IND vs NZ: ఐసీసీ నాకౌట్ మ్యాచ్లలో టీమిండియా ప్రదర్శన.. షాకిస్తోన్న న్యూజిలాండ్ టీం..
IND vs NZ, ICC World Cup 2023: రోహిత్ శర్మ నేతృత్వంలోని టీమ్ ఇండియా 20 ఏళ్ల తర్వాత లీగ్ దశలో న్యూజిలాండ్ను 4 వికెట్ల తేడాతో ఓడించి వన్డే ప్రపంచ కప్ మ్యాచ్ను గెలుచుకుని చరిత్ర సృష్టించింది. అయితే ఇప్పుడు నాకౌట్ దశలో మళ్లీ కివీస్తో తలపడేందుకు సిద్ధమైంది. అయితే, గత రికార్డులను పరిశీలిస్తే ఈమ్యాచ్ టీమిండియాకు అంత ఈజీ కాదని తెలుస్తోంది.
వన్డే ప్రపంచ కప్ (ICC World Cup 2023)లో, టీమిండియా తన చివరి లీగ్ మ్యాచ్ని ఈ ఆదివారం బెంగళూరులో నెదర్లాండ్స్ (IND vs NED)తో ఆడనుంది. అయితే ఇప్పటి వరకు ఆడిన ఎనిమిది మ్యాచ్ల్లో అద్భుతమైన ప్రదర్శన కనబరిచి సెమీఫైనల్లో తమ స్థానాన్ని ఖాయం చేసుకుంది. దీంతో పాయింట్ల జాబితాలో తొలి స్థానం కైవసం చేసుకుంది. ఈ సందర్భంలో న్యూజిలాండ్ జట్టు సెమీఫైనల్లో నాలుగో స్థానంలో నిలిచింది. దీంతో కివీస్ జట్టుతో టీమిండియా తలపడడం దాదాపు ఖాయమైంది. రోహిత్ శర్మ సారథ్యంలో లీగ్ దశలో న్యూజిలాండ్ జట్టును 4 వికెట్ల తేడాతో ఓడించిన టీమిండియా వన్డే ప్రపంచకప్ మ్యాచ్ను 20 ఏళ్ల తర్వాత గెలిచి చరిత్ర సృష్టించింది. అయితే ఇప్పుడు నాకౌట్ దశలో మళ్లీ కివీస్తో తలపడడం టీమ్ ఇండియాకు అంత సులువు కాదు. ఎందుకంటే కివీస్ దళం నాకౌట్ మ్యాచ్లలో భారత్కు ఎన్నో గాయాలను చేసింది.
ముఖాముఖి పోరులో ఎవరిది పైచేయి..
ఐసీసీ నాకౌట్లో ఇప్పటి వరకు భారత జట్టు మూడుసార్లు న్యూజిలాండ్తో క్రికెట్ చరిత్రలో ఆడింది. 2000లో జరిగిన ఐసీసీ ఛాంపియన్స్ ట్రోఫీ ఫైనల్లో ఇరు జట్లు తొలిసారి తలపడ్డాయి. నైరోబీ మైదానంలో జరిగిన ఈ మ్యాచ్లో భారత జట్టు 4 వికెట్ల తేడాతో ఓడిపోయింది. దీని తర్వాత 2019లో జరిగిన వన్డే ప్రపంచకప్లో సెమీ ఫైనల్ మ్యాచ్లో ఇరు జట్లు తలపడ్డాయి. ఆ మ్యాచ్లోనూ కివీస్ 18 పరుగుల తేడాతో విజయం సాధించింది.
2019లో ఓటమి షాక్..
వర్షం కారణంగా రెండు రోజుల పాటు జరిగిన ఆ సెమీఫైనల్ మ్యాచ్లో తొలుత బ్యాటింగ్ చేసిన కివీస్ జట్టు 239 పరుగులు చేసింది. అయితే వర్షం కారణంగా భారత్ ఇన్నింగ్స్ మరుసటి రోజుకు వాయిదా పడింది. రిజర్వ్ డేలో బ్యాటింగ్ చేసిన భారత్, ఆరంభ షాక్ను ఎదుర్కొన్నప్పటికీ విజయం కోసం పోరాడింది. కానీ, 18 పరుగుల తేడాతో ఓడిపోయి ప్రపంచ కప్ నుంచి నిష్క్రమించింది. ICC నాకౌట్ మ్యాచ్లో 2021లో జరిగిన మొదటి ICC వరల్డ్ టెస్ట్ ఛాంపియన్షిప్ ఫైనల్లో ఇరు జట్లు తలపడడం ఇది మూడోసారి. ఈ మ్యాచ్లోనూ కివీస్ భారత్పై 8 వికెట్ల తేడాతో విజయం సాధించింది.
ముంబై మైదానంలో భారత్-కివీస్ జట్ల మధ్య హోరాహోరీ పోరు..
2023 ప్రపంచకప్లో తొలి సెమీఫైనల్ మ్యాచ్ ముంబైలోని వాంఖడే స్టేడియంలో జరగనుంది. లీగ్ దశలో ఇప్పటి వరకు ఈ మైదానంలో నాలుగు మ్యాచ్లు జరగ్గా, అందులో తొలుత బ్యాటింగ్ చేసిన జట్టు మూడుసార్లు విజయం సాధించింది. ఈ మైదానంలో ఒక్క మ్యాచ్లో లక్ష్యాన్ని ఛేదించిన జట్టు విజయం సాధించింది. దీన్ని బట్టి చూస్తే వాంఖడేలో టార్గెట్ ఛేజింగ్ అంత సులభం కాదు. ఎందుకంటే సమయం గడిచేకొద్దీ వాంఖడే పిచ్ ఫాస్ట్ బౌలర్లకు మరింత సహాయకారిగా మారుతుంది.
మరిన్ని క్రీడా వార్తల కోసం ఇక్కడ క్లిక్ చేయండి..