Shapoor Zadran : క్రికెట్ ప్రపంచంలో విషాదం.. 38 ఏళ్లకే ఆస్పత్రిలో చికిత్స పొందుతూ తుది శ్వాస విడిచిన స్టార్ బౌలర్

Shapoor Zadran

Shapoor Zadran : క్రికెట్ ప్రపంచంలో తీవ్ర విషాదం నెలకొంది. అఫ్గానిస్తాన్ క్రికెట్ చరిత్రలో తనదైన ముద్ర వేసిన మాజీ దిగ్గజ ఫాస్ట్ బౌలర్ షాపూర్ జద్రాన్ మంగళవారం (జూలై 07) కన్నుమూశారు. గత కొంతకాలంగా ఆయన అరుదైన ఆరోగ్య సమస్యతో బాధపడుతున్నారు. మెరుగైన వైద్యం కోసం ఆయనకు భారతదేశంలోనే చికిత్స అందిస్తున్నారు. ఈ క్రమంలోనే పరిస్థితి విషమించి ఆయన మరణించినట్లు అఫ్గానిస్తాన్ క్రికెట్ బోర్డు (ACB) అధికారికంగా ప్రకటించింది. షాపూర్ జద్రాన్ హఠాన్మరణం పట్ల అఫ్గాన్ క్రికెట్ బోర్డుతో పాటు ప్రపంచవ్యాప్తంగా ఉన్న క్రికెట్ అభిమానులు, ప్రముఖులు తీవ్ర సంతాపం, దిగ్భ్రాంతి వ్యక్తం చేస్తున్నారు.

షాపూర్ జద్రాన్ మరణ వార్తను పంచుకుంటూ అఫ్గానిస్తాన్ క్రికెట్ బోర్డు ఎంతో ఎమోషనల్ పోస్ట్ పెట్టింది. “మా మాజీ ఫాస్ట్ బౌలర్ షాపూర్ జద్రాన్ అకాల మరణం పట్ల అఫ్గానిస్తాన్ క్రికెట్ బోర్డు తీవ్ర విచారాన్ని, సంతాపాన్ని వ్యక్తంచేస్తోంది” అని బోర్డు పేర్కొంది. అంతేకాకుండా, “అఫ్గానిస్తాన్ దేశంలో క్రికెట్ ఆట రంగానికి బలమైన పునాది వేసిన అతికొద్ది మంది ముఖ్యమైన వ్యక్తులలో షాపూర్ ఒకరు. ఆయనకు ఆటపై ఉన్న అంకితభావం, అచంచలమైన నిబద్ధత మన దేశంలో క్రికెట్ ఎదుగుదలకు ఎంతో కీలక పాత్ర పోషించాయి” అంటూ బోర్డు కొనియాడింది. అఫ్గాన్ జట్టు అంతర్జాతీయ స్థాయికి ఎదగడంలో ఆయన చేసిన సేవలు మరువలేనివని గుర్తుచేసుకుంది.

షాపూర్ జద్రాన్ గత కొంతకాలంగా హెమోఫాగోసైటిక్ లింఫోహిస్టియోసైటోసిస్(HLH) అనే అరుదైన వ్యాధితో బాధపడుతున్నారు. ఇది నేరుగా మనిషి రోగనిరోధక శక్తి (ఇమ్యూన్ సిస్టమ్) పై తీవ్ర ప్రభావం చూపే ప్రమాదకరమైన సమస్య. దీని నివారణ కోసం గత కొన్ని నెలలుగా భారతదేశంలోని ఢిల్లీ-ఎన్‌సీఆర్ పరిధిలో ఉన్న గ్రేటర్ నోయిడాలోని ఒక ప్రముఖ ఆసుపత్రిలో ఆయనకు చికిత్స అందిస్తున్నారు. అక్కడే వైద్యుల పర్యవేక్షణలో చికిత్స పొందుతూ ఆయన తన ఆఖరి శ్వాస విడిచారు.

إِنَّا لِلّهِ وَإِنَّـا إِلَيْهِ رَاجِعُونَ

With profound grief and deep sorrow, the Afghanistan Cricket Board mourns the passing of former Afghanistan fast bowler Shapoor Zadran.

Shapoor Zadran was one of the foundation-laying figures of Afghanistan cricket, whose dedication,… pic.twitter.com/iPIAJ6HLkq

— Afghanistan Cricket Board (@ACBofficials) July 7, 2026

షాపూర్ సోదరుడు ఘమయ్ జద్రాన్ తెలిపిన వివరాల ప్రకారం.. షాపూర్ జద్రాన్‌కు గత ఏడాది అక్టోబర్ నెల నుంచే నిరంతరం వైద్య పరీక్షలు, చికిత్స జరుగుతున్నాయి. అయితే వ్యాధి తీవ్రత ఎక్కువగా ఉండటంతో, నిపుణులైన వైద్యుల సలహా మేరకు మరింత మెరుగైన వైద్యం కోసం ఆయనను భారతదేశానికి తీసుకువచ్చారు. ఆయన ఆరోగ్యం క్షీణిస్తున్న తరుణంలో, సుమారు రెండు నెలల క్రితం అఫ్గానిస్తాన్ స్టార్ క్రికెటర్లు రషీద్ ఖాన్, మహ్మద్ నబీలు భారత్‌లోని ఆసుపత్రికి వచ్చి షాపూర్‌ను పరామర్శించారు. ఆయన త్వరగా కోలుకోవాలని ఆకాంక్షించారు, కానీ ఇంతలోనే ఈ విషాద వార్త వినాల్సి వచ్చింది.

అఫ్గానిస్తాన్ జట్టు తరఫున షాపూర్ జద్రాన్ అంతర్జాతీయ కెరీర్‌లో అద్భుతమైన రికార్డులను కలిగి ఉన్నారు. ఆయన తన కెరీర్‌లో మొత్తంగా 44 వన్డే మ్యాచ్‌లు, అలాగే 36 టీ20 అంతర్జాతీయ మ్యాచ్‌లు ఆడారు. వన్డే ఫార్మాట్‌లో 44 ఇన్నింగ్స్‌ల్లో బౌలింగ్ చేసిన ఆయన 43 వికెట్లు పడగొట్టారు. అదేవిధంగా, టీ20 ఇంటర్నేషనల్స్‌లో 36 ఇన్నింగ్స్‌ల్లో బౌలింగ్ చేసి 37 వికెట్లను తన ఖాతాలో వేసుకున్నారు. మైదానంలో ఎంతో దూకుడుగా ఉంటూ, అఫ్గాన్ జట్టుకు ఎన్నో అద్భుతమైన విజయాలను అందించిన లెఫ్ట్ ఆర్మ్ ఫాస్ట్ బౌలర్‌గా ఆయన క్రికెట్ చరిత్రలో నిలిచిపోతారు.

మరిన్ని క్రీడా వార్తల కోసం ఇక్కడ క్లిక్ చేయండి..