Cricket Records: 34,000 బంతులు విసిరినా.. కెరీర్‌లో ఇప్పటివరకు ఒక్క నో బాల్ వేయని బౌలర్.. ఎవరో తెలుసా?

No Ball Records

Test Cricket Records: క్రికెట్ ప్రపంచంలో బ్యాటర్లు, బౌలర్ల గణాంకాలు వేల సంఖ్యలో ఉన్నాయి. కానీ కొన్నిసార్లు క్రీడా ప్రియులను ఆశ్చర్యపరిచే కొన్ని గణాంకాలు చూస్తే, కచ్చితంగా ఆశ్చర్యపోతారు. టెస్ట్ క్రికెట్‌లో ఆస్ట్రేలియా బౌలర్ నాథన్ లియాన్ అలాంటి రికార్డును సృష్టించాడు. అతను ఇప్పటివరకు తన టెస్ట్ కెరీర్‌లో 34,500 కంటే ఎక్కువ బంతులు బౌలింగ్ చేశాడు. కానీ, ఆశ్చర్యకరమైన విషయం ఏమిటంటే అతను ఇప్పటివరకు ఒక్క నో బాల్ కూడా వేయలేదు. ఈ సంఖ్య ఆశ్చర్యకరమైనది.

139 టెస్ట్ కెరీర్, ఇప్పటివరకు ఒక్క నో బాల్ కూడా వేయలే..

లియాన్ టెస్ట్ కెరీర్ క్రమశిక్షణకు ఒక ఉదాహరణ. అతను 2011లో శ్రీలంకతో జరిగిన గాలే టెస్ట్ ద్వారా అరంగేట్రం చేశాడు. అప్పటి నుంచి 139 టెస్ట్ మ్యాచ్‌లు ఆడి మొత్తం 562 వికెట్లు పడగొట్టాడు. అతని బౌలింగ్ సగటు 30.14గా ఉంది. ఇది ఏ స్పిన్ బౌలర్‌కైనా అద్భుతమైనది.

లియాన్ అతిపెద్ద లక్షణం బౌలింగ్‌లో అతని నియంత్రణ. ఫాస్ట్ బౌలర్లు లేదా ఇతర స్పిన్నర్లు కొన్నిసార్లు పొరపాటున నో బాల్ వేస్తుంటారు. కానీ, లియాన్ ఒక్క నో బాల్ కూడా వేయకుండా తనకంటూ ఒక ప్రత్యేక గుర్తింపును సృష్టించుకున్నాడు. క్రికెట్ లాంగ్ ఫార్మాట్‌లో నిరంతరం బౌలింగ్ చేయడం చాలా అలసిపోయే పని. కానీ, లియాన్ ఎల్లప్పుడూ తన అడుగులు, యాక్షన్‌ను అదుపులో ఉంచుకుంటాడు.

ఆస్ట్రేలియా తరపున అత్యంత సక్సెస్ ఫుల్ బౌలర్లలో లియాన్ మూడోవాడు..

లియాన్ తన టెస్ట్ కెరీర్‌లో 562 వికెట్లు పడగొట్టాడు. ఆస్ట్రేలియా తరపున అనేక చారిత్రాత్మక టెస్ట్ విజయాలలో లియాన్ హీరో. టెస్ట్‌లలో ఆస్ట్రేలియా తరపున అత్యధిక వికెట్లు తీసిన మూడవ బౌలర్ అతను. ఆస్ట్రేలియా తరపున రెండవ అత్యధిక వికెట్లు తీసిన బౌలర్‌గా నిలిచేందుకు లియాన్ కేవలం రెండు వికెట్ల దూరంలో ఉన్నాడు. ప్రస్తుతం, లెజెండరీ ఫాస్ట్ బౌలర్ గ్లెన్ మెక్‌గ్రాత్ 563 వికెట్లతో రెండవ స్థానంలో ఉన్నాడు. లియాన్ త్వరలో ఈ జాబితాలో రెండవ స్థానానికి చేరుకుంటాడు.