Fastest T20I Centuries: టీ20ల్లో విధ్వంసం.. ఫాస్టెస్ట్ సెంచరీలు బాదిన బ్యాటర్లు వీళ్లే
Fastest T20I Centuries: అంతర్జాతీయ టీ20 క్రికెట్‌ లో బ్యాటర్లు మ్యాచ్ ప్రారంభం నుంచే బౌండరీల వర్షం కురిపించడం సర్వసాధారణమైంది. అయితే కొద్దిమంది బ్యాటర్లు మాత్రమే తమ దంచికొట్టుడు ఆటతో కేవలం కొన్ని బంతుల్లోనే సెంచరీ పూర్తి చేసి చరిత్ర సృష్టిస్తున్నారు.
Fastest T20I Centuries: టీ20 అంతర్జాతీయ క్రికెట్‌లో సెంచరీ చేయడమే గొప్ప విషయం. అలాంటిది కేవలం 30 బంతుల్లోనే వంద పరుగులు పూర్తి చేస్తే అది ఎంతటి విధ్వంసకర ఇన్నింగ్సో అర్థం చేసుకోవచ్చు. భారత ఓపెనర్ అభిషేక్ శర్మ ఈ ఘనత సాధించి చరిత్ర సృష్టించాడు. ఇటీవల న్యూజిలాండ్‌తో జరిగిన మ్యాచ్‌లో ఈ భారత యువ సంచలనం కేవలం 38 బంతుల్లో 113 పరుగులు చేసి మరోసారి సంచలనం సృష్టించాడు. ఈ నేపథ్యంలో టీ20 అంతర్జాతీయ క్రికెట్‌లో అతి తక్కువ బంతుల్లో సెంచరీలు బాదిన టాప్ బ్యాటర్ల రికార్డులు క్రీడా ప్రపంచంలో చర్చనీయాంశంగా మారాయి.
33 బంతుల్లోనే సెంచరీలు
ఈ జాబితాలో జింబాబ్వే కెప్టెన్ సికందర్ రజా, న్యూజిలాండ్ బ్యాటర్ ఫిన్ అలెన్ తర్వాతి స్థానాల్లో నిలిచారు. సికందర్ రజా 2024 అక్టోబర్ 23న గాంబియాతో జరిగిన మ్యాచ్‌లో 33 బంతుల్లో సెంచరీ పూర్తి చేశాడు. మరోవైపు ఫిన్ అలెన్ 2026 టీ20 ప్రపంచకప్‌లో దక్షిణాఫ్రికాతో జరిగిన సెమీఫైనల్‌లో 33 బంతుల్లోనే వంద పరుగులు సాధించాడు. వీరిద్దరూ ఫుల్ మెంబర్ దేశాల ఆటగాళ్లలో వేగవంతమైన సెంచరీల జాబితాలో సంయుక్తంగా రెండో స్థానంలో ఉన్నారు.
35 బంతుల్లో రోహిత్, మిల్లర్
భారత మాజీ కెప్టెన్ రోహిత్ శర్మ, దక్షిణాఫ్రికా బ్యాటర్ డేవిడ్ మిల్లర్ కూడా ఈ జాబితాలో ఉన్నారు. 2017 అక్టోబర్ 29న బంగ్లాదేశ్‌పై డేవిడ్ మిల్లర్ 35 బంతుల్లో సెంచరీ చేశాడు. అదే ఏడాది డిసెంబర్ 22న శ్రీలంకపై రోహిత్ శర్మ కూడా 35 బంతుల్లోనే వంద పరుగుల మార్కును అందుకున్నాడు. ఈ రెండు ఇన్నింగ్స్‌లు అప్పట్లో టీ20 అంతర్జాతీయ క్రికెట్‌లో అత్యంత వేగవంతమైన సెంచరీలుగా నిలిచాయి. ఇప్పుడు అభిషేక్ శర్మ 30 బంతుల్లోనే సెంచరీ చేయడంతో ఈ రికార్డును అధిగమించాడు.
37 బంతుల్లో టిమ్ డేవిడ్, అభిషేక్
ఆస్ట్రేలియా ఆటగాడు టిమ్ డేవిడ్ 2025 జూలై 25న వెస్టిండీస్‌పై 37 బంతుల్లో సెంచరీ సాధించాడు. అభిషేక్ శర్మ కూడా 2025లో ఇంగ్లండ్‌తో జరిగిన టీ20 మ్యాచ్‌లో 37 బంతుల్లోనే సెంచరీ పూర్తి చేశాడు. దీంతో ఈ జాబితాలో అభిషేక్ పేరు రెండుసార్లు కనిపిస్తుంది. అతడి ఆటతీరులో ఉన్న దూకుడు ఈ గణాంకాలతో స్పష్టమవుతోంది. తక్కువ బంతుల్లో ఎక్కువ పరుగులు చేయగల సామర్థ్యం టీ20 క్రికెట్‌లో ఎంత కీలకమో ఈ ఇన్నింగ్స్‌లు నిరూపిస్తున్నాయి.
39 బంతుల్లో సెంచరీలు
వెస్టిండీస్ బ్యాటర్ జాన్సన్ చార్లెస్ 2023 మార్చి 26న దక్షిణాఫ్రికాపై 39 బంతుల్లో సెంచరీ సాధించాడు. ఇంగ్లండ్ ఆటగాడు ఫిల్ సాల్ట్ కూడా దక్షిణాఫ్రికాపై 39 బంతుల్లోనే శతకం పూర్తి చేశాడు. ఈ రికార్డులన్నీ టీ20 అంతర్జాతీయ క్రికెట్‌లో బ్యాటర్ల దూకుడును తెలియజేస్తున్నాయి. అయితే అన్ని దేశాల ఆటగాళ్లను కలిపి చూస్తే అభిషేక్ శర్మ ప్రపంచంలోనే అత్యంత వేగంగా సెంచరీ చేసిన ఆటగాడు కాదు. ఎస్టోనియాకు చెందిన సాహిల్ చౌహాన్ 27 బంతుల్లో, టర్కీ ఆటగాడు ముహమ్మద్ ఫహాద్ 29 బంతుల్లో సెంచరీ చేశారు. ఫుల్ మెంబర్ దేశాల ఆటగాళ్లలో మాత్రం అభిషేక్ శర్మదే వేగవంతమైన సెంచరీ రికార్డు.
మరిన్ని క్రీడా వార్తల కోసం ఇక్కడ క్లిక్ చేయండి..