Top 5 Bowlers in IPL: ఐపీఎల్‌లో చరిత్ర సృష్టించిన పీయూష్ చావ్లా.. టాప్ 5 లిస్టులో ఎవరున్నారంటే?

Piyush Chawla Bowling Records: ఇండియన్ ప్రీమియర్ లీగ్‌(IPL)లో ఈరోజు బెంగళూరులో రాయల్ ఛాలెంజర్స్ బెంగళురు వర్సెస్ గుజరాత్ టైటాన్స్ జట్ల మధ్య కీలక పోరు జరగనుంది. అయితే, గత రాత్రి ముంబై ఇండియన్స్ వర్సెస్ కోల్‌కతా నైట్ రైడర్స్‌ జట్లు తలపడ్డాయి. ముంబై హోమ్ గ్రౌండ్ వాంఖడే అంతర్జాతీయ క్రికెట్ స్టేడియంలో జరిగిన ఈ మ్యాచ్‌లో ముంబై జట్టుపై కోల్‌కతా నైట్ రైడర్స్ జట్లు 12 ఏళ్ల తర్వాత విజయాన్ని నమోదు చేసింది. అయితే, ముంబై తరపున జరిగిన మ్యాచ్‌లో వెటరన్ స్పిన్ బౌలర్ పీయూష్ చావ్లా అద్భుతమైన ఫీట్ సాధించి అత్యధిక వికెట్లు తీసిన డ్వేన్ బ్రావోను అధిగమించాడు. ఐపీఎల్ చరిత్రలో అత్యధిక వికెట్లు తీసిన రెండో బౌలర్‌గా చావ్లా నిలిచాడు.

5. సునీల్ నరైన్..

వెటరన్ IPL స్పిన్ బౌలర్ సునీల్ నరైన్ ప్రస్తుత సీజన్‌లో కోల్‌కతా నైట్ రైడర్స్‌లో భాగంగా ఉన్నాడు. ఐపీఎల్ కెరీర్‌లో ఇప్పటి వరకు 172 మ్యాచ్‌లు ఆడాడు. ఇందులో అతని పేరిట 175 వికెట్లు నమోదయ్యాయి. ముంబైకి వ్యతిరేకంగా, అతను రోహిత్‌ను అవుట్ చేయడం ద్వారా తన 175వ వికెట్‌ని సాధించి టాప్ 5లో తన స్థానాన్ని ఖాయం చేసుకున్నాడు.

4. భువనేశ్వర్ కుమార్..

సన్‌రైజర్స్ హైదరాబాద్ వెటరన్ ఫాస్ట్ బౌలర్ భువనేశ్వర్ కుమార్ ఐపీఎల్‌లో బాగా పాపులర్. భువనేశ్వర్ కెరీర్ ఆరంభం నుంచి ఐపీఎల్‌లో తనదైన ముద్ర వేస్తున్నాడు. ఇప్పటి వరకు ఐపీఎల్ కెరీర్‌లో 170 మ్యాచ్‌లు ఆడాడు. ఇందులో భువనేశ్వర్ కుమార్ 178 వికెట్లు పడగొట్టాడు.

3. డ్వేన్ బ్రావో..

చెన్నై సూపర్‌కింగ్స్‌ మాజీ ఆల్‌రౌండర్‌ డ్వేన్‌ బ్రావో తన బౌలింగ్‌లో ప్రపంచ వ్యాప్తంగా ఎంతో పేరు తెచ్చుకున్నాడు. ఐపీఎల్‌లో అత్యంత విశ్వసనీయమైన ఆటగాళ్లలో బ్రావో కూడా ఒకడు. ఐపీఎల్ కెరీర్‌లో 161 మ్యాచ్‌లు ఆడాడు. ఈ సమయంలో అతను తన పేరిట 183 వికెట్లు తీశాడు.

2. పీయూష్ చావ్లా..

ప్రస్తుత సీజన్‌లో ముంబై ఇండియన్స్‌కు స్పిన్ మాయాజాలం చూపిస్తున్న పీయూష్ చావ్లా ఇండియన్ ప్రీమియర్ లీగ్‌లో అత్యంత విజయవంతమైన బౌలర్లలో ఒకడిగా నిలిచాడు. కోల్‌కతా నైట్ రైడర్స్‌పై రింకూ సింగ్ వికెట్ పడగొట్టిన వెంటనే డ్వేన్ బ్రావోను పీయూష్ చావ్లా అధిగమించాడు. పీయూష్ 189 మ్యాచ్‌ల్లో 184 వికెట్లు తీశాడు. ఐపీఎల్ చరిత్రలో అత్యధిక వికెట్లు తీసిన రెండో బౌలర్‌గా నిలిచాడు.

1. యుజ్వేంద్ర చాహల్..

ఇండియన్ ప్రీమియర్ లీగ్‌లో యుజ్వేంద్ర చాహల్ తన కెరీర్ ప్రారంభం నుంచి బంతితో అద్భుతాలు చేస్తున్నాడు. యుజ్వేంద్ర చాహల్ ప్రస్తుత ఐపీఎల్ సీజన్‌లో రాజస్థాన్ రాయల్స్ తరపున ఆడుతున్నాడు. 155 ఐపీఎల్ మ్యాచ్‌ల్లో 200 వికెట్లు తీశాడు. ఐపీఎల్ చరిత్రలో అత్యధిక వికెట్లు తీసిన బౌలర్‌గా చాహల్ నిలిచాడు.

మరిన్ని క్రీడా వార్తల కోసం ఇక్కడ క్లిక్ చేయండి..