సంస్కృతం మాట్లాడితే డయాబిటిస్, కొవ్వు తగ్గుతుందట

సంస్కృతం మాట్లాడితే డయాబిటిస్, కొవ్వు తగ్గుతుందని బీజేపీ ఎంపీ గణేష్ సింగ్ ఆసక్తికర వ్యాఖ్యలు చేశారు. అమెరికాలోని ఓ విద్యా సంస్థ చేసిన రీసెర్చ్‌లో ఈ విషయం తేలిందని ఆయన అన్నారు. సంస్కృతం మాట్లాడటం వలన నరాల వ్యవస్థను పెంచుతుందని.. దాని వలన డయాబిటిస్, కొవ్వు అదుపులో ఉంటుందని గణేష్ సింగ్ చెప్పుకొచ్చారు. అంతేకాకుండా కంప్యూటర్ ప్రోగ్రామ్‌లో సంస్కృతాన్ని ఉపయోగించినట్లైతే, అది ఆగకుండా పని చేస్తుందని ఆయన చెప్పారు. ఈ విషయం నాసా చేసిన ఓ సర్వేలో తేలిందని గణేష్ వెల్లడించడం మరో విశేషం.

ఇక పలు ఇస్లామిక్ భాషలు సహా ప్రపంచంలోని 97శాతం భాషలు సంస్కృతం నుంచే పుట్టాయని గణేష్ అన్నారు. మరోవైపు దీనిపై కేంద్ర మంత్రి ప్రతాప్ చంద్ర సారంగి మాట్లాడుతూ.. సంస్కృత భాష మాట్లాడేందుకు చాలా ఉంటుందని, అందులో ఒక్కో పదాన్ని ఎన్నో విధాలుగా వాడుకోవచ్చని తెలిపారు. బ్రదర్, కౌ అనే ఇంగ్లీష్ పదాలు కూడా ఈ భాష నుంచే పుట్టినవేనని చెప్పుకొచ్చారు.