Yoga Benefits: నిద్ర లేమి సమస్యతో ఇబ్బంది పడుతున్నారా.. యోగా బెస్ట్ మెడిసిన్.. ఈ ఆసనాలు ట్రై చేసి చూడండి..
మనిషి ఆరోగ్యంగా ఉండాలంటే శారీరక శ్రమ, సంపూర్ణ ఆహారం, తగినంత నిద్ర తప్పని సరి. అయితే నేటి యుగం బిజీ యుగం.. కాలంతో పాటు పరుగులు తీస్తూ జీవనం సాగించాల్సి వస్తుంది. దీంతో జీవన శైలిలో మార్పులు చోటు చేసుకున్నాయి. తినే ఆహారంలో మార్పులు మాత్రమే కాదు నిద్ర విషయంలో కూడా అనేక సమస్యలు ఎదుర్కోవడం సర్వ సాధారణంగా మారిపోయిది. రాత్రి ప్రశాంతంగా నిద్రపోలేక అల్లాడుతున్నవారి సంఖ్యకు కొదవే లేదు. అయితే నిద్ర లేమి సమస్యతో ఇబ్బంది పడేవారు జీవన శైలిని మార్చుకోవడంతో పాటు సింపుల్ యోగాసనాలు వేయడం ద్వార కూడా సమస్య నుంచి బయట పడవచ్చు.
ప్రస్తుతం ప్రతి ఒక్కరూ కాలంతో పోటీ పడుతూ వేగవంతమైన జీవితాన్ని గడుపుతున్నారు. ఒత్తిడి, ఆందోళన కారణంగా నిద్రలేమి సమస్య సర్వ సాధారణమైంది. చాలా మంది వ్యక్తులు నిద్ర పట్టక రాత్రంతా తిరుగుతూ ఉంటారు. మంచి సుఖ వంతమైన, ప్రశాంతమైన నిద్రను పొందలేరు. మంచి నిద్ర మన ఆరోగ్యాన్ని ప్రభావితం చేయడమే కాదు మానసిక ప్రశాంతత, శక్తికి కూడా చాలా ముఖ్యం. నిద్ర లేకపోవడం వల్ల దేనిపైనా సరిగ్గా దృష్టి పెట్టలేరు. రోగనిరోధక శక్తి బలహీనపడుతుంది. మానసిక ఆరోగ్యంపై కూడా ప్రతికూల ప్రభావం చూపుతుంది. అటువంటి పరిస్థితిలో నిద్ర లేమి నుంచి ఉపశమనం కోసం సహజమైన, సులభమైన పరిష్కారాన్ని కనుగొనడం అవసరం.
నిద్ర లేమి సమస్యకు యోగా సులభమైన పరిష్కారం. ఎవరైనా రాత్రి నిద్ర పోలేక ఇబ్బంది పడుతుంటే యోగ సహాయం చేస్తుంది. యోగా శరీరానికి విశ్రాంతిని ఇవ్వడమే కాదు మనస్సును ప్రశాంతంగా ఉంచడంలో, గాడంగా నిద్రపోయెలా సహాయపడుతుంది. ఈ రోజు సుఖవంతమైన, ప్రశాంతమైన నిద్రను పొందడంలో సహాయపడే 5 యోగా ఆసనాల గురించి తెలుసుకుందాం..
బాలసానా: దీనినే పిల్లల భంగిమ అని కూడా అంటారు. రాత్రి బాగా నిద్రపోవడానికి బాలాసనం చాలా ఉపయోగకరంగా ఉంటుంది. ఈ ఆసనం వల్ల మానసిక ప్రశాంతతతోపాటు ఒత్తిడి తగ్గుతుంది. నిద్రపోయే ముందు మోకాళ్లపై కూర్చుని శరీరాన్ని ముందుకు వంచి నుదిటిని నేలపై ఉంచాలి. దీని తరువాత.. మీ చేతులను ముందుకు చాచాలి. దీర్ఘ శ్వాసను తీసుకోవాలి. ఈ ఆసనాన్ని 1-2 నిమిషాలు చేయాలి. ఇలా చేసిన తర్వాత మీకే తేడా కనిపిస్తుంది.
విపరీత కరణీ ఆసనం: ఈ ఆసనం శరీరం నుంచి అలసటను దూరం చేస్తుంది. రక్త ప్రసరణను మెరుగుపరుస్తుంది. దీని కోసం మీరు గోడ దగ్గర పడుకోవాలి. కాళ్ళను పైకి నిటారుగా ఉంచాలి. అప్పుడు చేతులను శరీరం పక్కకు చాచి దీర్ఘంగా శ్వాస తీసుకోవాలి. ఇలా 5-10 నిమిషాలు చేయండి. ఈ విపరీత కరణీ ఆసనం నిద్ర లేమి సమస్యను దూరం చేస్తుంది. ప్రశాంతమైన నిద్ర పోయేలా చేస్తుంది.
శవాసన: ఈ ఆసనం కూడా నిద్ర పట్టని సమస్యను దూరం చేసి నిద్రను మెరుగుపరచడంలో కూడా సహాయపడుతుంది. ఈ సాధారణ అసనంతో శరీరం, మనస్సు విశ్రాంతిని పొందుతుంది. ఈ ఆసనం వేయడానికి ముందుగా రిలాక్స్ గా నేల మీద పడుకుని చేతులు, కాళ్ళను వదులుగా చేసి రిలాక్స్ అయ్యి.. తరువాత కళ్ళు మూసుకుని దీర్ఘ శ్వాస తీసుకుంటూ విడవాలి. ఈ ఆసనాన్ని 5-10 నిమిషాలు చేయండి.
సుప్త బద్ధకోనాసన: ఈ ఆసనం చేయడం వల్ల శరీరం రిలాక్స్ అవడమే కాదు మానసిక ప్రశాంతత కూడా లభిస్తుంది. దీని కోసం వెనుకభాగంలో పడుకుని.. కాళ్ళను సీతాకోకచిలుకలా విస్తరించండి. అరచేతులను నేలపై ఉంచండి. లోతైన శ్వాస తీసుకోండి. ఇలా 3-5 నిమిషాలు చేయండి.
అనులోమ-విలోమ ప్రాణాయామం: ఇది ఒక రకమైన ప్రాణాయామం. ఇది మనస్సును ప్రశాంతపరుస్తుంది. మంచి నిద్ర పొందడానికి సహాయపడుతుంది. దీన్ని చేయడం చాలా సులభం. దీని కోసం సౌకర్యవంతమైన భంగిమలో కూర్చొని ఒక ముక్కు రంధ్రాన్ని మూసివేసి, మరొక నాసికా రంధ్రం ద్వారా లోపలికి శ్వాస తీసుకోవాలి. ఇలా మార్చి మార్చి శ్వాస తీసుకుంటూ ప్రాణాయామం 5-7 నిమిషాలు చేయాలి. దీని తర్వాత కొన్ని రోజుల్లో నే ఎన్నో విధాలుగా ఆరోగ్య విషయంలో తేడా కనిపిస్తుంది.