5 Sixes in One Over : 6.6.6.6.2.6…ఒక ఓవర్‌లో 5 సిక్సర్లు.. ఏంటి మామ ఈ ఊచకోత.. వీడియో వైరల్
గ్లోబల్ సూపర్ లీగ్ 2025 సెమీఫైనల్‌లో షిమ్రోన్ హేట్‌మైర్ ఒకే ఓవర్‌లో 5 సిక్సులు బాది 32 పరుగులు చేశాడు. అతని మెరుపు ఇన్నింగ్స్‌తో గయానా అమెజాన్ వారియర్స్ ఫైనల్‌కు చేరింది. ఇందుకు సంబంధించిన వీడియో సోషల్ మీడియాలో వైరల్ అవుతుంది.
5 Sixes in One Over : గ్లోబల్ సూపర్ లీగ్ 2025 సెమీఫైనల్ మ్యాచ్‌లో వెస్టిండీస్ స్టార్ బ్యాటర్ షిమ్రోన్ హేట్‌మైర్ బ్యాట్‌తో విధ్వంసం సృష్టించాడు. గయానా అమెజాన్ వారియర్స్ తరపున హోబర్ట్ హరికేన్స్ తో జరిగిన మ్యాచ్‌లో, అతను ఫాబియన్ అలెన్ వేసిన ఒకే ఓవర్‌లో 5 సిక్సర్లతో సహా ఏకంగా 32 పరుగులు సాధించాడు. మంగళవారం గయానాలోని ప్రొవిడెన్స్ స్టేడియంలో హేట్‌మైర్ కేవలం 10 బంతుల్లో 39 పరుగులు చేసి, తన జట్టును ఫైనల్‌కు చేర్చాడు. ముందుగా బ్యాటింగ్ చేసిన హోబర్ట్ హరికేన్స్ జట్టు 16.1 ఓవర్లలో 125 పరుగులకే ఆలౌట్ అయ్యింది. దీనికి బదులుగా అమెజాన్ వారియర్స్ 9 ఓవర్ల తర్వాత 3 వికెట్ల నష్టానికి 43 పరుగులు చేసింది. ఆ సమయంలో గెలవడానికి 72 బంతుల్లో 82 పరుగులు అవసరం అయ్యాయి. సెమీఫైనల్ మ్యాచ్ కావడంతో ఈ లక్ష్యాన్ని ఛేదించడం చాలా కష్టంగా మారింది. తొమ్మిదో ఓవర్‌లో అమెజాన్ స్కోరు 42 పరుగుల వద్ద 3 వికెట్లు పడిపోయిన తర్వాత హేట్‌మైర్ బ్యాటింగ్‌కు వచ్చాడు. అతను 10వ ఓవర్‌లో మొత్తం ఆటనే మార్చేశాడు.
ఫాబియన్ అలెన్ బౌలింగ్‌కు వచ్చాడు, హేట్‌మైర్ సిక్సర్ల వర్షం కురిపించాడు. అతను మొదటి సిక్స్‌ను లాంగ్ ఆన్ మీదుగా కొట్టాడు. రెండో బంతికి బౌండరీ దగ్గర ఉన్న ఒడియన్ స్మిత్ క్యాచ్ వదిలేశాడు. దాంతో బంతి సిక్సర్‌గా వెళ్లింది. మూడో, నాలుగో బంతికి కూడా సిక్సర్లు కొట్టాడు. ఐదో బంతికి రెండు పరుగులు తీశాడు, ఆపై ఓవర్ చివరి బంతికి కూడా సిక్సర్ బాదాడు. ఈ విధంగా అతను ఒకే ఓవర్‌లో 5 సిక్సర్ల సహాయంతో మొత్తం 32 పరుగులు సాధించాడు.
హేట్‌మైర్‌ను ఉసామా మీర్ అవుట్ చేశాడు. అతను కేవలం 10 బంతుల్లో 6 సిక్సర్లతో 39 పరుగులు చేశాడు. అమెజాన్ వారియర్స్ 17వ ఓవర్‌లోనే 4 వికెట్లు మిగిలి ఉండగానే లక్ష్యాన్ని చేరుకుంది. ఇప్పుడు జూలై 18న జరగనున్న ఫైనల్‌లో రంగపూర్ రైడర్స్ తో గయానా అమెజాన్ వారియర్స్ తలపడుతుంది.
మరిన్ని క్రికెట్ న్యూస్ కోసం ఇక్కడ క్లిక్ చేయండి..