను ఫాలోఆన్ ఆడవలసిందిగా టీమిండియా ఆదేశించింది. మూడో రోజు ఆట ముగిసే సమయానికి వెస్టిండీస్ తమ రెండో ఇన్నింగ్స్‌లో 2 వికెట్ల నష్టానికి 173 పరుగులు చేసింది. ఓపెనర్ జాన్ క్యాంప్‌బెల్ (87 నాటౌట్), షై హోప్ (66 నాటౌట్) క్రీజులో ఉన్నారు. ఇన్నింగ్స్ ఓటమిని తప్పించుకోవడానికి విండీస్‌కు ఇంకా 97 పరుగులు చేయాల్సి ఉంది.

మరిన్ని క్రీడా వార్తల కోసం ఇక్కడ క్లిక్ చేయండి..