CSK : అర్ధాంతరంగా ఐపీఎల్ వదిలి వెళ్లిన స్టార్ ప్లేయర్.. 2026లో సిఎస్‌కేకు ఘోర పరాభవం తప్పదా?
CSK : ఐపీఎల్ 2026లో చెన్నై సూపర్ కింగ్స్‌కు గట్టి ఎదురుదెబ్బ తగిలింది. స్టార్ ఆల్ రౌండర్ జేమీ ఓవర్టన్ గాయం కారణంగా స్వదేశానికి తిరిగి వెళ్లారు. ఇప్పటికే మాజీ కెప్టెన్ ఎంఎస్ ధోనీ సహా పలువురు ప్లేయర్లు గాయాలతో దూరమయ్యారు.
CSK : ఐపీఎల్ 2026 సీజన్‌లో ప్లే ఆఫ్స్ రేసు ఉత్కంఠగా సాగుతున్న వేళ, డిఫెండింగ్ ఛాంపియన్ చెన్నై సూపర్ కింగ్స్ (CSK) టీమ్‌కు భారీ ఎదురుదెబ్బ తగిలింది. ఆ జట్టు స్టార్ ఆల్ రౌండర్ జేమీ ఓవర్టన్ గాయం కారణంగా ఈ సీజన్ మధ్యలోనే స్వదేశానికి వెళ్లిపోయారు. కీలకమైన మ్యాచులు ఉన్న తరుణంలో అత్యుత్తమ ఫామ్‌లో ఉన్న ఆటగాడు జట్టుకు దూరం కావడం అభిమానులను తీవ్ర ఆందోళనకు గురిచేస్తోంది. ఇప్పటికే పలువురు కీలక ఆటగాళ్లు గాయాల పాలైన సిఎస్‌కేకు, ఇది కోలుకోలేని దెబ్బ అని చెప్పవచ్చు.
ఇంగ్లాండ్‌కు చెందిన జేమీ ఓవర్టన్ ఈ సీజన్‌లో సిఎస్‌కే తరపున అద్భుతమైన ప్రదర్శన ఇస్తున్నారు. అయితే, తాజా సమాచారం ప్రకారం ఆయన కుడి తొడ గాయంతో బాధపడుతున్నారు. మెరుగైన చికిత్స, తదుపరి పరీక్షల కోసం ఆయన తిరిగి యూకే వెళ్లినట్లు సిఎస్‌కే మేనేజ్మెంట్ అధికారికంగా ప్రకటించింది. ఓవర్టన్ ఈ సీజన్‌లో చెన్నై తరపున అత్యంత ప్రభావవంతమైన బౌలర్‌గా ఉన్నారు. 10 ఇన్నింగ్స్‌ల్లో 14 వికెట్లతో పాటు బ్యాట్‌తో కూడా 158 స్ట్రైక్ రేట్‌తో మెరుపులు మెరిపించారు. ముఖ్యంగా లక్నోతో జరిగిన గత మ్యాచ్‌లో 3 వికెట్లు తీసి జట్టు విజయంలో కీలక పాత్ర పోషించారు.
సిఎస్‌కేను ఈ సీజన్‌లో గాయాలు వెంటాడుతున్నాయి. జట్టు మాజీ కెప్టెన్, వెన్నెముక వంటి ఎంఎస్ ధోనీ గాయం కారణంగా ఇప్పటివరకు ఒక్క మ్యాచ్ కూడా ఆడలేదు. తాజా సమాచారం ప్రకారం లక్నోతో జరిగే ఎవే మ్యాచ్‌కు కూడా ఆయన అందుబాటులో ఉండటం లేదు. వీరితో పాటు ఖలీల్ అహ్మద్, ఆయుష్ మ్హాత్రే వంటి కీలక ప్లేయర్లు ఇప్పటికే టోర్నీకి దూరమయ్యారు. ఇలాంటి విపత్కర పరిస్థితుల్లో జేమీ ఓవర్టన్ కూడా వెళ్లిపోవడం జట్టు బౌలింగ్, ఆల్ రౌండ్ విభాగాన్ని బాగా బలహీనపరిచింది.
పాయింట్ల పట్టికలో టాప్-4లో నిలిచేందుకు చెన్నై తీవ్రంగా శ్రమిస్తోంది. ప్రస్తుతం ఆడిన 11 మ్యాచుల్లో 6 విజయాలతో 12 పాయింట్లు సాధించి మిడ్-టేబుల్ ట్రాఫిక్‌లో చిక్కుకుంది. ప్లే ఆఫ్స్ చేరాలంటే మిగిలిన మూడు మ్యాచుల్లో కనీసం రెండింటిలో గెలవాల్సి ఉంటుంది. శుక్రవారం లక్నో సూపర్ జెయింట్స్‌తో జరగనున్న కీలక పోరులో ఓవర్టన్ లేకపోవడం పెద్ద లోటు. రుతురాజ్ గైక్వాడ్ సేన ఈ సవాళ్లను ఎలా ఎదుర్కొంటుందో చూడాలి.
మరిన్ని క్రీడా వార్తల కోసం ఇక్కడ క్లిక్ చేయండి..