ODI World Cup: ప్రపంచకప్ 2027 నుంచి ఇంగ్లండ్ ఔట్.. కారణం ఏంటో తెలుసా..?
2027 World Cup: 1998 తర్వాత ఇంగ్లాండ్ సొంతగడ్డపై దక్షిణాఫ్రికాపై సిరీస్ ఓడిపోయింది. 2- 1 తేడాతో సిరీస్ ఓడిపోయింది. హ్యారీ బ్రూక్ నాయకత్వంలో 50 ఓవర్ల ఫార్మాట్లో ఇంగ్లాండ్ జట్టు పరిస్థితి దారుణంగా తయారైంది. దీంతో 2027 ప్రపంచకప్నకు ముందు పీకల్లోతు కష్టాల్లో మునిగిపోయింది.
2027 World Cup: ఒకప్పుడు వన్డే క్రికెట్లో తిరుగులేని ఆధిపత్యం చూపించిన ఇంగ్లండ్ జట్టు ఇప్పుడు కష్టాల్లో పడింది. 2019లో వన్డే ప్రపంచకప్ గెలిచి చరిత్ర సృష్టించిన ఇంగ్లండ్, 2027లో జరగబోయే ప్రపంచకప్కు నేరుగా అర్హత సాధించలేని ప్రమాదంలో చిక్కుకుంది. ఐసీసీ ర్యాంకింగ్స్లో దారుణంగా పడిపోవడమే దీనికి ప్రధాన కారణం.
2023లో జరిగిన వన్డే ప్రపంచకప్లో ఇంగ్లండ్ ప్రదర్శన అందరినీ నిరాశపరిచింది. ఆ టోర్నమెంట్లో డిఫెండింగ్ ఛాంపియన్గా బరిలోకి దిగిన ఇంగ్లండ్, లీగ్ దశలోనే నిష్క్రమించింది. ఆ తర్వాత కూడా వన్డే క్రికెట్లో చెప్పుకోదగ్గ ప్రదర్శన చేయలేకపోయింది. దీని ఫలితంగా ఐసీసీ వార్షిక వన్డే ర్యాంకింగ్స్లో ఆ జట్టు ఎనిమిదో స్థానానికి పడిపోయింది.
2027 ప్రపంచకప్ ఆతిథ్య దేశాలైన దక్షిణాఫ్రికా, జింబాబ్వే ఆటోమేటిక్గా అర్హత సాధిస్తాయి. వాటితో పాటు ఐసీసీ ర్యాంకింగ్స్లో టాప్-8లో నిలిచిన జట్లు నేరుగా క్వాలిఫై అవుతాయి. ప్రస్తుతం ఇంగ్లండ్ ఎనిమిదో స్థానంలో ఉన్నప్పటికీ, జింబాబ్వే, దక్షిణాఫ్రికాకు ఆతిథ్యం హోదాలో స్థానం కల్పిస్తే, ఇంగ్లండ్ తొమ్మిదో స్థానానికి పడిపోతుంది. దీంతో నేరుగా ప్రపంచకప్కు అర్హత లభించదు.
ఇంగ్లండ్ ఆటగాళ్లు టెస్టు, టీ20 ఫార్మాట్లకు ఎక్కువగా ప్రాధాన్యత ఇస్తున్నారని, వన్డే క్రికెట్పై దృష్టి పెట్టడం లేదని విమర్శలు వినిపిస్తున్నాయి. గత ఒక సంవత్సరంలో ఇంగ్లండ్ కేవలం మూడు వన్డేలు మాత్రమే గెలిచి, పేలవమైన గెలుపు/ఓటమి నిష్పత్తిని నమోదు చేసుకుంది. ఈ పరిస్థితి ఇలాగే కొనసాగితే, ఇంగ్లండ్ 2027 ప్రపంచకప్లో చోటు కోసం క్వాలిఫయర్స్ ఆడాల్సి వస్తుంది.
ప్రపంచ క్రికెట్లో ఒకప్పుడు నెంబర్ వన్ జట్టుగా వెలిగిన ఇంగ్లండ్ ఇప్పుడు ఎదుర్కొంటున్న ఈ సంక్షోభం, అభిమానులను తీవ్ర ఆందోళనకు గురిచేస్తోంది. జట్టు యాజమాన్యం తక్షణమే చర్యలు తీసుకుని, ఆటగాళ్లలో వన్డే క్రికెట్పై ఆసక్తి పెంచడం అవసరం. లేకపోతే, ఇంగ్లండ్ క్రికెట్ చరిత్రలో ఇది ఒక చీకటి అధ్యాయంగా మిగిలిపోయే ప్రమాదం ఉంది.